വാഷിങ്ടൺ:  വൈസ് പ്രസിഡന്റ് ജെ.ഡി. വാൻസിന്റെ ഭാര്യയും ഇന്ത്യൻ വംശജയുമായ ഉഷാ വാൻസിന്റെ ഹിന്ദുമത വിശ്വാസത്തെ ചൊല്ലിയുള്ള വിമർശനങ്ങൾക്കിടെ, അമേരിക്കൻ തീവ്ര വലതുപക്ഷ രാഷ്ട്രീയ പ്രവർത്തക ലോറ ലൂമർ പിന്തുണയുമായി രംഗത്തെത്തി. ഹിന്ദുമതം ഉപേക്ഷിച്ച് കത്തോലിക്കാ മതം സ്വീകരിക്കേണ്ട യാതൊരു ആവശ്യവും ഉഷാ വാൻസിനില്ലെന്നും, അവർ 'ഇന്ത്യൻ വംശജയായ ഹിന്ദു വനിത' ആയതിനാലാണ് ചിലരുടെ വിമർശനങ്ങൾക്ക് ഇരയാകുന്നതെന്നും ലൂമർ അഭിപ്രായപ്പെട്ടു.
 

അടുത്തിടെ സി.ബി.എസ്. സംപ്രേഷണം ചെയ്ത അഭിമുഖത്തിലാണ് ഉഷാ വാൻസ് തന്റെ മതവിശ്വാസത്തെക്കുറിച്ച് സംസാരിച്ചത്. ഹിന്ദു കുടുംബത്തിലാണ് താൻ വളർന്നതെന്നും, അത് വളരെ സ്ഥിരതയുള്ള കുടുംബാന്തരീക്ഷമായിരുന്നുവെന്നും അവർ പറഞ്ഞു. ഭർത്താവ് ജെ.ഡി. വാൻസ് അനുഭവിച്ചതുപോലെ മറ്റൊരു വിശ്വാസം തേടേണ്ട ആവശ്യം തനിക്ക് തോന്നിയിട്ടില്ലെന്നും ഉഷാ വാൻസ് അഭിമുഖത്തിൽ വ്യക്തമാക്കി.

ഈ അഭിമുഖത്തിന് പിന്നാലെ എക്‌സ് പ്ലാറ്റ്ഫോമിൽ പ്രതികരിച്ച ലോറ ലൂമർ, വിമർശകരെ തൃപ്തിപ്പെടുത്താനായി ഉഷാ വാൻസ് കത്തോലിക്കാ മതം സ്വീകരിക്കരുതെന്ന് അഭിപ്രായപ്പെട്ടു. അവർ എന്ത് പറഞ്ഞാലും എന്ത് ചെയ്താലും, 'ഇന്ത്യൻ വംശജയായ ഹിന്ദു വനിത' എന്ന നിലയിൽ ചില ഗ്രൂപ്പുകൾ തുടർന്നും വിമർശിക്കുമെന്നാണ് ലൂമർ ആരോപിച്ചത്. ഉഷാ വാൻസ് ഒരിക്കലും മതം മാറരുതെന്നാണ് താൻ ആഗ്രഹിക്കുന്നതെന്നും അവർ മറ്റൊരു കുറിപ്പിൽ പറഞ്ഞു.

തുടർന്ന് ഇന്ത്യയെക്കുറിച്ചും ലൂമർ അഭിപ്രായപ്പെട്ടു. ഇന്ത്യക്കാരെ നേരിൽ കണ്ടിട്ടുണ്ടോയെന്ന ചോദ്യത്തിന് മറുപടിയായി, അടുത്തിടെ രണ്ടാഴ്ച ഇന്ത്യയിൽ ചെലവഴിച്ചെന്നും, ജീവിതത്തിൽ കണ്ട ഏറ്റവും സൗഹൃദപരവും ദയയുള്ളവരുമായ ജനവിഭാഗങ്ങളിലൊന്നാണ് ഇന്ത്യക്കാരെന്നും അവർ കുറിച്ചു. ഇന്ത്യക്കാർ വളരെ സൗമ്യരും ഉദാരമതികളുമാണെന്നും അവർ അഭിപ്രായപ്പെട്ടു.

അതേസമയം, ഇന്ത്യയെയും ഇന്ത്യക്കാരെയും കുറിച്ചുള്ള ലൂമറുടെ ഈ പരാമർശങ്ങൾ ശ്രദ്ധ നേടുന്നുണ്ട്. മുമ്പ് എച്ച്-1ബി വിസ പദ്ധതിയെ വിമർശിക്കുകയും ഇന്ത്യൻ പ്രൊഫഷണലുകൾ അമേരിക്കക്കാരുടെ തൊഴിലവസരങ്ങൾ നഷ്ടപ്പെടുത്തുകയാണെന്ന് ആരോപിക്കുകയും ചെയ്തിരുന്ന ലൂമർ, ഇപ്പോൾ ഇന്ത്യക്കാരെ പ്രശംസിച്ച് രംഗത്തെത്തിയത് അവരുടെ മുൻ നിലപാടുകളിൽ നിന്നുള്ള മാറ്റമായാണ് രാഷ്ട്രീയ നിരീക്ഷകർ വിലയിരുത്തുന്നത്.

ഉഷാ വാൻസ് ഇതുവരെ ലൂമറുടെ പരാമർശങ്ങളോട് പ്രതികരിച്ചിട്ടില്ല.