ഷിക്കാഗോ: തൃശൂർ  ജൂബിലി മിഷൻ മെഡിക്കൽ കോളേജ് ആശുപത്രിയിലെ നഴ്‌സുമാരുടെ സമരത്തിന്  പിന്നിൽ ചില ഗൂഢലക്ഷ്യങ്ങൾ പ്രവർത്തിക്കുന്നുണ്ടെന്ന്  തൃശൂർ അതിരൂപത മെത്രാപ്പോലീത്ത മാർ ആൻഡ്രൂസ് താഴത്ത്. ഷിക്കാഗോയിൽ സീറോ മലബാർ കൺ വൻഷനിലെത്തിയ അദ്ദേഹം  മാധ്യമപ്രവർത്തകരുമായി സംസാരിക്കവെ  തന്റെ നിലപാടുകൾ  വ്യക്തമാക്കി.

തത്വത്തിന്റെ പേരിലാണ് തന്റെ നിലപാടുകൾ എന്നും അതിൽ മാറ്റമില്ലെന്നും അദ്ദേഹം തറപ്പിച്ചു പറഞ്ഞു. കേരളത്തിൽ ഏറ്റവും അധികം  നഴ്‌സുമാർക്ക് ശമ്പളം നല്കുന്നത് ജൂബിലി ആണ്. ഇപ്പോഴാണ് രാജഗിരി അടക്കമുള്ള കോർപറേറ്റ് ആശുപത്രികൾ അതിനു തുല്യമായ ശമ്പളം നൽകുന്നത്.  അത് ചൂണ്ടിക്കാട്ടിയപ്പോൾ 800 ബെഡിൽ കൂടുതലുള്ള ആശുപത്രി എന്ന നിലയിൽ കൂടുതൽ ശമ്പളം വേണമെന്നായി. 100 കുട്ടികളുള്ള സ്‌കൂളിലും ആയിരമുള്ള സ്‌കൂളിലും ശമ്പളം ഒന്ന് തന്നെ  എന്നതവർ മറക്കുന്നു. കൂടുതൽ  ബെഡ് ഉള്ളപ്പോൾ കൂടുതൽ പേർക്ക് ജോലി ലഭിക്കുന്നു.

ഏറ്റവും കുറഞ്ഞ നിരക്കിൽ ചികിത്സ നടത്തുന്നത് ജൂബിലി ആണ്. എന്നാൽ ഏറ്റവും നല്ല ചികിത്സ ലഭിക്കുകയും ചെയ്യുന്നു. അപ്പോൾ കോർപറേറ്റ് ആശുപതി വന്നാൽ തൃശൂരിൽ രക്ഷപ്പെടില്ല. അതിനു ജൂബിലി ആശുപത്രി ദുരബലമാകണം. അതിനുള്ള ശ്രമമാണ് ഇപ്പോൾ നടക്കുന്നത്. തൃശൂരിൽ മാത്രമാണ് കോർപറേറ്റ് ആശുപത്രി ഇല്ലാത്തത് . കാരണം ജൂബിലിയുടെ മികവ് തന്നെ (ഇതേ കാര്യം മേജർ ആർച്ച് ബിഷപ്പ് മാർ റാഫേൽ  തട്ടിലും  സൂചിപ്പിക്കുകയുണ്ടായി)

ഈ വർഷാവസാനം തനിക്ക് 75 വയസ് തികയുമെന്നും സ്ഥാനം ഒഴിയാൻ കത്ത് നൽകിക്കഴിഞ്ഞുവെന്നും മാർ താഴത്ത് പറഞ്ഞു. പലർക്കും ഇത് സന്തോഷം ആകട്ടെ എന്ന് കരുതിയാണ് പറയുന്നത്.

ഏറ്റവും മികച്ച മെഡിക്കൽ  കോളജ് ആയി ജൂബിലിയെ തെരെഞ്ഞെടുത്ത കാര്യവും അദ്ദേഹം പങ്കു വച്ചു.
നഴ്‌സുമാരുടെ സമരത്തോട് സഹതാപമേയുള്ളു. അവർ തിരിച്ചു വന്നാൽ ആശുപത്രയുടെ ആവശ്യാനുസരണം  തിരിച്ചെടുക്കും.

മികച്ച ചികിത്സയും നിലവാരമുള്ള മെഡിക്കൽ വിദ്യാഭ്യാസവും കുറഞ്ഞ ചെലവിൽ നൽകുന്നതിനൊപ്പം ജീവനക്കാർക്ക് മാന്യമായ വേതനം ഉറപ്പാക്കുകയെന്നതാണ് ആശുപത്രിയുടെ നയമെന്നും അദ്ദേഹം പറഞ്ഞു.

