ശ്രീനാരായണ ഗുരുദേവ സന്ദേശങ്ങളുടെ ആഗോള പ്രസക്തിയും 

പുതിയ തലമുറയുടെ പങ്കാളിത്തവും മുഖ്യ ചർച്ചാവിഷയങ്ങൾ

ടാമ്പ, ഫ്ലോറിഡ: അമേരിക്കൻ മലയാളി സമൂഹത്തിന്റെ ആത്മീയ, സാംസ്കാരിക, സാമൂഹിക ഐക്യത്തിന്റെ വേദിയായ ‘ഫെഡറേഷൻ ഓഫ് ശ്രീനാരായണ അസോസിയേഷൻ ഓഫ് നോർത്ത് അമേരിക്ക (FSNNA)’യുടെ ആറാമത് ഗ്ലോബൽ കൺവെൻഷന് ഫ്ലോറിഡയിലെ ടാമ്പയിലെ ഹിൽട്ടൺ എംബസി സ്യൂട്ടിൽ പ്രൗഢഗംഭീരമായ തുടക്കമായി. അമേരിക്കയുടെ വിവിധ സംസ്ഥാനങ്ങളിൽ നിന്നെത്തിയ നൂറുകണക്കിന് പ്രതിനിധികളും കുടുംബാംഗങ്ങളും സാമൂഹിക-സാംസ്കാരിക പ്രവർത്തകരും ആത്മീയ നേതാക്കളും സമ്മേളനത്തിൽ പങ്കെടുത്തു.

ശിവഗിരി മഠത്തിലെ സ്വാമി ശിവസ്വരൂപാനന്ദ മുഖ്യാതിഥിയായി സമ്മേളനം ഉദ്ഘാടനം ചെയ്തു. ആധുനിക ലോകം നേരിടുന്ന സാമൂഹിക, സാമ്പത്തിക, സാംസ്കാരിക വെല്ലുവിളികൾക്കിടയിലും ശ്രീനാരായണ ഗുരുദേവന്റെ സന്ദേശങ്ങൾ ഇന്നും അതീവ പ്രസക്തമാണെന്ന് അദ്ദേഹം ഉദ്ഘാടന പ്രസംഗത്തിൽ ചൂണ്ടിക്കാട്ടി. മനുഷ്യസമത്വം, വിദ്യാഭ്യാസം, ആത്മീയ ഉണർവ്, സാമൂഹിക നവോത്ഥാനം എന്നിവയാണ് ഗുരുദേവന്റെ ദർശനത്തിന്റെ അടിത്തറയെന്നും ആ മൂല്യങ്ങൾ ലോകമെമ്പാടുമുള്ള മലയാളി സമൂഹം കൂടുതൽ ശക്തമായി ഉൾക്കൊള്ളേണ്ട കാലഘട്ടമാണിതെന്നും അദ്ദേഹം പറഞ്ഞു.

വിദേശരാജ്യങ്ങളിൽ വളർന്നുവരുന്ന പുതിയ തലമുറയ്ക്ക് ശ്രീനാരായണ ഗുരുദേവന്റെ ജീവിതവും ദർശനവും സേവന സന്ദേശങ്ങളും ഫലപ്രദമായി കൈമാറേണ്ടത് ഓരോ കുടുംബത്തിന്റെയും സംഘടനകളുടെയും ഉത്തരവാദിത്വമാണെന്ന് അദ്ദേഹം ഓർമ്മിപ്പിച്ചു. സംസ്കാരവും ആത്മീയ പാരമ്പര്യവും പുതിയ തലമുറയിൽ വളർത്തിയെടുക്കാൻ മാതാപിതാക്കളും സാമൂഹിക സംഘടനകളും ഒരുമിച്ച് പ്രവർത്തിക്കണമെന്ന് അദ്ദേഹം ആഹ്വാനം ചെയ്തു.

