ഡാലസ്, ടെക്സാസ്: വടക്കേ അമേരിക്കയിലെ CSI വിശ്വാസ സമൂഹത്തിന്റെ ചരിത്രത്തിൽ പുതിയ അധ്യായം കുറിച്ചുകൊണ്ട് 35-ാമത് CSI കുടുംബ-യുവജന സമ്മേളനം ഡാലസിലെ ലവ് ഓഫ് ക്രൈസ്റ്റ് CSI ചർച്ചിൽ അനുഗ്രഹകരമായി സമാപിച്ചു.

ഇന്ത്യയുൾപ്പെടെ വിവിധ രാജ്യങ്ങളിൽ നിന്നായി 500-ലധികം പ്രതിനിധികളും വിശ്വാസികളും പങ്കെടുത്ത സമ്മേളനം ആത്മീയതയും ചരിത്രനേട്ടവും ഒരുമിച്ചുചേർന്ന വേദിയായി.

നാല് ദിവസങ്ങളിലായി നടന്ന സമ്മേളനത്തോടനുബന്ധിച്ച് പുതുതായി രൂപീകരിച്ച CSI ഡയസ്പോറ ഡയോസിസ് ഓഫ് നോർത്ത് അമേരിക്കയുടെ ആദ്യ ഡയോസിസൻ കൗൺസിൽ ഔദ്യോഗികമായി നിലവിൽ വന്നത് സമ്മേളനത്തിന്റെ ഏറ്റവും പ്രധാനപ്പെട്ട ചരിത്രനേട്ടമായി.

400-ലധികം പേരുടെ പങ്കാളിത്തത്തോടെ നടന്ന വർണാഭമായ ഗ്രാൻഡ് പ്രോസഷനോടെയായിരുന്നു സമ്മേളനത്തിന് തുടക്കമായത്. വിവിധ പ്രദേശങ്ങളെ പ്രതിനിധീകരിച്ച പതാകകൾ, സഭാ ബാനറുകൾ, വൈദികർ, യുവജനങ്ങൾ, കുട്ടികൾ, കുടുംബങ്ങൾ എന്നിവരുടെ സാന്നിധ്യം സമ്മേളനത്തിന് പ്രത്യേക ഭംഗി പകർന്നു.

ചർച്ച് ഓഫ് സൗത്ത് ഇന്ത്യയുടെ മോഡറേറ്റർ മോസ്റ്റ് റവ. ഡോ. കെ. റൂബൻ മാർക്ക് ഉദ്ഘാടന ആരാധനയ്ക്ക് നേതൃത്വം നൽകി. മദ്രാസ്, മലബാർ, സെൻട്രൽ കർണാടക, സൗത്ത് കർണാടക ഡയോസിസുകളിലെ ബിഷപ്പുമാരും ഇന്ത്യയിലെയും വടക്കേ അമേരിക്കയിലെയും വൈദികരും ചടങ്ങിൽ പങ്കെടുത്തു.

തുടർന്ന് നടന്ന ഉദ്ഘാടന സമ്മേളനത്തിൽ CSI സിനഡ് ജനറൽ സെക്രട്ടറി, അഞ്ച് ബിഷപ്പുമാർ, എക്യുമെനിക്കൽ സഭാ നേതാക്കൾ, വിശിഷ്ടാതിഥികൾ എന്നിവർ സന്നിഹിതരായി. അമേരിക്ക, കാനഡ, ഇന്ത്യ എന്നീ രാജ്യങ്ങളുടെ ദേശീയ ഗാനങ്ങൾ ആലപിച്ചതിനുശേഷം ദീപപ്രജ്വലനത്തോടെ സമ്മേളനം ഔപചാരികമായി ആരംഭിച്ചു.

സമ്മേളനത്തിന്റെ ഔദ്യോഗിക ലോഗോ, “Grow and Bridge Generations in Christ” എന്ന പ്രമേയം, തീം സോങ്, സുവനീർ എന്നിവ പ്രകാശനം ചെയ്തു. സമ്മേളനത്തിന് പിന്തുണ നൽകിയ സ്പോൺസർമാരെയും ആദരിച്ചു.