നഴ്സുമാർ ഉൾപ്പെടെയുള്ള എല്ലാ ജീവനക്കാർക്കും മാന്യമായ വേതനം ലഭിക്കണമെന്ന കാര്യത്തിൽ ആശുപത്രി ഭരണസമിതിക്ക് എതിർപ്പില്ലെന്നും എന്നാൽ വേതനനിർണയം ഓരോ ആശുപത്രിയും പ്രത്യേകം ചെയ്യുന്നതല്ല, സർക്കാർ നിശ്ചയിക്കുന്ന ഏകീകൃത മിനിമം വേതന വ്യവസ്ഥയിലൂടെയാകണമെന്നും മാർ  താഴത്ത് പറഞ്ഞു. സർക്കാർ തീരുമാനിച്ചാൽ അത് അനുസരിക്കും. എന്നാൽ മറ്റു പല ആശുപത്രികളും അതിനെതിരെ കോടതിയിൽ പോകുന്നതാണ് കണ്ടിട്ടുള്ളത്.

ജൂബിലി ആശുപത്രിയിൽ മാത്രം സമരം ശക്തമായി തുടരുകയും മറ്റ് ആശുപത്രികളിൽ സമരങ്ങൾ അവസാനിക്കുകയും ചെയ്ത സാഹചര്യമാണ് സംശയങ്ങൾ ഉയർത്തുന്നതെന്ന് അദ്ദേഹം പറഞ്ഞു. ചില കോർപ്പറേറ്റ് ആശുപത്രികൾക്കും മറ്റ് തൽപരകക്ഷികൾക്കും ജൂബിലി പോലുള്ള മിഷൻ ആശുപത്രികളെ ദുർബലപ്പെടുത്താനുള്ള ലക്ഷ്യമുണ്ട് . ഈ വിഷയത്തിൽ തനിക്ക് ചില സൂചനകൾ ലഭിച്ചിട്ടുണ്ടെന്നും അദ്ദേഹം അവകാശപ്പെട്ടു.

സമരത്തിന്റെ തുടക്കത്തിൽ നഴ്സുമാർക്കെതിരെ കടുത്ത നടപടി സ്വീകരിക്കണമെന്ന ആവശ്യങ്ങൾ ഉയർന്നിരുന്നുവെങ്കിലും അത്തരം നടപടികൾ സ്വീകരിച്ചില്ലെന്നും പ്രശ്നം ചർച്ചയിലൂടെ പരിഹരിക്കാനാണ് ആശുപത്രി ശ്രമിച്ചതെന്നും അദ്ദേഹം പറഞ്ഞു.

സോഷ്യൽ മീഡിയയിലൂടെ ജൂബിലി ആശുപത്രിക്കും സഭയ്ക്കുമെതിരെ ആസൂത്രിതമായ പ്രചാരണം നടക്കുന്നുണ്ടെന്നും സ്ഥാപനങ്ങളെ വിഭജിക്കുകയും ദുർബലപ്പെടുത്തുകയും ചെയ്യാനുള്ള ശ്രമത്തിന്റെ ഭാഗമായാണ് ഇതിനെ കാണുന്നതെന്നും മാർ ആൻഡ്രൂസ് താഴത്ത് പറഞ്ഞു. ഇതിനു പ്രധാന കാരണം  സീറോ മലബാർ സഭയാണ് കേരളത്തിൽ വിദ്യാഭ്യാസ കാര്യത്തിലും മെഡിക്കൽ രംഗത്തും    സുശക്തമായി നിലകൊള്ളുന്നത്. അത് ദുർബലപ്പെടുത്തിയാലേ തങ്ങളുടെ ലക്‌ഷ്യം നടക്കൂ എന്ന അവർക്ക് അറിയാം. അടുത്ത കാലങ്ങളിൽ ഉണ്ടായ വിവിധ പ്രശ്നങ്ങൾ പരിശോധിച്ചാൽ ഇത് മനസിലാകും.

നഴ്സ് സമരം സംബംന്ധിച്ച്  സർക്കാർ തലത്തിലും തൊഴിൽ വകുപ്പ് മുഖേനയും ചർച്ചകൾ തുടരുകയാണ്.

സീറോ മലബാർ കൺവൻഷനിൽ പങ്കെടുക്കുന്ന നഴ്‌സുമാർ മിക്കവരും   സമരക്കാരുടെ കൂടിയാണെന്നും അവരുടെ മനസ് മാറ്റാനുള്ള വിശദീകരണമാണ് വേണ്ടതെന്നും  മാധ്യമപ്രവർത്തകർ  ആർച്ച് ബിഷപ്പിനോട് പറഞ്ഞു.

