സിയാറ്റിൽ: ഇന്ത്യൻ വംശജയും അമേരിക്കൻ കോൺഗ്രസ് അംഗവുമായ പ്രമീള ജയ്പാൽ 2026-ലെ തിരഞ്ഞെടുപ്പ് പ്രചാരണത്തിന് ഔദ്യോഗിക തുടക്കമിട്ടു. സിയാറ്റിലിൽ നൂറുകണക്കിന് അനുയായികൾ പങ്കെടുത്ത പ്രചാരണ ഉദ്ഘാടന ചടങ്ങിൽ സംസാരിച്ച ജയപാൽ, അമേരിക്കൻ ജനാധിപത്യത്തെ സംരക്ഷിക്കുകയും പുരോഗമന നയങ്ങൾ മുന്നോട്ടുകൊണ്ടുപോകുകയും ചെയ്യുന്നതിനുള്ള നിർണായക ഘട്ടമാണ് വരാനിരിക്കുന്ന തിരഞ്ഞെടുപ്പെന്ന് പറഞ്ഞു.
 

രാജ്യം വലിയ അനിശ്ചിതത്വത്തിലൂടെയാണ് കടന്നുപോകുന്നതെന്നും ജനാധിപത്യത്തിന് മേൽ ഭീഷണികൾ ഉയരുന്ന സാഹചര്യത്തിൽ ജനങ്ങളുടെ ഐക്യവും രാഷ്ട്രീയ പങ്കാളിത്തവുമാണ് പ്രതീക്ഷയുടെ വെളിച്ചമെന്നും അവർ പറഞ്ഞു. "നിരാശയ്ക്ക് മറുമരുന്ന് സംഘടനാപ്രവർത്തനമാണ്; ഭയത്തിന് മറുപടി പ്രവർത്തനമാണ്. നിരാശപ്പെടാനല്ല, പോരാടാനാണ് ഞാൻ കോൺഗ്രസിലെത്തിയത്," എന്ന് ജയപാൽ അനുയായികളോട് പറഞ്ഞു.

അമേരിക്കൻ കോൺഗ്രസിലേക്ക് തിരഞ്ഞെടുക്കപ്പെട്ട ആദ്യ ദക്ഷിണേഷ്യൻ വംശജ വനിതയും മുൻ കോൺഗ്രഷണൽ പ്രോഗ്രസീവ് കോക്കസ് അധ്യക്ഷയുമായ ജയപാൽ, കോർപ്പറേറ്റ് PAC ഫണ്ടുകളോ രഹസ്യ ധനസഹായങ്ങളോ സ്വീകരിക്കില്ലെന്ന നിലപാട് ആവർത്തിച്ചു.  ആരോഗ്യപരിരക്ഷാ പരിഷ്കാരം, ഉയർന്ന മിനിമം വേതനം, തൊഴിലാളി അവകാശങ്ങൾ, കുടിയേറ്റ പരിഷ്കാരം, വോട്ടവകാശ സംരക്ഷണം, LGBTQIA+ അവകാശങ്ങൾ എന്നിവ ഉൾപ്പെടുന്ന വിശാലമായ പുരോഗമന അജണ്ടയുമായി മുന്നോട്ട് പോകുമെന്ന് അവർ വ്യക്തമാക്കി.

2017 മുതൽ വാഷിംഗ്ടണിലെ ഏഴാം കോൺഗ്രഷണൽ ഡിസ്ട്രിക്ടിനെ പ്രതിനിധീകരിക്കുന്ന ജയപാൽ, 2026 ഓഗസ്റ്റ് 4-ന് നടക്കുന്ന പ്രാഥമിക തിരഞ്ഞെടുപ്പിൽ വീണ്ടും ജനവിധി തേടും. നവംബർ മാസത്തിൽ നടക്കുന്ന പൊതുതിരഞ്ഞെടുപ്പിന് മുന്നോടിയായുള്ള ഈ പ്രചാരണം ജനാധിപത്യ മൂല്യങ്ങൾ സംരക്ഷിക്കാനുള്ള പ്രസ്ഥാനമായി വളർത്തിക്കൊണ്ടുപോകുമെന്നും ചടങ്ങിന്റെ സമാപനത്തിൽ അവർ ആഹ്വാനം ചെയ്തു.