ചടങ്ങിൽ പങ്കെടുത്ത സ്വാമി മുക്താനന്ദ യതി ആത്മീയ സന്ദേശം നൽകി. ലോകത്തിന്റെ ഏത് ഭാഗത്തായാലും മനുഷ്യസ്നേഹവും സഹോദര്യബോധവും ഗുരുദേവന്റെ ആശയങ്ങളും ജീവിതത്തിൽ പകർത്തുകയാണ് യഥാർത്ഥ ഗുരുപൂജയെന്ന് അദ്ദേഹം പറഞ്ഞു.

FSNNA ചെയർമാൻ ഡോ. പുരുഷോത്തമൻ സ്വാഗത പ്രസംഗത്തിൽ സംഘടനയുടെ കഴിഞ്ഞ വർഷങ്ങളിലെ പ്രവർത്തനങ്ങൾ വിശദീകരിക്കുകയും ഉത്തര അമേരിക്കയിലെ വിവിധ ശ്രീനാരായണ സംഘടനകളെ ഒരുമിച്ച് ബന്ധിപ്പിക്കുന്ന ശക്തമായ വേദിയായി FSNNA വളർന്നുവന്നതിൽ അഭിമാനം രേഖപ്പെടുത്തുകയും ചെയ്തു. സമൂഹത്തിന്റെ ഐക്യം, യുവജന പങ്കാളിത്തം, വിദ്യാഭ്യാസ പ്രവർത്തനങ്ങൾ, സേവന പദ്ധതികൾ എന്നിവയ്ക്ക് സംഘടന കൂടുതൽ പ്രാധാന്യം നൽകുമെന്നും അദ്ദേഹം വ്യക്തമാക്കി.

കൺവെൻഷൻ പ്രസിഡന്റ് ശ്രീ ബിനൂപ്  ശ്രീധരൻ ആശംസാപ്രസംഗത്തിൽ സമ്മേളനത്തിനായി അമേരിക്കയുടെ വിവിധ ഭാഗങ്ങളിൽ നിന്നെത്തിയ പ്രതിനിധികളെയും അതിഥികളെയും സ്വാഗതം ചെയ്തു. എല്ലാവരുടെയും സഹകരണത്തോടെയാണ് ഈ മഹാസമ്മേളനം വിജയകരമായി സംഘടിപ്പിക്കാനായതെന്നും അദ്ദേഹം പറഞ്ഞു.

സമ്മേളനത്തിൽ മുൻ ഭാരവാഹികളായ കല്ലുവിള വാസുദേവൻ, സജീവ് ചേന്നാട്ട്  , പീതാംബരൻ തൈവളപ്പിൽ, KHNA പ്രസിഡന്റ് ഉണ്ണകൃഷ്ണൻ എന്നിവരും പങ്കെടുത്തു. സംഘടനയുടെ വളർച്ചയ്ക്കായി മുൻകാലങ്ങളിൽ പ്രവർത്തിച്ച നേതാക്കളെ ചടങ്ങിൽ ആദരിക്കുകയും അവരുടെ സംഭാവനകൾ അനുസ്മരിക്കുകയും ചെയ്തു.

അമേരിക്കയിലെ നിലവിലെ സാമൂഹിക-സാമ്പത്തിക സാഹചര്യത്തിൽ ശ്രീനാരായണ ഗുരുദേവന്റെ സന്ദേശങ്ങളുടെ പ്രസക്തിയായിരുന്നു ഉദ്ഘാടന സമ്മേളനത്തിലെ പ്രധാന ചർച്ചാവിഷയം. വർഗ്ഗ-വർണ്ണ-മത വ്യത്യാസങ്ങൾക്കതീതമായ മനുഷ്യസമത്വം, വിദ്യാഭ്യാസത്തിലൂടെയുള്ള സാമൂഹിക മുന്നേറ്റം, ആത്മവിശ്വാസം, സഹജീവിതം എന്നിവ ഇന്നത്തെ സമൂഹത്തിനും അത്യന്താപേക്ഷിതമാണെന്ന് വിവിധ പ്രഭാഷകർ അഭിപ്രായപ്പെട്ടു. പ്രത്യേകിച്ച് അമേരിക്കയിൽ ജനിച്ച് വളരുന്ന യുവതലമുറയ്ക്ക് ഈ മൂല്യങ്ങൾ പരിചയപ്പെടുത്തുകയും അവരെ സംഘടനാപ്രവർത്തനങ്ങളിലേക്ക് കൂടുതൽ സജീവമായി കൊണ്ടുവരികയും ചെയ്യേണ്ടതിന്റെ ആവശ്യകതയും സമ്മേളനത്തിൽ ശക്തമായി ഉയർന്നുവന്നു.