മാർ താഴത്ത്  പറഞ്ഞത് (വീഡിയോ കാണാം)
ജൂബിലി മിഷൻ ആശുപത്രിയെക്കുറിച്ച് ഒരു കാര്യം ഞാൻ വ്യക്തമായി പറയാൻ ആഗ്രഹിക്കുന്നു. ഏറ്റവും നല്ല ചികിത്സയും മികച്ച മെഡിക്കൽ വിദ്യാഭ്യാസവും ഏറ്റവും കുറഞ്ഞ ചെലവിൽ ജനങ്ങൾക്ക് ലഭ്യമാക്കുക എന്നതാണ് ജൂബിലിയുടെ അടിസ്ഥാന ലക്ഷ്യം. അതോടൊപ്പം ഇവിടെ ജോലി ചെയ്യുന്ന എല്ലാ ജീവനക്കാർക്കും മാന്യമായ വേതനം നൽകണമെന്നും ഞങ്ങൾ വിശ്വസിക്കുന്നു. ഇത് ജൂബിലിയുടെ അടിസ്ഥാന തത്വമാണ്.

ജൂബിലി ആശുപത്രി കേരളത്തിലെ സ്വകാര്യ ആശുപത്രികളിൽ ഏറ്റവും കൂടുതൽ ശമ്പളം നൽകുന്ന സ്ഥാപനങ്ങളിലൊന്നാണെന്ന് ഞാൻ ഉറപ്പിച്ച് പറയുന്നു. ഈ വിഷയത്തിൽ ആർക്കും ഞങ്ങളെ വെല്ലുവിളിക്കാം. സമരം തുടങ്ങിയ ശേഷം പല കോർപ്പറേറ്റ് ആശുപത്രികളും അവരുടെ അടിസ്ഥാന ശമ്പളം വർധിപ്പിക്കേണ്ട സാഹചര്യം വന്നിട്ടുണ്ട്. മുമ്പ് പതിനായിരമോ പന്ത്രണ്ടായിരമോ രൂപയായിരുന്നു ചില ആശുപത്രികളിലെ അടിസ്ഥാന ശമ്പളം. പിന്നീട് അതിൽ വർധന വരുത്തി.

ഞങ്ങളുടെ നിലപാട് വളരെ വ്യക്തമാണ്. ജൂബിലിയിലെ ജീവനക്കാർക്ക് മാന്യമായ ശമ്പളം ലഭിക്കണം. എന്നാൽ അത് ജൂബിലിക്ക് മാത്രമായി ബാധകമായ ഒരു വിഷയമാകരുത്. കേരളത്തിലെ എല്ലാ സ്വകാര്യ ആശുപത്രികളിലെയും ജീവനക്കാർക്കും സർക്കാർ നിശ്ചയിക്കുന്ന മാന്യമായ മിനിമം വേതനം ലഭിക്കണം. ഒരു ആശുപത്രിയെ മാത്രം ലക്ഷ്യമാക്കി സമരം നടത്തുന്നത് ശരിയായ സമീപനമല്ല.

ഡോക്ടർമാരുടെ ശമ്പളത്തെക്കുറിച്ചും പല തെറ്റിദ്ധാരണകൾ പ്രചരിക്കുന്നുണ്ട്. ചില കോർപ്പറേറ്റ് ആശുപത്രികളിൽ ചില ഡോക്ടർമാർക്ക് കൂടുതൽ ശമ്പളം ലഭിക്കാം. എന്നാൽ എല്ലാ ആശുപത്രികളിലും അങ്ങനെ അല്ല. അതിനാൽ ജൂബിലിയെക്കുറിച്ച് തെറ്റായ പ്രചാരണം നടത്തരുത്.

2012-ലും 2013-ലും ജീവനക്കാരുടെ ശമ്പളം വർധിപ്പിച്ചു. 2015-ലും വീണ്ടും വർധന നൽകി. 2021-ൽ മറ്റ് ആശുപത്രികളിൽ സമരങ്ങൾ നടന്ന സമയത്തും ജൂബിലി ശമ്പളവർധന നടപ്പാക്കി. ഏറ്റവും ഒടുവിൽ ഈ വർഷവും വീണ്ടും ശമ്പളം കൂട്ടി. ഏകദേശം 800-ലധികം ജീവനക്കാർക്ക് അതിന്റെ പ്രയോജനം ലഭിച്ചു.

