കാസാബ്ലാങ്കാ ഫിലിം ഫാക്ടറിയുടെ പുതിയ തമിഴ് കോമഡി-മിസ്റ്ററി ത്രില്ലര്‍ ചിത്രമായ 'യോളോ' ആമസോണ്‍ പ്രൈം വീഡിയോയില്‍ സ്ട്രീമിംഗ് ആരംഭിച്ചു. കോമഡി, പ്രണയം, സസ്‌പെന്‍സ് എന്നിവ സമന്വയിപ്പിച്ച 'യോളോ' അസാധാരണമായ ഒരു സാഹചര്യത്തില്‍ ആരംഭിക്കുന്ന കൗതുകകരമായ കഥയാണ് പറയുന്നത്.

ഒരിക്കലും കണ്ടിട്ടില്ലാത്ത ദീക്ഷിത എന്ന യുവതിയുമായി താന്‍ ദുരൂഹ സാഹചര്യത്തില്‍ വിവാഹിതനായതായി ശിവ മനസ്സിലാക്കുന്നു. ഈ അപ്രതീക്ഷിത വിവാഹത്തിന്റെ രഹസ്യം തേടിയുള്ള അവരുടെ യാത്ര, യുക്തിക്ക് അതീതമായ ഒരു ഭയാനകമായ ദുരൂഹതയിലേക്കാണ് അവരെ നയിക്കുന്നത്. നര്‍മ്മവും പ്രണയവും നിറഞ്ഞ യാത്രയായി തുടങ്ങുന്ന കഥ പിന്നീട് അപ്രതീക്ഷിത വഴിത്തിരിവുകളും ഞെട്ടിക്കുന്ന വെളിപ്പെടുത്തലുകളും നിറഞ്ഞ സസ്‌പെന്‍സ് സാഹസികതയായി മാറുന്നു.

ലളിതമായ വിനോദവും പ്രണയവും മിസ്റ്ററിയും സമന്വയിപ്പിക്കുന്ന ഈ ചിത്രം പ്രേക്ഷകര്‍ക്ക് വ്യത്യസ്തമായ സിനിമാനുഭവം സമ്മാനിക്കുന്നു. വ്യത്യസ്തമായ കഥയും ശ്രദ്ധേയമായ പ്രകടനങ്ങളും സസ്‌പെന്‍സ് നിറഞ്ഞ അവതരണവും കൊണ്ട് 'യോളോ' അവസാന നിമിഷം വരെ പ്രേക്ഷകരെ ആകാംക്ഷയോടെ പിടിച്ചിരുത്തുന്നു.

ചിത്രത്തിന്റെ ഡിജിറ്റല്‍ വിതരണം നിര്‍മല്‍ ബേബി വര്‍ഗീസിന്റെ നേതൃത്വത്തിലുള്ള കാസബ്ലാങ്ക ഫിലിം ഫാക്ടറിയാണ് നിര്‍വഹിക്കുന്നത്. മികച്ച പ്രാദേശിക സിനിമകളെ പ്രമുഖ ഒടിടി പ്ലാറ്റ്‌ഫോമുകളിലെത്തിക്കാനുള്ള കമ്പനിയുടെ പ്രതിബദ്ധതയുടെ ഭാഗമായാണ് ഈ റിലീസ്. 'യോളോ' ഉടന്‍ തന്നെ മറ്റ് ഒടിടി പ്ലാറ്റ്‌ഫോമുകളിലും ലഭ്യമാകുമെന്ന് നിര്‍മല്‍ ബേബി വര്‍ഗീസ് അറിയിച്ചു.

എം ആര്‍ മോഷന്‍ പിക്‌ചേഴ്‌സിന്റെ ബാനറില്‍ മഹേഷ് സെല്‍വരാജ് നിര്‍മ്മിച്ച ചിത്രത്തിന്റെ സംവിധായകന്‍ എസ്. സാം ആണ്. ദേവ് കെ, ദേവിക സതീഷ്, ആകാശ് പ്രേംകുമാര്‍, ബഡാവ ഗോപി, പ്രവീണ്‍ കണ്ണനൂര്‍, നിധി പ്രദീപ്, ഗിരി ദ്വാരകിഷ്, വി. ജെ. നിക്കി, സ്‌നൂക്കി ഡൂക്കി എന്നിവരാണ് ചിത്രത്തിലെ പ്രധാന താരങ്ങള്‍.

Movie Link: https://www.primevideo.com/detail/0G6G4FDR5AIT35B78DER4ARUO7