വീണ പാടുമ്പോൾ

വിങ്ങിപ്പൊട്ടുന്ന

താളക്കുടത്തിന്റെ ചാരെ

വിഹ്വല മാൻമിഴി

കോണിലൊളിപ്പിച്ച

പട്ടിണിപ്പാട്ട് ഞാൻ കേട്ടു :

മാളോന്മാരെ,

മണിമേടക്കുള്ളിലെ

മാടമ്പിമാരെ കനിയേണമേ !

ചാളയിൽ വാടി യുറങ്ങും കിടാങ്ങൾക്കായ്‌

നാഴിയരി തരേണേ !

മണ്ണില്ല മോഹങ്ങൾ

നട്ടു വളർത്തുവാൻ

നന്മ മരങ്ങളുമില്ല.

വന്നു പോകുന്നു

കൊടി വച്ച കാറുകൾ

പൊള്ള വാഗ്ദാനങ്ങൾ പേറി ?

വിൽക്കുവാൻ പെൺമേനി

യുണ്ടെങ്കിൽ വിപ്ലവ

സംസ്ക്കാര നായകരെത്തും !

കുത്തിക്കുറിക്കുമാ നിമ്ന്നോന്നതങ്ങളിൽ

അക്കാദമിപ്പുകൾ കാവ്യം !

ആരോ വിളിച്ചു

കൂവുന്നുണ്ട് മാനവ

സ്വാതന്ത്ര്യ മുന്നേറ്റ ഗാഥ ?  

ആരെയും വീശി

വലയിൽ കുടുക്കുന്ന

മേലാളർ വീണ്ടും ഭരിക്കും !