അതുകൊണ്ട് തന്നെ, ജൂബിലി ജീവനക്കാരെ അവഗണിച്ചുവെന്ന ആരോപണം ശരിയല്ല. സാമ്പത്തികമായി കഴിയുന്നത്ര എല്ലാ ഘട്ടങ്ങളിലും മാനേജ്മെന്റ് ശമ്പളവർധന നൽകിയിട്ടുണ്ട്.

പക്ഷേ ഒരു ആശുപത്രിയുടെ സാമ്പത്തിക ശേഷിക്കും പരിധിയുണ്ട്. നൂറ് കുട്ടികളുള്ള   സ്കൂളിലും  ആയിരം കുട്ടികളുള്ള സ്‌കൂളിലും   അധ്യാപക ശമ്പളം തുല്യമാണ്. ഓരോ  ആശുപത്രിക്കും   അതിന്റെ വരുമാനവും രോഗികളുടെ എണ്ണവും കണക്കിലെടുത്താണ് ശമ്പളച്ചെലവ് വഹിക്കാൻ കഴിയുക.

ജൂബിലി ഒരു കോർപ്പറേറ്റ് ആശുപത്രിയല്ല. മിഷൻ ആശുപത്രിയാണ്. ലാഭം ലക്ഷ്യമാക്കി പ്രവർത്തിക്കുന്ന സ്ഥാപനമല്ല ഇത്. രോഗികൾക്ക് കുറഞ്ഞ ചെലവിൽ മികച്ച ചികിത്സ നൽകുകയാണ് ഞങ്ങളുടെ ലക്ഷ്യം. അതിനാൽ സാമ്പത്തിക യാഥാർത്ഥ്യങ്ങൾ കൂടി പരിഗണിച്ചാണ് എല്ലാ തീരുമാനങ്ങളും എടുക്കേണ്ടത്.

എന്നിരുന്നാലും, ജീവനക്കാർക്ക് മാന്യമായ വേതനം ലഭിക്കണമെന്ന കാര്യത്തിൽ ഞങ്ങൾക്ക് യാതൊരു സംശയവുമില്ല. പക്ഷേ ആ വേതനം സർക്കാർ എല്ലാ സ്വകാര്യ ആശുപത്രികൾക്കും ഒരുപോലെ ബാധകമായ രീതിയിൽ നിശ്ചയിക്കണം. ഒരു ആശുപത്രിയെ മാത്രം തിരഞ്ഞെടുത്ത് അതിന്മേൽ സമ്മർദം ചെലുത്തുന്നത് നീതിയല്ല.

ഒരു ചോദ്യം ഞാൻ തുടക്കം മുതൽ ചോദിച്ചുകൊണ്ടിരിക്കുകയാണ്. എന്തുകൊണ്ടാണ് സമരം ജൂബിലി ആശുപത്രിയിൽ മാത്രം കേന്ദ്രീകരിക്കുന്നത്?

അമല ഉൾപ്പെടെയുള്ള മറ്റ് ആശുപത്രികളിലും ശമ്പളവുമായി ബന്ധപ്പെട്ട പ്രശ്നങ്ങൾ ഉണ്ടായിരുന്നു. അവിടെയും ജീവനക്കാർക്ക് കുറഞ്ഞ ശമ്പളമായിരുന്നു ലഭിച്ചിരുന്നത്. എന്നാൽ അവിടെയുള്ള സമരങ്ങൾ അവസാനിച്ചു. ജൂബിലിയിൽ മാത്രം സമരം തുടരുന്നു. അതാണ് എന്നെ ചിന്തിപ്പിച്ചത്.

ഈ സമരം ആരംഭിച്ചശേഷവും ജൂബിലി മാനേജ്മെന്റ് ശമ്പളവർധന നടപ്പാക്കി. അടുത്തിടെ വീണ്ടും ശമ്പളം വർധിപ്പിക്കുകയും നൂറുകണക്കിന് ജീവനക്കാർക്ക് അതിന്റെ പ്രയോജനം ലഭിക്കുകയും ചെയ്തു. എന്നിട്ടും സമരം അവസാനിക്കാത്തത് എന്തുകൊണ്ടാണെന്ന ചോദ്യത്തിന് വ്യക്തമായ മറുപടി ലഭിച്ചിട്ടില്ല.