മാർത്തോമ്മാ സഭ, എപ്പിസ്കോപ്പൽ സഭ, യുണൈറ്റഡ് മെത്തഡിസ്റ്റ് സഭ എന്നിവയുടെ പ്രതിനിധികൾ ആശംസകൾ നേർന്നു. ഇർവിംഗ് നഗരത്തിന്റെ പ്രത്യേക അഭിനന്ദന സന്ദേശവും സമ്മേളനത്തിൽ അവതരിപ്പിച്ചു.

പ്രശസ്ത ഗോസ്പൽ ഗായകൻ ബ്രദർ ജോളി ജോല്ലി ഏബ്രഹാം, മേഴ്സി തോമസ് എന്നിവരുടെ സംഗീതശുശ്രൂഷയും, അന്തർദേശീയ ക്രൈസ്തവ നേതാവായ ഡോ. സാം ജോർജിന്റെ യുവജന സന്ദേശവും, റൈറ്റ് റവ. എ. പോൾ ഫ്രാൻസിസ് രവീചന്ദ്രന്റെ മുഖ്യപ്രഭാഷണവും സമ്മേളനത്തിന് ആത്മീയ ആഴം പകർന്നു.

സമ്മേളന ദിവസങ്ങളിൽ ആരാധനകൾ, ബൈബിൾ പഠനങ്ങൾ, നേതൃത്വ സെമിനാറുകൾ, യുവജന-ശിശു പരിപാടികൾ, കായിക മത്സരങ്ങൾ, സാംസ്കാരിക പരിപാടികൾ, കൂട്ടായ്മകൾ എന്നിവ നടന്നു. വിവിധ പ്രദേശങ്ങളിൽ നിന്നെത്തിയ വിശ്വാസികൾ ആത്മീയ അനുഭവങ്ങളും സഹോദര്യവും പങ്കുവെച്ചു.

ലവ് ഓഫ് ക്രൈസ്റ്റ് CSI ചർച്ചിലെ നൂറുകണക്കിന് സന്നദ്ധ പ്രവർത്തകർ ഒരുക്കിയ ആതിഥ്യവും സേവനവും സമ്മേളനത്തിന്റെ പ്രധാന ആകർഷണങ്ങളിലൊന്നായി മാറി.

അവസാന ദിവസം നടന്ന വിശുദ്ധ കുർബാനയിൽ 500-ലധികം വിശ്വാസികൾ പങ്കെടുത്തു. വടക്കേ അമേരിക്കയിലെ വിവിധ CSI സഭകളിൽ നിന്നുള്ള ഗായകർ ചേർന്ന മാസ് ക്വയർ ആരാധനയ്ക്ക് നേതൃത്വം നൽകി.

സമ്മേളന സമാപന ചടങ്ങിൽ പതിറ്റാണ്ടുകളായി വടക്കേ അമേരിക്കയിൽ CSI ശുശ്രൂഷയ്ക്കായി പ്രവർത്തിച്ച മുൻഗാമികളെ ആദരിച്ചു. വിവിധ മത്സരങ്ങളിലെ വിജയികൾ, സ്പോൺസർമാർ, സംഘാടക സമിതി അംഗങ്ങൾ, സന്നദ്ധ പ്രവർത്തകർ എന്നിവരെയും അനുമോദിച്ചു.

ആത്മീയ നവോത്ഥാനത്തിനും സഭാ ഐക്യത്തിനും പുതിയ ദിശാബോധം നൽകിയ ഈ സമ്മേളനം, വടക്കേ അമേരിക്കയിലെ CSI ഡയസ്പോറ ഡയോസിസ് ഔദ്യോഗികമായി പ്രവർത്തനം ആരംഭിച്ച ചരിത്ര സമ്മേളനം എന്ന നിലയിൽ എന്നും ഓർമ്മിക്കപ്പെടുമെന്ന് സംഘാടകർ അറിയിച്ചു.

ജിജു കുളങ്ങര അറിയിച്ചതാണിത്‌.