മോഹൻലാൽ, പ്രഭാസ്, അക്ഷയ് കുമാർ തുടങ്ങി ഇന്ത്യൻ സിനിമയിലെ വൻ താരനിര അണിനിരന്ന് വലിയ പ്രതീക്ഷകളോടെ തിയേറ്ററുകളിലെത്തിയ വിഷ്ണു മഞ്ചു ചിത്രം ‘കണ്ണപ്പ’ ഒടുവിൽ യൂട്യൂബിൽ സ്ട്രീമിംഗ് ആരംഭിച്ചു. ഏകദേശം 200 കോടി രൂപയുടെ ഭീമമായ ബജറ്റിൽ ഒരുങ്ങിയ ചിത്രത്തിന് തിയേറ്ററുകളിൽ നിന്ന് വെറും 46 കോടി രൂപ മാത്രമാണ് നേടാനായത്. 

ബോക്സ് ഓഫീസിൽ നേരിട്ട ഈ കടുത്ത പരാജയത്തിന് പിന്നാലെയാണ് ഇപ്പോൾ സിനിമ ഔദ്യോഗികമായി യൂട്യൂബിൽ എത്തിയിരിക്കുന്നത്. മലയാളം, തെലുങ്ക്, തമിഴ്, കന്നഡ എന്നീ നാല് പ്രധാന ദക്ഷിണേന്ത്യൻ ഭാഷകളിലാണ് ചിത്രം ലൈവ് സ്ട്രീമിംഗ് ആരംഭിച്ചിരിക്കുന്നത്.

ഇന്ത്യൻ പുരാണങ്ങളുടെ പശ്ചാത്തലത്തിൽ, ശിവനോടുള്ള അചഞ്ചലമായ ഭക്തിയുമായി ജീവിക്കുന്ന ഒരു ശിവഭക്തന്റെ അതിശയിപ്പിക്കുന്ന കഥയാണ് ചിത്രം പറയുന്നത്. ഇതിൽ ‘കിരാതൻ’ എന്ന അതിശക്തമായ കഥാപാത്രമായാണ് ലാലേട്ടൻ പ്രത്യക്ഷപ്പെടുന്നത്. മുകേഷ് കുമാർ സിങ് സംവിധാനം ചെയ്ത ചിത്രത്തിൽ മോഹൻ ബാബു, ശരത്കുമാർ, കാജൽ അഗർവാൾ, മധുബാല, ബ്രഹ്മാനന്ദൻ തുടങ്ങിയ പ്രമുഖരും പ്രധാന വേഷങ്ങളിൽ എത്തുന്നുണ്ട്. ആശിർവാദ് സിനിമാസ് കേരളത്തിൽ വിതരണത്തിന് എത്തിച്ച ഈ ചിത്രത്തിന്റെ അതിമനോഹരമായ ദൃശ്യങ്ങൾ ഒരുക്കിയത് ഹോളിവുഡ് ഛായാഗ്രാഹകൻ ഷെൽഡൻ ചാവു ആണ്. സ്റ്റീഫൻ ദേവസിയാണ് സംഗീതം.