ഞങ്ങളുടെ നിലപാട് ഒരിക്കലും ജീവനക്കാർക്കെതിരെയല്ല. നഴ്സുമാർ ഉൾപ്പെടെ എല്ലാ ജീവനക്കാർക്കും മാന്യമായ ശമ്പളം ലഭിക്കണം. പക്ഷേ അത് ഒരു ആശുപത്രിയിൽ മാത്രം നടപ്പാക്കേണ്ട കാര്യമല്ല. കേരളത്തിലെ എല്ലാ സ്വകാര്യ ആശുപത്രികൾക്കും ഒരേ മാനദണ്ഡം സർക്കാർ നിശ്ചയിക്കണം.

ഒരു ഘട്ടത്തിൽ ജൂബിലി, അമല തുടങ്ങിയ ആശുപത്രികളുടെ ഡയറക്ടർമാരും സമരനേതാക്കളും ചർച്ചകൾ നടത്തി. ഇടക്കാല ആശ്വാസം വേണമെന്ന ആവശ്യം ഉയർന്നു. എന്നാൽ ബെഡുകളുടെ എണ്ണമോ ആശുപത്രിയുടെ വലിപ്പമോ അടിസ്ഥാനമാക്കി മാത്രം ശമ്പളം നിശ്ചയിക്കണമെന്ന ചില ആവശ്യങ്ങൾ അംഗീകരിക്കാൻ കഴിയില്ലെന്ന് ഞങ്ങൾ വ്യക്തമാക്കി. അത് നീതിപൂർവമായ മാനദണ്ഡമല്ലെന്നാണ് ഞങ്ങളുടെ അഭിപ്രായം.

ജൂബിലിയിൽ എണ്ണൂറിലധികം നഴ്സുമാർ ജോലി ചെയ്യുന്നു. അത്രയും വലിയ ജീവനക്കാരുടെ ശമ്പളബാധ്യത ആശുപത്രിക്കുണ്ട്. അതിനനുസരിച്ചാണ് സാമ്പത്തിക ക്രമീകരണങ്ങൾ നടത്തേണ്ടത്.

കേരള ഹോസ്പിറ്റൽ അസോസിയേഷനിലെ വിവിധ ആശുപത്രികൾ ഈ വിഷയത്തിൽ ഒന്നിച്ചുനിന്ന് സർക്കാരുമായി ചർച്ച നടത്തണമെന്ന ആശയവും ഉയർന്നിരുന്നു. ഒരു ആശുപത്രിയെ മാത്രം ലക്ഷ്യമാക്കി സമരം നടത്തുന്നതിനേക്കാൾ എല്ലാ സ്വകാര്യ ആശുപത്രികൾക്കും ഒരുപോലെ ബാധകമായ മിനിമം വേതനം സർക്കാർ പ്രഖ്യാപിക്കണമെന്ന നിലപാടാണ് ഞങ്ങൾ സ്വീകരിച്ചത്.

ജൂബിലിയിൽ നൽകുന്ന ശമ്പളത്തിന്റെ കാര്യത്തിൽ തെറ്റായ വിവരങ്ങളാണ് പലപ്പോഴും പ്രചരിക്കുന്നത്. എല്ലാ ശമ്പളവും നിയമാനുസൃതമായി ബാങ്ക് അക്കൗണ്ടുകളിലൂടെയാണ് നൽകുന്നത്. ലേബർ ഓഫീസിന്റെ പരിശോധനകളിലും ആവശ്യമായ രേഖകൾ സമർപ്പിച്ചിട്ടുണ്ട്. പുറത്തുവന്ന ചില വിവരങ്ങൾ യാഥാർഥ്യവുമായി പൊരുത്തപ്പെടുന്നില്ലെന്ന് പരിശോധനകളിൽ വ്യക്തമായിട്ടുണ്ട്.

ഒരു കാര്യം ഞാൻ വീണ്ടും ആവർത്തിക്കുന്നു. കേരളത്തിൽ ഏറ്റവും കുറഞ്ഞ ചികിത്സാച്ചെലവിൽ മികച്ച ചികിത്സ നൽകുകയും ജീവനക്കാർക്ക് താരതമ്യേന മികച്ച ശമ്പളം നൽകുകയും ചെയ്യുന്ന ഒരു മിഷൻ ആശുപത്രിയെയാണ് ഇത്ര ശക്തമായി ലക്ഷ്യമിടുന്നത്. അതുകൊണ്ടാണ് ഈ സമരത്തിന് പിന്നിൽ മറ്റെന്തെങ്കിലും ലക്ഷ്യങ്ങളുണ്ടോ എന്ന സംശയം എനിക്ക് തോന്നുന്നത്.

