കോടിക്കണക്കിന് ഭക്തരുടെ വിശ്വാസത്തിന്റെ പ്രതീകമായ അയോധ്യ ശ്രീരാമക്ഷേത്രത്തിലെ വഴിപാടുതട്ടിപ്പ് കേസില്‍ അന്വേഷണം നിര്‍ണായക വഴിത്തിരിവിലേക്ക്. അറസ്റ്റിലായ എട്ട് പ്രതികളില്‍ മാത്രം ഒതുങ്ങാതെ, അവരുടെ അടുത്ത ബന്ധുക്കളും സുഹൃത്തുക്കളുമായ 20 പേരുടെ ഭൂമി ഇടപാടുകളും സാമ്പത്തിക ഇടപാടുകളും ഇനി അന്വേഷണപരിധിയിലായി. മോഷ്ടിച്ച പണം ബന്ധുക്കളുടെ പേരില്‍ ഭൂമിയും സ്വത്തുക്കളുമായി മാറ്റിയിട്ടുണ്ടോയെന്ന സംശയത്തിന്റെ അടിസ്ഥാനത്തില്‍ ജില്ലാ റവന്യൂ വകുപ്പിനോട് വിശദമായ റിപ്പോര്‍ട്ട് ആവശ്യപ്പെട്ടിരിക്കുകയാണ് ഉത്തര്‍പ്രദേശ് സര്‍ക്കാര്‍ നിയോഗിച്ച പ്രത്യേക അന്വേഷണസംഘം.

പ്രതികള്‍ക്ക് വേണ്ടി സാമ്പത്തിക ഇടപാടുകള്‍ നടത്തുകയോ, സ്വത്തുക്കള്‍ വാങ്ങുകയോ, നിക്ഷേപങ്ങള്‍ മറച്ചുവെക്കുകയോ ചെയ്തതായി സംശയിക്കുന്നവരെയാണ് അന്വേഷണ സംഘം ലക്ഷ്യമിടുന്നത്. കേസിന്റെ വ്യാപ്തി ഇനി വ്യക്തികളില്‍ നിന്ന് സംഘടിത സാമ്പത്തിക കുറ്റകൃത്യത്തിലേക്കാണോ നീളുന്നതെന്ന ചോദ്യമാണ് ഉയരുന്നത്. അറസ്റ്റിലായ രാം ശങ്കര്‍ യാദവ് (ടിന്നു യാദവ്), രാംശങ്കര്‍ മിശ്ര, സുഭാഷ് ശ്രീവാസ്തവ, അവിനാഷ് ശുക്ല, ലവ്കുഷ് മിശ്ര, അനുകല്‍പ് മിശ്ര, മനീഷ് കുമാര്‍ യാദവ്, കരുണേഷ് പാണ്ഡെ എന്നിവരില്‍ ആറുപേര്‍ ക്ഷേത്രത്തിലെ കാണിക്ക എണ്ണല്‍ ജോലിയുടെ ഭാഗമായിരുന്നു. കാണിക്ക എണ്ണുന്ന മുറിയിലെ സി.സി.ടി.വിയില്‍ ഇവര്‍ പണം രഹസ്യമായി ഒളിപ്പിച്ച് പുറത്തേക്ക് കടത്തുന്ന ദൃശ്യങ്ങള്‍ അന്വേഷണ സംഘത്തിന് ലഭിച്ചതോടെയാണ് കേസ് കൂടുതല്‍ ഗുരുതരമായത്.

മോഷ്ടിച്ച പണം എവിടേക്കാണ് ഒഴുകിയതെന്നതാണ് ഇപ്പോള്‍ പോലീസിന്റെ പ്രധാന അന്വേഷണം. ഇതിനകം നടത്തിയ പരിശോധനകളില്‍ ലക്ഷക്കണക്കിന് രൂപയും സ്വര്‍ണവും വാഹനങ്ങളും പിടിച്ചെടുത്തിട്ടുണ്ട്. എന്നാല്‍, മോഷണപ്പണം ഉപയോഗിച്ച് ഭൂമിയോ മറ്റ് സ്ഥിര സ്വത്തുക്കളോ വാങ്ങിയിട്ടുണ്ടോയെന്നതാണ് ഇപ്പോഴത്തെ നിര്‍ണായക അന്വേഷണം. ഇതിനായി സമീപകാല റിയല്‍ എസ്റ്റേറ്റ് ഇടപാടുകള്‍ പോലീസ് സൂക്ഷ്മമായി പരിശോധിക്കുകയാണ്. പ്രദേശത്തെ പ്രമുഖ പ്രോപ്പര്‍ട്ടി ഡീലര്‍മാരെ വിളിച്ചുവരുത്തി ചോദ്യം ചെയ്യുകയും സംശയാസ്പദമായ ഭൂമി രജിസ്‌ട്രേഷനുകളുടെ വിവരങ്ങള്‍ ശേഖരിക്കുകയും ചെയ്തിട്ടുണ്ട്. റവന്യൂ വകുപ്പിന്റെ വിശദമായ റിപ്പോര്‍ട്ടിനായാണ് അന്വേഷണസംഘം ഇപ്പോള്‍ കാത്തിരിക്കുന്നത്.

