നോർത്ത് ഈസ്റ്റ് അമേരിക്കൻ ഭദ്രാസനത്തിന്റെ 2026-ലെ ഫാമിലി & യൂത്ത് കോൺഫറൻസ് ജൂലൈ 15 ബുധനാഴ്ച ആരംഭിക്കാനിരിക്കെ, കോൺഫറൻസ് ഗായകസംഘം ആരാധനാ ശുശ്രൂഷകൾക്ക് നേതൃത്വം നൽകുന്നതിനുള്ള ഒരുക്കങ്ങൾ പൂർത്തിയായി. പ്രചോദനാത്മകമായ ഗാനങ്ങളിലൂടെയും ഭക്തിഗീതങ്ങളിലൂടെയും സമ്മേളനത്തിൽ പങ്കെടുക്കുന്നവരുടെ ആത്മീയോത്സാഹം വർധിപ്പിക്കുകയും, ഓർത്തഡോക്സ് ആരാധനയുടെ മുഖമുദ്രകളിലൊന്നായ കൂട്ടായ ആരാധനയിൽ  എല്ലാവരെയും സജീവമായി പങ്കാളികളാക്കുകയും ചെയ്യുകയാണ് ഗായകസംഘത്തിന്റെ ലക്ഷ്യം. സമർപ്പിതരായ ഗായകരിലൂടെ അർപ്പിക്കപ്പെടുന്ന വിശുദ്ധ സംഗീതം ആരാധനയ്ക്കും പ്രാർത്ഥനയ്ക്കും ആത്മീയ വളർച്ചയ്ക്കും ശക്തമായ ഒരു ഉപാധിയാണ്.

ഈ വർഷത്തെ കോൺഫറൻസ് ഗായകസംഘം ന്യൂയോർക്കിലെ കൗൺസിൽ ഓഫ് ഇന്ത്യൻ ഓർത്തഡോക്സ് ചർച്ചസിന് കീഴിലുള്ള 
താഴെപ്പറയുന്ന ഇടവകകളിൽ നിന്നുള്ള അംഗങ്ങളെ ഉൾക്കൊള്ളുന്നതാണ്:
1.    സെയിന്റ്  ഗ്രിഗോറിയോസ് ഓർത്തഡോക്സ് ചർച്ച്, ക്വീൻസ്
2.    സെയിന്റ് തോമസ് ഓർത്തഡോക്സ് ചർച്ച്, ലെവിറ്റൗൺ
3.    സെയിന്റ് മേരീസ് ഓർത്തഡോക്സ് ചർച്ച്, ജാക്സൺ ഹൈറ്റ്സ്
4.    സെയിന്റ്  മേരീസ് ഓർത്തഡോക്സ് ചർച്ച്, വെസ്റ്റ് സെയ്‌വിൽ
5.    സെയിന്റ്  ഗ്രിഗോറിയോസ് ഓർത്തഡോക്സ് ചർച്ച്, ചെറി ലെയ്ൻ

35 അംഗങ്ങളുള്ള ഈ ഗായകസംഘം പ്രസിഡന്റ്  ഫാ. ജോൺ തോമസ്, ക്വയർ  മാസ്റ്റർ ജോസഫ് പാപ്പൻ, കോർഡിനേറ്റർമാരായ  ജോൺ താമരവേലിൽ,  സിസി മാത്യു എന്നിവരുടെ നേതൃത്വത്തിൽ കഴിഞ്ഞ ഏതാനും മാസങ്ങളായി പരിശീലനം നടത്തിവരികയാണ്. കോൺഫറൻസിൽ പങ്കെടുക്കുന്ന വിശ്വാസികളുടെ വൈവിധ്യം പ്രതിഫലിപ്പിക്കുന്നവിധം വിവിധ ഭാഷകളിൽ ഭക്തിഗാനങ്ങൾ ആലപിക്കും. കോൺഫറൻസിന്റെ തീം സോങ്ങും മറ്റ് നിരവധി ഗാനങ്ങളും അനുഗൃഹീത ഗായകനായ ജോസഫ് പാപ്പൻ രചിക്കുകയും സംഗീതസംവിധാനം നിർവഹിക്കുകയും ചെയ്തവയാണ്.

ഫാമിലി & യൂത്ത് കോൺഫറൻസിന്റെ ലക്ഷ്യം കുടുംബബന്ധങ്ങളെ കൂടുതൽ ദൃഢമാക്കുക, പങ്കെടുക്കുന്നവരുടെ വിശ്വാസജീവിതം ആഴപ്പെടുത്തുക, കൂടാതെ നോർത്ത് ഈസ്റ്റ് അമേരിക്കൻ ഭദ്രാസനത്തിന്റെ വിവിധ ഇടവകകളിൽ നിന്നുള്ള വിശ്വാസികളെ ഒരുമിച്ചുകൂട്ടി ഈ സമൂഹത്തിൽ ക്രിസ്തുവിന്റെ ഏകീകൃത സാക്ഷ്യം നൽകാൻ പ്രാപ്തരാക്കുക എന്നതാണ്.
2026 ഫാമിലി & യൂത്ത് കോൺഫറൻസ് ജൂലൈ 15 ബുധനാഴ്ച മുതൽ ജൂലൈ 18 ശനിയാഴ്ച വരെ പെൻസിൽവേനിയയിലെ ലാങ്കസ്റ്റർ വിൻധം റിസോർട്ടിൽ നടക്കും. "കൃപയുടെ പാത്രങ്ങൾ" എന്ന കോൺഫറൻസ് തീം 2 തിമോത്തി 2:20–22 അടിസ്ഥാനമാക്കിയുള്ളതാണ്.
പ്രധാന പ്രഭാഷകർ:

• ഡോ. തോമസ് മാർ അത്താനാസിയോസ്, കണ്ടനാട് ഈസ്റ്റ് ഭദ്രാസന മെത്രാപ്പോലീത്ത
• ഹൈറോമോങ്ക് വാസിലിയോസ്, സെയിന്റ്  ഡയോണിഷ്യസ് മൊണാസ്ട്രി 
• ഫാ. ഡോ. എബി ജോർജ്, ലോങ്ങ്  ഐലൻഡ് സെന്റ് തോമസ് ഇടവക വികാരി 
•  ലിജിൻ തോമസ്, സൗത്ത് വെസ്റ്റ് അമേരിക്കൻ ഭദ്രാസനം

കൂടുതൽ വിവരങ്ങൾക്ക് ബന്ധപ്പെടുക:
• ഫാ. അലക്സ് ജോയ് (കോൺഫറൻസ് കോർഡിനേറ്റർ): 973-489-6440
• ജെയ്‌സൺ തോമസ് (കോൺഫറൻസ് സെക്രട്ടറി): 917-612-8832
• ജോൺ താമരവേലിൽ (കോൺഫറൻസ് ട്രഷറർ): 917-533-3566