ഇത് വെറും ശമ്പളപ്രശ്നം മാത്രമാണോ, അതോ ഇതിന് പിന്നിൽ മറ്റ് താൽപര്യങ്ങളും പ്രവർത്തിക്കുന്നുണ്ടോ എന്നത് സമൂഹം ചിന്തിക്കേണ്ട വിഷയമാണെന്നും ഞാൻ വിശ്വസിക്കുന്നു.

ഈ സമരത്തെ ഞാൻ ഒരു തൊഴിൽപ്രശ്നം മാത്രമായി കാണുന്നില്ല. ഇതിന് പിന്നിൽ മറ്റുചില ലക്ഷ്യങ്ങൾ പ്രവർത്തിക്കുന്നുണ്ടെന്ന സംശയം എനിക്കുണ്ട്. ഈ സംശയം ഞാൻ വെറുതെ പറയുന്നതല്ല. വിവിധ തലങ്ങളിൽ നിന്നുള്ള വിവരങ്ങളുടെ അടിസ്ഥാനത്തിലാണ് ഞാൻ ഇങ്ങനെ പറയുന്നത്.

ചില കോർപ്പറേറ്റ് ആശുപത്രികൾക്ക് ജൂബിലി പോലുള്ള മിഷൻ ആശുപത്രികളുടെ വളർച്ച വെല്ലുവിളിയാണ്. കുറഞ്ഞ ചെലവിൽ മികച്ച ചികിത്സയും മികച്ച ഡോക്ടർമാരെയും ജീവനക്കാരെയും നിലനിർത്താൻ കഴിയുന്ന ഒരു സ്ഥാപനം സ്വാഭാവികമായും മറ്റുള്ളവർക്ക് മത്സരമാകും. അതിനാൽ ജൂബിലിയുടെ പ്രതിച്ഛായ തകർക്കാനുള്ള ശ്രമങ്ങൾ നടക്കുന്നതായി എനിക്ക് തോന്നുന്നു.

സമരം തുടങ്ങിയ സമയത്ത് ചിലർ നഴ്സുമാർക്കെതിരെ ശക്തമായ പോലീസ് നടപടി സ്വീകരിക്കണമെന്നും അറസ്റ്റ് ചെയ്യണമെന്നും ചിലർ  ആവശ്യപ്പെട്ടു. എന്നാൽ ഞാൻ അതിന് സമ്മതിച്ചില്ല. ഈ കുട്ടികൾക്ക് നീതി ലഭിക്കണം എന്ന നിലപാടാണ് ഞാൻ സ്വീകരിച്ചത്. ബലപ്രയോഗത്തിലൂടെയോ അറസ്റ്റ് ചെയ്തോ പ്രശ്നം പരിഹരിക്കാൻ കഴിയില്ലെന്ന് ഞാൻ വിശ്വസിച്ചു.

എനിക്ക് ലഭിച്ച ചില വിവരങ്ങൾ പ്രകാരം, സമരം മറ്റൊരു രീതിയിലേക്ക് മാറ്റാനും സംഘർഷാവസ്ഥ സൃഷ്ടിക്കാനുമുള്ള ശ്രമങ്ങൾ നടന്നിരുന്നു. അങ്ങനെ സംഭവിച്ചിരുന്നുവെങ്കിൽ വാർത്തകളുടെ ശ്രദ്ധ മുഴുവൻ മറ്റൊരു വിഷയത്തിലേക്ക് മാറുമായിരുന്നു. എന്നാൽ ആ സാഹചര്യം ഉണ്ടാകാതിരുന്നതിൽ എനിക്ക് സന്തോഷമുണ്ട്.

സോഷ്യൽ മീഡിയയിലും ആസൂത്രിതമായ പ്രചാരണം നടന്നുവെന്നാണ് എന്റെ വിലയിരുത്തൽ. ജൂബിലി ആശുപത്രിയെയും എന്നെയും ലക്ഷ്യമാക്കി നിരവധി പോസ്റ്റുകളും വീഡിയോകളും പ്രചരിപ്പിക്കപ്പെട്ടു. അവയിൽ പലതും യാഥാർഥ്യത്തെ വളച്ചൊടിക്കുന്നതായിരുന്നു.

സോഷ്യൽ മീഡിയയിൽ സജീവമായ ചില അക്കൗണ്ടുകൾ പ്രത്യേകം ഒരു ലക്ഷ്യത്തോടെയാണ് പ്രവർത്തിക്കുന്നതെന്ന സംശയവും എനിക്കുണ്ട്. ആശുപത്രിയുടെ യഥാർഥ പ്രവർത്തനങ്ങളോ ജീവനക്കാർക്ക് നൽകിയ ആനുകൂല്യങ്ങളോ അവതരിപ്പിക്കുന്നതിന് പകരം, പ്രതികൂലമായ കാര്യങ്ങൾ മാത്രം ഉയർത്തിക്കാട്ടുന്ന സമീപനമാണ് പലപ്പോഴും കണ്ടത്.

