കാലിഫോർണിയ: കുടുംബസമേതം സഞ്ചരിച്ചിരുന്ന ടെസ്ല കാർ മനഃപൂർവം കൊക്കയിലേക്ക് ഓടിച്ചെന്ന ആരോപണത്തിൽ ദേശീയ ശ്രദ്ധ നേടിയ കേസിൽ, ഇന്ത്യൻ വംശജനായ റേഡിയോളജിസ്റ്റ് ഡോ. ധർമേഷ് പട്ടേലിനെതിരായ കൊലപാതകശ്രമക്കുറ്റങ്ങൾ കാലിഫോർണിയ കോടതി തള്ളി. കോടതി നിർദേശിച്ച രണ്ട് വർഷത്തെ മാനസികാരോഗ്യ ചികിത്സാ (Mental Health Diversion) പദ്ധതി വിജയകരമായി പൂർത്തിയാക്കിയതിനെ തുടർന്നാണ് കേസ് അവസാനിപ്പിച്ചത്.
 

2023 ജനുവരിയിൽ കാലിഫോർണിയയിലെ ഡെവിൾസ് സ്ലൈഡ് (Devil's Slide) പ്രദേശത്ത് പസഡീന സ്വദേശിയായ 45-കാരനായ പട്ടേൽ ഓടിച്ചിരുന്ന ടെസ്ല കാർ ഏകദേശം 250 അടി താഴ്ചയിലേക്ക് പതിക്കുകയായിരുന്നു. വാഹനത്തിലുണ്ടായിരുന്ന ഭാര്യ നെഹ പട്ടേലും ദമ്പതികളുടെ രണ്ട് ചെറിയ കുട്ടികളും അത്ഭുതകരമായി രക്ഷപ്പെട്ടു.

ഭാര്യയെയും രണ്ട് മക്കളെയും തന്നെയും മനഃപൂർവം കൊല്ലാൻ ശ്രമിച്ചെന്നാരോപിച്ച് പട്ടേലിനെതിരെ മൂന്ന് കൊലപാതകശ്രമക്കുറ്റങ്ങളാണ് ചുമത്തിയിരുന്നത്. എന്നാൽ 2024 ഓഗസ്റ്റിൽ സാൻ മാറ്റിയോ കൗണ്ടി കോടതി അദ്ദേഹത്തെ കാലിഫോർണിയയുടെ മാനസികാരോഗ്യ ഡൈവർഷൻ പദ്ധതിയിൽ ഉൾപ്പെടുത്താൻ അനുമതി നൽകി. ഇതിന്റെ ഭാഗമായി മാനസികാരോഗ്യ ചികിത്സയും കുടുംബ കൗൺസിലിംഗും സ്വീകരിച്ച അദ്ദേഹം, കോടതിക്ക് സ്ഥിരമായി പുരോഗതി റിപ്പോർട്ടുകളും സമർപ്പിച്ചിരുന്നു.

രണ്ട് വർഷത്തെ ചികിത്സ വിജയകരമായി പൂർത്തിയാക്കിയതിനെ തുടർന്ന് സാൻ മാറ്റിയോ കൗണ്ടി സുപീരിയർ കോടതി ഈ ആഴ്ച കേസ് തള്ളുകയായിരുന്നു. കേസ് അതീവ ഗുരുതരമാണെന്നും ഡൈവർഷൻ അനുവദിക്കരുതെന്നും പ്രോസിക്യൂഷൻ ശക്തമായി എതിർത്തിരുന്നെങ്കിലും, കോടതി നിശ്ചയിച്ച എല്ലാ വ്യവസ്ഥകളും പാലിച്ചതിനാൽ നിയമപരമായി കേസ് അവസാനിപ്പിക്കേണ്ടിവന്നതായി ജില്ലാ അറ്റോർണി ഓഫീസ് അറിയിച്ചു.