ഉദ്ഘാടന സമ്മേളനത്തിൽ ഏകദേശം അഞ്ഞൂറോളം പ്രതിനിധികൾ പങ്കെടുത്തു. സമ്മേളനത്തിന് മുന്നോടിയായി വർണാഭമായ ഘോഷയാത്രക്ക്‌ സ്വാമി ശിവസ്വരൂപാനന്ദ , സ്വാമി മുക്തനന്ദ യതി , പ്രസിഡണ്ട് ശ്രീ ബിനൂപ്  ശ്രീധരൻ , വൈസ് പ്രസിഡണ്ട് ശ്രീ  സുധീർദാസ് പ്രയാഗ , ജനറൽ സെക്രട്ടറി ശ്രീ സുജി വാസവൻ , ജോയിന്റ് സെക്രട്ടറി ശ്രീ മഞ്ജു ലാൽ നകുലൻ , ട്രഷറർ രാജീവ് ഭാസ്കരൻ ജോയിന്റ് ട്രഷർ ശ്രീമതി രാജി തൈവളപ്പിൽ   എന്നിവർ നേത്യുത്വത്തെ പരമ്പരാഗത കേരളീയ കലാരൂപങ്ങളായ തിരുവാതിര, ചെണ്ടമേളം എന്നിവ സമ്മേളനത്തിന് ഉത്സവാന്തരീക്ഷം പകർന്നു. അമേരിക്കൻ മലയാളി സമൂഹത്തിന്റെ സാംസ്കാരിക വൈവിധ്യവും കേരളത്തിന്റെ പാരമ്പര്യവും ഒരുമിപ്പിക്കുന്ന നിരവധി കലാപരിപാടികളും അരങ്ങേറി.

ജൂലൈ 3, 4 തീയതികളിൽ വിവിധ വിഷയങ്ങളെ ആസ്പദമാക്കി സെമിനാറുകൾ, ചർച്ചാസമ്മേളനങ്ങൾ, യുവജന പരിപാടികൾ, വനിതാ സമ്മേളനങ്ങൾ, സാംസ്കാരിക അവതരണങ്ങൾ, സംഗീത-നൃത്ത പരിപാടികൾ എന്നിവ നടക്കും. അമേരിക്കയിലെയും കാനഡയിലെയും വിവിധ ശ്രീനാരായണ സംഘടനകളുടെ പ്രതിനിധികൾ ഈ പരിപാടികളിൽ സജീവമായി പങ്കെടുക്കും.

അഞ്ച് ദിവസങ്ങളിലായി നടക്കുന്ന ഈ ആഗോള സംഗമം ആത്മീയത, സാമൂഹിക ഐക്യം, സാംസ്കാരിക പാരമ്പര്യം, യുവജന ശാക്തീകരണം എന്നിവയ്ക്ക് പുതുവഴികൾ തുറക്കുന്ന വേദിയാകുമെന്ന പ്രതീക്ഷയിലാണ് സംഘാടകർ. ഉത്തര അമേരിക്കയിലെ ശ്രീനാരായണ പ്രസ്ഥാനത്തിന്റെ ഭാവി പ്രവർത്തനങ്ങൾക്ക് ദിശാബോധം നൽകുന്ന നിർണായക ചർച്ചകളും തീരുമാനങ്ങളും ഈ കൺവെൻഷനിലൂടെ രൂപംകൊള്ളുമെന്നാണ് വിലയിരുത്തപ്പെടുന്നത്.

ജൂലൈ 5-ന് നടക്കുന്ന സമാപന സമ്മേളനത്തോടെയാണ് FSNNAയുടെ ആറാമത് ഗ്ലോബൽ കൺവെൻഷൻ സമാപിക്കുക.