ന്യൂയോർക്ക്: സർക്കാർ നൽകുന്ന ആരോഗ്യ-ക്ഷേമ പദ്ധതികളുടെ ആനുകൂല്യം ഉപയോഗിച്ച കുടിയേറ്റക്കാർക്ക് ഗ്രീൻ കാർഡ് നിഷേധിക്കാൻ വഴിയൊരുക്കുന്ന ട്രംപ് ഭരണകൂടത്തിന്റെ പുതിയ കുടിയേറ്റ നയത്തിനെതിരെ നിയമപരമായും ഭരണപരമായും പോരാടുമെന്ന് ന്യൂയോർക്ക് മേയർ സൊഹ്‌റാൻ മംദാനി പ്രഖ്യാപിച്ചു.
 

മെഡിക്കെയ്ഡ്, ഭവനസഹായം, ഭക്ഷ്യസഹായ പദ്ധതി തുടങ്ങിയ പൊതുക്ഷേമ പദ്ധതികൾ ഉപയോഗിച്ചിട്ടുള്ള കുടിയേറ്റക്കാരുടെ ഗ്രീൻ കാർഡ് അപേക്ഷകൾ പരിശോധിക്കുമ്പോൾ ഇമിഗ്രേഷൻ ഉദ്യോഗസ്ഥർക്ക് അത് പ്രതികൂല ഘടകമായി പരിഗണിക്കാമെന്നതാണ് പുതിയ ചട്ടത്തിന്റെ പ്രധാന വ്യവസ്ഥ. അമേരിക്കൻ പൗരത്വ-കുടിയേറ്റ സേവന വിഭാഗത്തിന്റെ അറിയിപ്പുപ്രകാരം സെപ്റ്റംബർ 18 മുതൽ പുതിയ നയം പ്രാബല്യത്തിൽ വരും.

പുതിയ നയം ലക്ഷക്കണക്കിന് കുടിയേറ്റ കുടുംബങ്ങളെ കൂടുതൽ നിരീക്ഷണത്തിന് വിധേയരാക്കുമെന്നും, അർഹതയുണ്ടെങ്കിലും സർക്കാർ ക്ഷേമപദ്ധതികൾ ഉപയോഗിക്കാൻ പലരും ഭയപ്പെടുന്ന സാഹചര്യം സൃഷ്ടിക്കുമെന്നും വിദഗ്ധർ ചൂണ്ടിക്കാട്ടുന്നു. സാമ്പത്തികമായി പിന്നാക്കം നിൽക്കുന്ന കുടുംബങ്ങൾക്ക് ഇത്തരം പദ്ധതികൾ ജീവിതത്തിന്റെ ആശ്രയമാണെന്നും അവർ പറയുന്നു.

"ന്യൂയോർക്ക് നഗരത്തെ ലോകത്തിലെ ഏറ്റവും മികച്ച നഗരമാക്കുന്ന കുടിയേറ്റ കുടുംബങ്ങൾക്കും സമൂഹങ്ങൾക്കുമെതിരായ ഈ ആക്രമണത്തെ നേരിടാൻ ഞങ്ങളുടെ കൈവശമുള്ള എല്ലാ നിയമപരവും ഭരണപരവുമായ മാർഗങ്ങളും ഉപയോഗിക്കും," എന്ന് മംദാനി സമൂഹമാധ്യമത്തിലൂടെ പ്രതികരിച്ചു. എന്നാൽ ഈ നയത്തെ എങ്ങനെ നേരിടുമെന്ന കാര്യത്തിൽ അദ്ദേഹം വിശദാംശങ്ങൾ വെളിപ്പെടുത്തിയില്ല.

ട്രംപ് ഭരണകൂടം 2018-ലും സമാനമായ രീതിയിൽ പൊതുസഹായം സ്വീകരിച്ചവർക്ക് ഗ്രീൻ കാർഡ് നിയന്ത്രിക്കാൻ ശ്രമിച്ചിരുന്നെങ്കിലും അത് നിരവധി നിയമവെല്ലുവിളികൾ നേരിട്ടിരുന്നു. പിന്നീട് ബൈഡൻ ഭരണകൂടം ആ നയം പിൻവലിക്കുകയായിരുന്നു.

പുതിയ ചട്ടത്തെ ന്യായീകരിച്ച ആഭ്യന്തര സുരക്ഷാ വകുപ്പ്, അമേരിക്കൻ നികുതിദായകരുടെ പണം സംരക്ഷിക്കാനും സ്വയംപര്യാപ്തത ഉറപ്പാക്കാനുമാണ് നടപടി ലക്ഷ്യമിടുന്നതെന്ന് വ്യക്തമാക്കി. സർക്കാർ സഹായങ്ങളെ ആശ്രയിക്കുന്ന നയങ്ങൾക്ക് വിരാമമിടുകയെന്നതാണ് പുതിയ ചട്ടത്തിന്റെ ലക്ഷ്യമെന്നും വകുപ്പ് അറിയിച്ചു.

അമേരിക്കയിൽ സ്ഥിരതാമസത്തിന് അപേക്ഷിക്കുന്നവർ സർക്കാർ സഹായങ്ങളെ ആശ്രയിച്ച് ജീവിക്കുന്നവരാകില്ലെന്ന് തെളിയിക്കണമെന്ന വ്യവസ്ഥ നേരത്തേ തന്നെ നിലവിലുണ്ട്. ഇതുവരെ പ്രധാനമായും പണമായി ലഭിക്കുന്ന ക്ഷേമസഹായങ്ങളോ ദീർഘകാല സർക്കാർ പരിചരണ സേവനങ്ങളോ മാത്രമാണ് പരിഗണിച്ചിരുന്നത്. എന്നാൽ പുതിയ നയപ്രകാരം മെഡിക്കെയ്ഡ്, ഭക്ഷ്യസഹായ പദ്ധതി, ഭവനസഹായം തുടങ്ങിയ മറ്റ് പൊതുക്ഷേമ പദ്ധതികളുടെ ഉപയോഗവും ഇമിഗ്രേഷൻ ഉദ്യോഗസ്ഥർക്ക് വിലയിരുത്താനാകും.

കുടിയേറ്റാവകാശ പ്രവർത്തകർ പുതിയ നയത്തെ കടുത്ത ഭാഷയിൽ വിമർശിച്ചു. സാമ്പത്തിക ശേഷിയെ അടിസ്ഥാനമാക്കി കുടിയേറ്റത്തിന് അർഹത നിശ്ചയിക്കുന്ന "സമ്പത്ത് പരിശോധന" പോലുള്ള സമീപനമാണിതെന്ന് അവർ ആരോപിക്കുന്നു. നിലവിൽ ക്ഷേമപദ്ധതികളുടെ ആനുകൂല്യം ലഭിക്കുന്നവരോ, മിശ്ര കുടിയേറ്റ പദവിയുള്ള കുടുംബങ്ങളിലെ അംഗങ്ങളോ ഭാവിയിൽ ഗ്രീൻ കാർഡിനെ ബാധിക്കുമെന്ന ആശങ്കയിൽ ഇത്തരം പദ്ധതികളിൽ നിന്ന് പിന്മാറാൻ സാധ്യതയുണ്ടെന്നും അവർ മുന്നറിയിപ്പ് നൽകി.