പ്രതികളുടെ വീടുകളില്‍ നിന്ന് ഭൂമിയുടെ ആധാരങ്ങളും സ്വത്തുസംബന്ധമായ രേഖകളും പോലീസിന് ലഭിച്ചിട്ടുണ്ടെങ്കിലും, അവ മോഷ്ടിച്ച പണം ഉപയോഗിച്ച് സമ്പാദിച്ചതാണെന്ന് നിയമപരമായി തെളിയിക്കാന്‍ കൂടുതല്‍ തെളിവുകള്‍ ആവശ്യമാണ്. അതിനാലാണ് കേസിലെ മുഖ്യപ്രതികളായ സുഭാഷ് ശ്രീവാസ്തവയെയും ടിന്നു യാദവിനെയും ഏഴ് ദിവസത്തെ പോലീസ് കസ്റ്റഡിയില്‍ വിട്ടുകിട്ടാന്‍ അന്വേഷണസംഘം കോടതിയെ സമീപിച്ചിരിക്കുന്നത്.

ഈ കേസിലെ ഏറ്റവും നിര്‍ണായകമായ വസ്തുതകളിലൊന്നാണ് പ്രതികളുടെ ഔദ്യോഗിക ബന്ധങ്ങള്‍. സുഭാഷ് ശ്രീവാസ്തവ ശ്രീരാമ ജന്മഭൂമി തീര്‍ത്ഥക്ഷേത്ര ട്രസ്റ്റ് നിയമിച്ച കാണിക്ക എണ്ണല്‍ മുറിയുടെ സൂപ്പര്‍വൈസറായിരുന്നു. ടിന്നു യാദവ് മുന്‍ ട്രസ്റ്റ് ജനറല്‍ സെക്രട്ടറി ചമ്പത് റായുടെ ഡ്രൈവറുമായിരുന്നു. വഴിപാടുതട്ടിപ്പ് പുറത്തുവന്നതിനു പിന്നാലെ ചമ്പത് റായ് ജനറല്‍ സെക്രട്ടറി സ്ഥാനം രാജിവെച്ചത് കേസിന്റെ രാഷ്ട്രീയവും ഭരണപരവുമായ പ്രത്യാഘാതങ്ങള്‍ക്ക് കൂടുതല്‍ ആക്കം കൂട്ടിയിരിക്കുകയാണ്.

അയോധ്യ രാമക്ഷേത്രം ഒരു ആരാധനാലയം മാത്രമല്ല, കോടിക്കണക്കിന് ജനങ്ങളുടെ വിശ്വാസത്തിന്റെയും ദേശീയ വികാരത്തിന്റെയും പ്രതീകമാണ്. അത്തരമൊരു സ്ഥാപനത്തിലെ വഴിപാടുകള്‍ കൈകാര്യം ചെയ്യുന്നതില്‍ സുരക്ഷാ വീഴ്ചകളും സാമ്പത്തിക ക്രമക്കേടുകളും ഉണ്ടായെന്ന ആരോപണം അതീവ ഗൗരവമുള്ളതാണ്. അന്വേഷണത്തിന്റെ അന്തിമഫലം എന്തായാലും, രാജ്യത്തെ പ്രമുഖ മതസ്ഥാപനങ്ങളിലെ വഴിപാടുകളും ധനകാര്യ ഇടപാടുകളും കൂടുതല്‍ സുതാര്യവും സാങ്കേതികമായി സുരക്ഷിതവുമായ സംവിധാനങ്ങളിലൂടെ കൈകാര്യം ചെയ്യേണ്ടതിന്റെ ആവശ്യകത ഈ സംഭവം വീണ്ടും ഉയര്‍ത്തിക്കാട്ടുന്നു.

ഇപ്പോള്‍ അന്വേഷണസംഘം പരിശോധിക്കുന്നത് ഒരു മോഷണക്കേസിന്റെ പരിധി കടക്കുന്ന ചോദ്യങ്ങളാണ്. ക്ഷേത്രത്തിലെ കോടിക്കണക്കിന് രൂപയുടെ വഴിപാടുകള്‍ എങ്ങനെ തുടര്‍ച്ചയായി ചോര്‍ത്തപ്പെട്ടു..? സുരക്ഷാ സംവിധാനത്തിലെ വീഴ്ചകള്‍ ആരാണ് മറച്ചുവെച്ചത്..? മോഷ്ടിച്ച പണം ബന്ധുക്കളുടെയും വിശ്വസ്തരുടെയും പേരില്‍ വെളുപ്പിച്ചോയെന്നും ട്രസ്റ്റിന്റെ മേല്‍നോട്ട സംവിധാനത്തില്‍ ഗുരുതരമായ പരാജയം സംഭവിച്ചോയെന്നും കണ്ടെത്താനാണ് അന്വേഷണം നീളുന്നത്. രാജ്യത്തെ ഏറ്റവും വലിയ വിശ്വാസകേന്ദ്രങ്ങളിലൊന്നായ അയോധ്യ രാമക്ഷേത്രത്തില്‍ നടന്ന ഈ സാമ്പത്തിക തട്ടിപ്പ്, ഏതാനും ജീവനക്കാരുടെ കുറ്റകൃത്യമായി അവസാനിക്കുമോ, അതോ കൂടുതല്‍ വലിയ സാമ്പത്തിക ശൃംഖല പുറത്തുകൊണ്ടുവരുമോ എന്നതാണ് ഇനി രാജ്യം ഉറ്റുനോക്കുന്നത്.