കൊച്ചി: ചലച്ചിത്ര താരങ്ങളായ അൻസിബ ഹസനും ടിനി ടോമും തമ്മിലുള്ള തർക്കത്തിൽ പോലീസ് അന്വേഷണം ഊർജ്ജിതമാക്കുന്നു. അൻസിബ നൽകിയ പരാതിയിൽ കടവന്ത്ര പോലീസ് തയ്യാറാക്കിയ അന്വേഷണ റിപ്പോർട്ട് തുടർ നടപടികൾക്കായി ഉടൻ തന്നെ കൊച്ചി അസിസ്റ്റന്റ് പോലീസ് കമ്മീഷണർക്ക് (എസിപി) കൈമാറും. അമ്മ (AMMA) സംഘടനയിലെ ആഭ്യന്തര തർക്കങ്ങളുമായി ബന്ധപ്പെട്ട് തനിക്കെതിരെ ടിനി ടോം വ്യാപകമായ രീതിയിൽ വർഗ്ഗീയ പ്രചാരണം നടത്തിയെന്നാണ് അൻസിബ ഹസൻ സിറ്റി പോലീസ് കമ്മീഷണർക്ക് നൽകിയ പരാതിയിൽ ആരോപിക്കുന്നത്.

​കേസുമായി ബന്ധപ്പെട്ട് ആരോപണവിധേയനായ നടൻ ടിനി ടോം, അമ്മ സംഘടനയുടെ വൈസ് പ്രസിഡന്റായ ശ്വേത മേനോൻ എന്നിവരുടെ മൊഴികൾ കടവന്ത്ര പോലീസ് കഴിഞ്ഞ ദിവസങ്ങളിൽ രേഖപ്പെടുത്തിയിരുന്നു. എന്നാൽ അൻസിബയുടെ ആരോപണങ്ങൾ പൂർണ്ണമായും നിഷേധിക്കുന്ന നിലപാടാണ് ഇരുവരും പോലീസിന് മുന്നിൽ സ്വീകരിച്ചത്. സംഘടനയ്ക്കുള്ളിൽ യാതൊരുവിധ വർഗ്ഗീയ ചേരിതിരിവുകളും ഉണ്ടായിട്ടില്ലെന്നും പരാതിക്ക് പിന്നിൽ വ്യക്തിപരമായ മറ്റ് താല്പര്യങ്ങളാണെന്നുമാണ് ഇവർ മൊഴി നൽകിയിട്ടുള്ളതെന്നാണ് വിവരം.

​അമ്മ സംഘടനയിൽ അടുത്തിടെയുണ്ടായ അസ്വാരസ്യങ്ങളുടെയും ഭാരവാഹികളുടെ കൂട്ടരാജിയുടെയും പശ്ചാത്തലത്തിൽ, താരങ്ങൾ തമ്മിലുള്ള ഈ വർഗ്ഗീയ ആരോപണം ചലച്ചിത്ര മേഖലയിൽ വലിയ ചർച്ചകൾക്കാണ് വഴിവെച്ചിരിക്കുന്നത്. പരാതിക്കാരിയായ അൻസിബ ഹസന്റെ മൊഴി നേരത്തെ തന്നെ പോലീസ് വിശദമായി രേഖപ്പെടുത്തിയിരുന്നു. കടവന്ത്ര പോലീസിന്റെ അന്വേഷണ റിപ്പോർട്ട് ലഭിച്ച ശേഷം, കൊച്ചി എസിപിയുടെ നേതൃത്വത്തിൽ കേസിൽ തുടരന്വേഷണവും നിയമപരമായ തുടർനടപടികളും സ്വീകരിക്കാനാണ് പോലീസ് പ്ലാൻ ചെയ്യുന്നത്.