ന്യൂയോർക്ക്: അന്താരാഷ്ട്ര യോഗദിനത്തോടനുബന്ധിച്ച് ഐക്യരാഷ്ട്രസഭ ആസ്ഥാനത്ത് നടന്ന പ്രത്യേക പരിപാടിയിൽ ലോകത്തിന്റെ വിവിധ രാജ്യങ്ങളിൽ നിന്നുള്ള നയതന്ത്രജ്ഞരും യു.എൻ. ഉദ്യോഗസ്ഥരും സന്ദർശകരും പങ്കുചേർന്നു. ‘ഓം’ മന്ത്രോച്ചാരണവും യോഗാസനങ്ങളും ശ്വസനാഭ്യാസങ്ങളുമായി നടന്ന ആഘോഷം ലോകസമൂഹത്തിന്റെ ഐക്യത്തിന്റെയും ആരോഗ്യബോധത്തിന്റെയും പ്രതീകമായി മാറി.
 

“ആരോഗ്യകരമായ വാർധക്യത്തിനായുള്ള യോഗ” (Yoga for Healthy Ageing) എന്നതായിരുന്നു ഈ വർഷത്തെ പ്രമേയം. പ്രായമാകുന്ന ജനവിഭാഗങ്ങളുടെ ശാരീരിക-മാനസിക ആരോഗ്യം, ചലനശേഷി, അന്തസ് എന്നിവയുടെ പ്രാധാന്യത്തെ ഈ പ്രമേയം ഉയർത്തിക്കാട്ടുന്നതായി യു.എൻ. സെക്രട്ടറി ജനറൽ അന്റോണിയോ ഗുട്ടെറസ് പറഞ്ഞു. "യോഗ നമ്മെ ശ്രദ്ധയോടെയും പരസ്പര ബഹുമാനത്തോടെയും ജീവിക്കാൻ പഠിപ്പിക്കുന്നു. നമ്മുടെ മുതിർന്ന തലമുറയോടുള്ള കരുതൽ വർധിപ്പിക്കുകയും എല്ലാവർക്കും ആരോഗ്യകരമായ ജീവിതം ഉറപ്പാക്കുകയും ചെയ്യുന്ന ഒരു ലോകം നമുക്ക് സൃഷ്ടിക്കാം,” അദ്ദേഹം ആഹ്വാനം ചെയ്തു.

ഐക്യരാഷ്ട്രസഭയിലെ ഇന്ത്യയുടെ പ്രതിനിധി പി.ഹരിഷ്, യോഗത്തെ ആഗോള ജനകീയ പ്രസ്ഥാനമാക്കി മാറ്റണമെന്ന നരേന്ദ്ര മോഡിയുടെ ദർശനം അനുസ്മരിച്ചു. “മനസ്സും ശരീരവും, മനുഷ്യനും പ്രകൃതിയും തമ്മിലുള്ള ഐക്യത്തിന്റെ പ്രതീകമാണ് ‘നമസ്‌തേ’ എന്ന ഏറ്റവും ലളിതമായ യോഗാസനം,” അദ്ദേഹം പറഞ്ഞു.

ഈസ്റ്റ് റിവറിനോട് ചേർന്ന യു.എൻ. നോർത്ത് ലോൺ പരിസരത്ത്, മഹാത്മാ ഗാന്ധിയുടെ പ്രതിമയുടെ സാന്നിധ്യത്തിൽ വിവിധ രാജ്യങ്ങളിൽ നിന്നുള്ള പങ്കാളികൾ ലളിതമായതുമുതൽ സങ്കീർണമായതുവരെയുള്ള യോഗാസനങ്ങൾ അഭ്യസിച്ചു. 2014-ൽ പ്രധാനമന്ത്രി മോഡിയുടെ നിർദേശപ്രകാരം ഐക്യരാഷ്ട്രസഭ ജനറൽ അസംബ്ലി പാസാക്കിയ പ്രമേയത്തിലൂടെയാണ് അന്താരാഷ്ട്ര യോഗദിനം പ്രഖ്യാപിക്കപ്പെട്ടത്. 177 രാജ്യങ്ങൾ സഹസ്പോൺസർമാരായ ആ പ്രമേയം അന്നത്തെ റെക്കോർഡായിരുന്നു.

ഇതിനിടെ, ഞായറാഴ്ച ന്യൂയോർക്കിലെ പ്രശസ്തമായ Solstice in Times Square: Mind Over Madness Yoga പരിപാടിയും ഇന്ത്യൻ കോൺസുലേറ്റിന്റെ സഹകരണത്തോടെ നടക്കും. നഗരജീവിതത്തിന്റെ തിരക്കുപിടിച്ച സമ്മർദ്ദങ്ങൾക്കിടയിൽ മനസ്സിന് ശാന്തത പകരാനുള്ള യോഗയുടെ ശക്തിയെ പ്രമേയമാക്കിയാണ് പരിപാടി സംഘടിപ്പിക്കുന്നത്.