ഈ പ്രചാരണത്തിന്റെ ലക്ഷ്യം ഒരു ആശുപത്രിയെ മാത്രം വിമർശിക്കുക എന്നതല്ലെന്നും ഞാൻ കരുതുന്നു. കേരളത്തിൽ വിദ്യാഭ്യാസം, ആരോഗ്യരംഗം, സാമൂഹിക സേവനം തുടങ്ങിയ മേഖലകളിൽ സഭ നടത്തുന്ന സ്ഥാപനങ്ങളുടെ വിശ്വാസ്യത തകർക്കുക എന്ന വലിയ അജണ്ടയുടെ ഭാഗമായാണ് ഇത്തരം നീക്കങ്ങളെ ഞാൻ കാണുന്നത്.

സമൂഹത്തിൽ വലിയ സ്വാധീനമുള്ള സ്ഥാപനങ്ങളെ ആദ്യം ലക്ഷ്യമിടുകയും അവയെ പരസ്പരം വിഭജിക്കുകയും ദുർബലപ്പെടുത്തുകയും ചെയ്യുക എന്നത് പല പ്രസ്ഥാനങ്ങളും സ്വീകരിക്കുന്ന ഒരു തന്ത്രമാണെന്നാണ് എന്റെ വിലയിരുത്തൽ. അതിന്റെ ഭാഗമായാണ് ജൂബിലി ആശുപത്രിയെയും ലക്ഷ്യമിടുന്നതെന്ന സംശയം എനിക്കുണ്ട്.

എന്നാൽ ഇതെല്ലാം ഉണ്ടായാലും ഞങ്ങളുടെ നിലപാട് മാറുന്നില്ല. ഞങ്ങൾ ആരോടും ശത്രുത പുലർത്തുന്നില്ല. ജീവനക്കാർക്ക് നീതി ലഭിക്കണം. രോഗികൾക്ക് മികച്ച ചികിത്സ ലഭിക്കണം. ആശുപത്രിയുടെ സേവനമികവ് നിലനിർത്തണം. അതോടൊപ്പം സത്യാവസ്ഥ സമൂഹത്തിന്റെ മുന്നിലെത്തണമെന്നും ഞാൻ ആഗ്രഹിക്കുന്നു.

ഞാൻ വീണ്ടും ആവർത്തിക്കുകയാണ്. നഴ്സുമാർക്കും ആശുപത്രിയിലെ എല്ലാ ജീവനക്കാർക്കും മാന്യമായ വേതനം ലഭിക്കണം. അതിൽ ഞങ്ങൾക്ക് യാതൊരു അഭിപ്രായവ്യത്യാസവുമില്ല. എന്നാൽ ആ വേതനം ഒരു ആശുപത്രിയെ മാത്രം ലക്ഷ്യമിട്ട് നിശ്ചയിക്കേണ്ടതല്ല. കേരളത്തിലെ എല്ലാ സ്വകാര്യ ആശുപത്രികൾക്കും ഒരുപോലെ ബാധകമായ മിനിമം വേതനം സർക്കാർ നിശ്ചയിക്കണം. അതാണ് നീതിയുള്ള മാർഗം.

ജൂബിലി ആശുപത്രി മാത്രം ശമ്പളം വർധിപ്പിച്ചാൽ പ്രശ്നം പരിഹരിക്കില്ല. മറ്റ് ആശുപത്രികളിലെ ജീവനക്കാർക്കും അതേ അവകാശമുണ്ട്. അതുകൊണ്ടാണ് എല്ലാ ആശുപത്രികളെയും ഉൾപ്പെടുത്തി സർക്കാർ തലത്തിൽ തീരുമാനമെടുക്കണമെന്ന നിലപാട് ഞങ്ങൾ സ്വീകരിച്ചത്.

കത്തോലിക്കാ സഭയുടെ ആശുപത്രികൾ വർഷങ്ങളായി ജാതി, മത, സമുദായ വ്യത്യാസമില്ലാതെ എല്ലാവരെയും ജോലിയിൽ നിയമിക്കുകയും സേവനം നൽകുകയും ചെയ്യുന്ന സ്ഥാപനങ്ങളാണ്. അതാണ് ഞങ്ങളുടെ പാരമ്പര്യം. അതിൽ ഒരു മാറ്റവും ഉണ്ടായിട്ടില്ല.

