ഫ്രെമോണ്ട് (കാലിഫോർണിയ): അമേരിക്കയുടെ 250-ാം സ്വാതന്ത്ര്യ വാർഷികാഘോഷങ്ങളുടെ ഭാഗമായി കാലിഫോർണിയയിലെ ഫ്രെമോണ്ട് നഗരത്തിൽ നടന്ന ജൂലൈ 4 സ്വാതന്ത്ര്യദിന പരേഡിൽ ഇന്ത്യൻ-അമേരിക്കൻ സംഘടനകൾ അവതരിപ്പിച്ച ഫ്ലോട്ട് 'ബെസ്റ്റ് ഫ്ലോട്ട് അവാർഡ്' നേടി.
 

ഫെസ്റ്റിവൽ ഓഫ് ഗ്ലോബ് (എഫ്ഒജി), ഫെഡറേഷൻ ഓഫ് ഇൻഡോ-അമേരിക്കൻസ് (എഫ്ഐഎ), ഫ്രെമോണ്ട് ഹിന്ദു ടെംപിൾ ആൻഡ് കൾച്ചറൽ സെന്റർ എന്നീ സംഘടനകളുടെ സംയുക്ത ഫ്ലോട്ടിനാണ് ഈ ബഹുമതി ലഭിച്ചത്. സൃഷ്ടിപരമായ അവതരണം, മികച്ച അലങ്കാരം, സമൂഹത്തിന്റെ സജീവ പങ്കാളിത്തം എന്നിവ പരിഗണിച്ചാണ് നഗരസഭയുടെ അംഗീകാരം ലഭിച്ചത്.

ആയിരക്കണക്കിന് ആളുകൾ പങ്കെടുത്ത പരേഡിൽ അമേരിക്കൻ സ്വാതന്ത്ര്യം, ജനാധിപത്യം, അവസരസമത്വം, ഐക്യം, അമേരിക്കൻ ഡ്രീം എന്നീ ആശയങ്ങളോടൊപ്പം ഇന്ത്യൻ-അമേരിക്കൻ, ഹിന്ദു-അമേരിക്കൻ സമൂഹങ്ങൾ അമേരിക്കയുടെ വളർച്ചയ്ക്ക് നൽകിയ സംഭാവനകളും ഫ്ലോട്ടിലൂടെ അവതരിപ്പിച്ചു.

ഈ പുരസ്കാരം നൂറുകണക്കിന് സന്നദ്ധപ്രവർത്തകരുടെ അർപ്പണബോധത്തിന്റെയും സമൂഹസേവനത്തിന്റെയും സാംസ്കാരിക പൈതൃക സംരക്ഷണത്തിന്റെയും പൗരപങ്കാളിത്തത്തിന്റെയും അംഗീകാരമാണെന്ന് സംഘാടകർ അറിയിച്ചു. അമേരിക്കയും ഇന്ത്യയും പങ്കിടുന്ന ജനാധിപത്യ മൂല്യങ്ങളുടെയും സ്വാതന്ത്ര്യത്തിന്റെയും വൈവിധ്യത്തിന്റെയും പ്രതീകമായാണ് പരേഡിലെ പങ്കാളിത്തത്തെ അവർ വിശേഷിപ്പിച്ചത്.

പുരസ്കാരജേതാവായ ഫ്ലോട്ടിന്റെ രൂപകൽപ്പനയ്ക്കും ഏകോപനത്തിനും നേതൃത്വം നൽകിയ പരേഡ് ചെയർമാൻ കെ. പി. മഹേശ്വരി, റിതു മഹേശ്വരി, സന്നദ്ധപ്രവർത്തക സംഘം എന്നിവരെയും സംഘാടകർ അഭിനന്ദിച്ചു.

കൂടാതെ ഡോ. രോമേഷ് കെ. ജപ്രയുടെ നേതൃത്വവും സമൂഹസേവനത്തിനും സന്നദ്ധപ്രവർത്തനത്തിനും നൽകിയ സംഭാവനകളും പ്രത്യേകം ആദരിക്കപ്പെട്ടു. അദ്ദേഹം എഫ്ഒജി, അമേരിക്കൻസ്4ഹിന്ദുസ് , ബ്രിന്റൺസ്‌4ഹിന്ദുസ്, ഫ്രെമോണ്ട് ഹിന്ദു ടെമ്പിൾ & കൾച്ചറൽ സെന്റർ എന്നീ സംഘടനകളുടെ സ്ഥാപകനും ചെയർമാനുമാണ്.

പരേഡിന് പിന്നാലെ, ഓഗസ്റ്റ് 16-ന് ഫ്രെമോണ്ടിൽ നടക്കുന്ന 34-ാമത് എഫ്ഒജി  ഇന്ത്യ ഡേ പരേഡ് ആൻഡ് ഫെസ്റ്റിവലിനുള്ള ഒരുക്കങ്ങൾ പുരോഗമിക്കുന്നതായി സംഘാടകർ അറിയിച്ചു. രാവിലെ 11 മുതൽ ഉച്ചയ്ക്ക് 1 വരെ ഫ്രെമോണ്ട് സിറ്റി ഹാളിന് സമീപമുള്ള ക്യാപിറ്റൽ അവന്യൂവിൽ നടക്കുന്ന പരേഡിൽ വടക്കൻ കാലിഫോർണിയയുടെ വിവിധ ഭാഗങ്ങളിൽ നിന്നുള്ള ആയിരക്കണക്കിന് ആളുകൾ പങ്കെടുക്കുമെന്നാണ് പ്രതീക്ഷ. അമേരിക്കയുടെ 250-ാം സ്വാതന്ത്ര്യ വാർഷികവും ഇന്ത്യയുടെ 80-ാം സ്വാതന്ത്ര്യ വാർഷികവും ഒരുമിച്ച് ആഘോഷിക്കുന്ന പ്രത്യേക പരിപാടിയായിരിക്കും ഇത്.

പരിപാടിയുടെ വിജയത്തിനായി സന്നദ്ധപ്രവർത്തകരെ സ്വാഗതം ചെയ്ത സംഘാടകർ, എല്ലാ ചൊവ്വാഴ്ചയും വൈകുന്നേരം ഫ്രെമോണ്ട് ഹിന്ദു ടെംപിളിൽ ആസൂത്രണ യോഗങ്ങൾ നടക്കുന്നതായും അറിയിച്ചു.