ഹൂസ്റ്റണ്‍ : ഹൂസ്റ്റണ്‍ സ്റ്റേഡിയത്തിലെ പുല്‍മൈതാനത്ത് ആവേശത്തിന്റെ അലയൊലികള്‍ തീര്‍ത്ത മത്സരത്തില്‍ ഏഷ്യന്‍ കരുത്തരായ ജപ്പാനെതിരെ ബ്രസീലിന് 'അതിജീവന' ജയം. ഓഫ്-വൈറ്റ് ജഴ്‌സി അണിഞ്ഞെത്തിയ ജാപ്പനീസ് പടയെ ഒന്നിനെതിരെ രണ്ടു ഗോളുകള്‍ക്ക് മറികടന്ന് ബ്രസീല്‍ ലോകകപ്പിന്റെ ക്വാര്‍ട്ടര്‍ ഫൈനലിലേക്ക് ടിക്കറ്റെടുത്തു.

ജപ്പാന്‍ താരം കൈഷു സാനോയിലൂടെ 29-ാം മിനിറ്റില്‍ പിറന്ന ഗോളാണ് ബ്രസീലിനെ ഞെട്ടിച്ചത്. ജപ്പാന്‍ താരങ്ങളുടെ അക്രോബാറ്റിക് ഡൈവിംഗ് ടാക്കിളുകള്‍ നിറഞ്ഞ പ്രതിരോധം ഭേദിക്കാന്‍ ബ്രസീല്‍ മഞ്ഞപ്പടയ്ക്ക് 56-ാം മിനിറ്റ് വരെ കാത്തിരിക്കേണ്ടി വന്നു. ഒടുവില്‍ കാസെമിറോയുടെ തകര്‍പ്പന്‍ ഹെഡ്ഡറിലൂടെ ബ്രസീല്‍ മത്സരത്തിലേക്ക് തിരിച്ചുവന്നു.

മത്സരം എക്‌സ്ട്രാ ടൈമിലേക്ക് നീങ്ങുമെന്ന് കരുതിയ ഘട്ടത്തിലാണ് സ്റ്റേഡിയത്തെ ആവേശക്കടലിലാക്കിക്കൊണ്ട് ഗബ്രിയേല്‍ മാര്‍ട്ടിനെല്ലിയുടെ ഗോളെത്തിയത്. 90+6-ാം മിനിറ്റില്‍ ജപ്പാന്‍ ഗോള്‍വല കുലുക്കി മാര്‍ട്ടിനെല്ലി ബ്രസീലിന് വിജയമധുരം സമ്മാനിച്ചു.

ഹൂസ്റ്റണ്‍ സ്റ്റേഡിയം മത്സരത്തിനിടെ ആരാധകരുടെ ആവേശം കൊണ്ട് അക്ഷരാര്‍ത്ഥത്തില്‍ നിറഞ്ഞുനിന്നു. മഞ്ഞ ജഴ്‌സി അണിഞ്ഞ ബ്രസീല്‍ ആരാധകരും ഓഫ്-വൈറ്റ് ജഴ്‌സിയും നീലയും അണിഞ്ഞെത്തിയ  ജപ്പാന്‍ ആരാധകരും സ്റ്റേഡിയത്തെ അവിസ്മരണീയമായൊരു വേദിയാക്കി മാറ്റി.

അവസാന നിമിഷം ഗോള്‍ പിറന്നപ്പോള്‍ സ്റ്റേഡിയം ആകെ ആവേശക്കടലായി മാറി. ഹൂസ്റ്റണിലെ ഗാലറിയില്‍ നിറഞ്ഞാടിയ മഞ്ഞപ്പടയുടെ ആവേശത്തിരകള്‍ കളിക്കളത്തില്‍ ബ്രസീലിന് പകര്‍ന്നു നല്‍കിയത് വലിയൊരു കരുത്തായിരുന്നു.

ആരാധകരുടെ ആവേശം കൊണ്ട് ഹൂസ്റ്റണ്‍ സ്റ്റേഡിയം അക്ഷരാര്‍ത്ഥത്തില്‍ ഇളകിമറിയുകയായിരുന്നു. ഗാലറിയില്‍ ബ്രസീല്‍-ജപ്പാന്‍ പോരാട്ടത്തിന്റെ ആവേശം വാനോളം ഉയര്‍ത്താന്‍ മലയാളി ആരാധകരും മുന്നിലുണ്ടായിരുന്നു.  ബ്രസീലിന്റെ ഈ മുന്നേറ്റം ലോകകപ്പില്‍ ഇനി വരാനിരിക്കുന്ന വലിയ പോരാട്ടങ്ങള്‍ക്ക് വലിയ ആത്മവിശ്വാസമാണ് നല്‍കുന്നത്. ജൂലൈ 5-ന് നടക്കുന്ന ക്വാര്‍ട്ടര്‍ ഫൈനലില്‍ ഐവറി കോസ്റ്റ് - നോര്‍വേ മത്സരത്തിലെ വിജയികളെ ബ്രസീല്‍ നേരിടും.