72-ാമത് ദേശീയ ചലച്ചിത്ര പുരസ്‌കാര പ്രഖ്യാപനത്തിൽ വിജയത്തിളക്കവുമായി മലയാള സിനിമ. ‘ഭ്രമയുഗം’ എന്ന ചിത്രത്തിലെ അസാധാരണ പ്രകടനത്തിലൂടെ മലയാളത്തിന്റെ പ്രിയനടൻ മമ്മൂട്ടി മികച്ച നടനുള്ള ദേശീയ പുരസ്‌കാരം സ്വന്തമാക്കി. ‘ചന്തു ചാമ്പ്യൻ’ എന്ന ചിത്രത്തിലെ പ്രകടനത്തിന് ബോളിവുഡ് താരം കാർത്തിക് ആര്യനും മമ്മൂട്ടിക്കൊപ്പം മികച്ച നടനുള്ള പുരസ്‌കാരം പങ്കിട്ടു. 

മതിലുകള്‍, ഒരു വടക്കന്‍ വീരഗാഥ (1990), പൊന്തന്‍മാട, വിധേയന്‍ (1994), ഡോ. ബാബാസാഹേബ് അംബേദ്കര്‍ (1999) എന്നീ സിനിമകളിലെ അഭിനയമാണ് ഇതിനു മുമ്പ് മമ്മൂട്ടിക്ക് ദേശീയ പുരസ്‌കാരം നേടിക്കൊടുത്തത്. ഇതോടെ മികച്ച നടനുള്ള തെന്നിന്ത്യയിലെ തന്നെ ഏറ്റവും കൂടുതല്‍ ദേശീയ അവാര്‍ഡ് കരസ്ഥമാക്കുന്ന നടനായി മമ്മൂട്ടി മാറി.

ലിജോ ജോസ് പെല്ലിശ്ശേരി സംവിധാനം ചെയ്ത ‘മലക്കോട്ടൈ വാലിബൻ’ എന്ന ചിത്രത്തിലെ ‘അങ്ങ് വാനക്കോണിൽ…’ എന്ന് തുടങ്ങുന്ന ഗാനത്തിലൂടെ വൈക്കം വിജയലക്ഷ്മി മികച്ച പിന്നണി ഗായികയായും തിരഞ്ഞെടുക്കപ്പെട്ടു. 

പ്രശസ്ത സംവിധായകൻ ജയരാജ് അധ്യക്ഷനായ ജൂറിയാണ് 2024-ൽ സെൻസർ ചെയ്ത ചിത്രങ്ങളിൽ നിന്നുള്ള വിജയികളെ പ്രഖ്യാപിച്ചത്. മികച്ച നടൻ, ഗായിക പുരസ്കാരങ്ങൾക്ക് പുറമെ ‘ഭ്രമയുഗം’ എന്ന ചിത്രത്തിലൂടെ മികച്ച ഛായാഗ്രാഹകനുള്ള പുരസ്‌കാരം ഷെഹ്നാദ് ജലാൽ സ്വന്തമാക്കിയതും മലയാളത്തിന് ഇരട്ടി മധുരമായി. മികച്ച മലയാള ചിത്രമായി ഫാസിൽ മുഹമ്മദ് സംവിധാനം ചെയ്ത ‘ഫെമിനിച്ചി ഫാത്തിമ’ തിരഞ്ഞെടുക്കപ്പെട്ടു.