ഈ സമരത്തിനിടെ പല നഴ്സുമാരും ജൂബിലി വിട്ടുപോകുമെന്നായിരുന്നു ചിലരുടെ പ്രതീക്ഷ. എന്നാൽ യാഥാർഥ്യം അതിന് വിരുദ്ധമാണ്. മറ്റ് ആശുപത്രികളിൽ നിന്ന് നിരവധി നഴ്സുമാർ ജൂബിലിയിലേക്ക് ജോലിക്കായി എത്തുന്നുണ്ട്. അതാണ് ഇവിടെ ജോലി ചെയ്യാനുള്ള താൽപര്യം ഇപ്പോഴും നിലനിൽക്കുന്നുവെന്ന് കാണിക്കുന്നത്.

ജൂബിലി ആശുപത്രിയുടെ പ്രവർത്തനം ഒരു ഘട്ടത്തിലും നിലച്ചിട്ടില്ല. രോഗികൾക്ക് ചികിത്സയും മെഡിക്കൽ സേവനങ്ങളും പതിവുപോലെ തുടരുകയാണ്. ആശുപത്രിയുടെ സേവന നിലവാരത്തിൽ കുറവ് വരാതിരിക്കാനാണ് എല്ലാ വിഭാഗങ്ങളും ഒരുമിച്ച് പ്രവർത്തിച്ചത്.

ഈ വിഷയത്തിൽ സോഷ്യൽ മീഡിയയിൽ പ്രചരിച്ച പല വിവരങ്ങളും യാഥാർഥ്യവുമായി പൊരുത്തപ്പെടുന്നില്ലെന്നാണ് എന്റെ അഭിപ്രായം. ചില കാര്യങ്ങൾ ആസൂത്രിതമായി പ്രചരിപ്പിക്കപ്പെട്ടുവെന്ന സംശയവും എനിക്കുണ്ട്. അതിന്റെ പിന്നിൽ ആരാണെന്നത് അന്വേഷിക്കപ്പെടേണ്ട വിഷയമാണ്.

കേരളത്തിൽ സഭയുടെ സ്ഥാപനങ്ങളെ ദുർബലപ്പെടുത്താൻ ശ്രമിക്കുന്ന ചില ശക്തികൾ ഉണ്ടെന്ന ആശങ്ക എനിക്ക് മുമ്പേ ഉണ്ടായിരുന്നു. വിദ്യാഭ്യാസ സ്ഥാപനങ്ങളിലും മറ്റ് മേഖലകളിലും ഉണ്ടായ ചില സംഭവങ്ങളെപ്പോലെ തന്നെ, ആശുപത്രികളെയും ലക്ഷ്യമിട്ട് സ്ഥാപനങ്ങളെ വിഭജിക്കാനുള്ള ശ്രമങ്ങൾ നടക്കുന്നതായി ഞാൻ കാണുന്നു. അതിന്റെ ഭാഗമായാണ് ജൂബിലി ആശുപത്രിയെയും തിരഞ്ഞെടുത്തതെന്ന സംശയം എനിക്കുണ്ട്.

എന്നിരുന്നാലും, ഞങ്ങളുടെ മറുപടി ഏറ്റുമുട്ടലല്ല. കൂടുതൽ സുതാര്യതയോടെയും കൂടുതൽ ആത്മവിശ്വാസത്തോടെയും സേവനം തുടരുകയാണ് ഞങ്ങളുടെ ലക്ഷ്യം. ജീവനക്കാർക്കും രോഗികൾക്കും സമൂഹത്തിനും നീതി ലഭിക്കണം എന്നതാണ് ഞങ്ങളുടെ നിലപാട്.

സത്യം ഒടുവിൽ വിജയിക്കുമെന്ന വിശ്വാസമുണ്ട്. ജൂബിലി ആശുപത്രി ആരോഗ്യസേവനത്തിലും മെഡിക്കൽ വിദ്യാഭ്യാസത്തിലും സാമൂഹിക പ്രതിബദ്ധതയിലും തന്റെ ദൗത്യം തുടർന്നുകൊണ്ടിരിക്കും. ശമ്പള വിഷയത്തിലും സർക്കാർ നിശ്ചയിക്കുന്ന നീതിയുക്തമായ ഏകീകൃത മാനദണ്ഡം എല്ലാ സ്വകാര്യ ആശുപത്രികൾക്കും ബാധകമാകണമെന്ന ആവശ്യം ഞങ്ങൾ വീണ്ടും ഉന്നയിക്കുന്നു.