ന്യൂഡൽഹി: 2008-ലെ അഹമ്മദാബാദ് സ്‌ഫോടനപരമ്പരക്കേസിലെ 38 പ്രതികളുടെ വധശിക്ഷ ഗുജറാത്ത് ഹൈക്കോടതി ശരിവെച്ചു. വധശിക്ഷയ്ക്ക് വിധിക്കപ്പെട്ടവരിൽ മൂന്ന് മലയാളികളും ഉൾപ്പെടുന്നു. കൊലപാതകം, ഗൂഢാലോചന, രാജ്യത്തിനെതിരെ യുദ്ധം പ്രഖ്യാപിക്കൽ, രാജ്യദ്രോഹം, ഭീകരവാദ പ്രവർത്തനങ്ങളിൽ പങ്കാളിയാകൽ തുടങ്ങിയ ഗുരുതരമായ കുറ്റങ്ങളാണ് പ്രതികൾക്കെതിരെ ചുമത്തിയിരുന്നത്. കേസിൽ 11 പേർക്ക് വിചാരണക്കോടതി നൽകിയ ജീവപര്യന്തം തടവുശിക്ഷയും ഹൈക്കോടതി ശരിവെച്ചിട്ടുണ്ട്. ജീവപര്യന്തം ശിക്ഷിക്കപ്പെട്ടവരിൽ ഒരു മലയാളിയും ഉൾപ്പെടുന്നു.

​കോട്ടയം ഈരാറ്റുപേട്ട സ്വദേശികളായ സഹോദരങ്ങൾ ഷിബിലി (47), ഷാദുലി (45) എന്നിവർക്കും മലപ്പുറം സ്വദേശി ഷറഫുദ്ദീനു (43) മാണ് കോടതി വധശിക്ഷ സ്ഥിരീകരിച്ചത്. ആലുവ കുഞ്ഞനിക്കര സ്വദേശി മുഹമ്മദ് അൻസാറാണ് (45) ജീവപര്യന്തം തടവിന് ശിക്ഷിക്കപ്പെട്ട മലയാളി. 2008 ജൂലൈ 25-ന് അഹമ്മദാബാദ് നഗരത്തിലെ ആശുപത്രികൾ ഉൾപ്പെടെയുള്ള വിവിധയിടങ്ങളിൽ ഉണ്ടായ 22 ഓളം സ്‌ഫോടനങ്ങളിൽ 56 പേർ കൊല്ലപ്പെടുകയും 246-ലധികം പേർക്ക് പരിക്കേൽക്കുകയും ചെയ്തിരുന്നു. ഗുജറാത്ത് കലാപത്തിന് പ്രതികാരമായി നിരോധിത സംഘടനയായ സിമിയുടെ (SIMI) പിന്തുണയോടെ ഇന്ത്യൻ മുജാഹിദ്ദീൻ നടത്തിയ ഭീകരാക്രമണമായിരുന്നു ഇതെന്നാണ് കണ്ടെത്തൽ.

​കേസിലേക്ക് നയിച്ച പ്രധാന ഗൂഢാലോചനകളിൽ ഒന്ന് 2007-ൽ കേരളത്തിലെ വാഗമണ്ണിൽ വെച്ചാണ് നടന്നതെന്ന് അന്വേഷണസംഘം കണ്ടെത്തിയിരുന്നു. നീണ്ട വിചാരണയ്ക്കൊടുവിൽ 2022 ഫെബ്രുവരി 18-നാണ് അഹമ്മദാബാദിലെ പ്രത്യേക വിചാരണക്കോടതി 38 പേർക്ക് വധശിക്ഷയും 11 പേർക്ക് ജീവപര്യന്തവും വിധിച്ചത്. അപൂർവങ്ങളിൽ അപൂർവമായ ഈ കേസിൽ വിചാരണക്കോടതിയുടെ വിധി പൂർണ്ണമായും ശരിവെക്കുന്ന നിലപാടാണ് ഇപ്പോൾ ഹൈക്കോടതിയും സ്വീകരിച്ചിരിക്കുന്നത്. അതേസമയം, ഹൈക്കോടതി വിധിക്കെതിരെ ഉടൻ തന്നെ സുപ്രീംകോടതിയിൽ അപ്പീൽ നൽകുമെന്ന് പ്രതിഭാഗം അഭിഭാഷകർ വ്യക്തമാക്കി.