അപകടസമയത്ത് പട്ടേൽ ഗുരുതര വിഷാദരോഗത്തെ തുടർന്നുണ്ടായ മാനസിക വിഭ്രാന്തി (psychotic episode) അനുഭവിച്ചിരുന്നുവെന്ന് വിചാരണക്കിടെ നിരവധി മനഃശാസ്ത്ര വിദഗ്ധർ കോടതിയിൽ സാക്ഷ്യപ്പെടുത്തിയിരുന്നു. തന്റെ കുട്ടികൾ ഭാവിയിൽ മനുഷ്യക്കടത്തിന്റെയും ലൈംഗിക ചൂഷണത്തിന്റെയും ഇരകളാകുമെന്ന ഭയം അദ്ദേഹത്തിനുണ്ടായിരുന്നുവെന്നും കോടതിയിൽ വ്യക്തമാക്കിയിരുന്നു.

അപകടത്തിന് പിന്നാലെ രക്ഷാപ്രവർത്തകരോട്, ഭർത്താവ് മനഃപൂർവമാണ് വാഹനം കൊക്കയിലേക്ക് ഓടിച്ചതെന്ന് ഭാര്യ പറഞ്ഞതായി അന്വേഷണ ഉദ്യോഗസ്ഥർ വെളിപ്പെടുത്തിയിരുന്നു.

സംഭവത്തിന് മുമ്പ് മിഷൻ ഹിൽസിലെ പ്രൊവിഡൻസ് ഹോളി ക്രോസ് മെഡിക്കൽ സെന്ററിൽ റേഡിയോളജിസ്റ്റായി ജോലി ചെയ്തിരുന്ന പട്ടേലിന്, കേസ് നിലനിൽക്കുന്നതിനിടെ കാലിഫോർണിയ മെഡിക്കൽ ബോർഡ് വൈദ്യവൃത്തി ചെയ്യുന്നതിന് വിലക്ക് ഏർപ്പെടുത്തിയിരുന്നു. പിന്നീട് അദ്ദേഹം മെഡിക്കൽ ലൈസൻസ് സ്വമേധയാ സമർപ്പിക്കുകയും ചെയ്തു. കേസിലെ കുറ്റങ്ങൾ തള്ളിയതോടെ ലൈസൻസ് പുനഃസ്ഥാപിക്കുമോയെന്ന കാര്യത്തിൽ മെഡിക്കൽ ബോർഡ് ഇതുവരെ നിലപാട് വ്യക്തമാക്കിയിട്ടില്ല.

മാനസിക അസ്വാസ്ഥ്യം കുറ്റകൃത്യത്തിന് കാരണമായതായി കണ്ടെത്തുന്ന പ്രതികൾക്ക് ചികിത്സയ്ക്ക് അവസരം നൽകുന്നതിനായി കാലിഫോർണിയ 2018-ലാണ് മാനസികാരോഗ്യ ഡൈവർഷൻ പദ്ധതി ആരംഭിച്ചത്. പൊതുസുരക്ഷയ്ക്ക് ഭീഷണിയാണെന്ന് വിലയിരുത്തുന്ന കേസുകളിൽ ഇത്തരം ആനുകൂല്യം നിഷേധിക്കാൻ ജഡ്ജിമാർക്ക് കൂടുതൽ അധികാരം നൽകുന്ന നിയമഭേദഗതിയിൽ കഴിഞ്ഞ ആഴ്ച ഗവർണർ ഗവിൻ ന്യൂസോം ഒപ്പുവെച്ചിരുന്നു.

അപകടത്തിൽ ആരെങ്കിലും മരിച്ചിരുന്നുവെങ്കിൽ ഒന്നാംനിര കൊലപാതകക്കുറ്റത്തിന് 25 വർഷം മുതൽ ജീവപര്യന്തം വരെ ശിക്ഷ ലഭിക്കുമായിരുന്ന കേസാണ്, കോടതി നിർദേശിച്ച ചികിത്സാപദ്ധതി പൂർത്തിയാക്കിയതിനെ തുടർന്ന് ക്രിമിനൽ ശിക്ഷയില്ലാതെ അവസാനിച്ചിരിക്കുന്നത്.