പലവട്ടം മടുപ്പിച്ച
പടം കാണാൻ വിധിപ്പെട്ടു
ജനലഴിക്കുള്ളിൽ ജയിൽ 
തടങ്കലിലായ രാത്രി!

പകുത്തെടുത്തതിൻ പാതി 
പാലിൻഗ്ലാസു നീട്ടി മാരൻ...
കുടിക്കാതെയവൾ വാങ്ങി- 
യൊതുക്കത്തിൽ മാറ്റിവയ്ക്കെ!

പുതിയ കുത്തരിച്ചോറിൽ
കരിം കല്ലുകടിച്ചതിൻ
പരുവക്കേടകത്താകെ
നിറഞ്ഞൂ മണാളനപ്പോൾ!

പതിവില്ലാ വിധമെന്തേ
പെരുമാറ്റം?
നാട്ടു നടപ്പറിയില്ലേ വളർന്നിട്ടും
പുരമുറ്റി നിറഞ്ഞിട്ടും!

പറഞ്ഞവൾ, നാട്ടിലുള്ള
നടപ്പെല്ലാം നടപ്പാക്കാ-
നുടമ്പടിയെടുപ്പല്ല
പരിണയമെനിക്കോർക്ക!

ഉച്ചിഷ്‌ടമെനിക്കിഷ്ട-
മല്ല പണ്ടു മുതൽക്കാരും
ഭക്ഷിച്ച ബാക്കി ശീല-
മില്ലിനിയും മാറ്റമില്ല!

വർത്തമാനമിതിൽ രാത്രി തൻ 
മടുപ്പങ്ങിറങ്ങിപ്പോയ്
നിത്യ രംഗം, പതിവ് കാഴ്ചക-
ളൊക്കെ മാറി മറിയുന്നൂ!

ആദ്യരാവിൽ, രംഗമത്ര വഷളാക്കേണ്ടെന്ന മട്ടിൽ,
ചോദ്യമൊന്നു മാറ്റിയേവം
നവവരൻ തൊടുക്കുന്നൂ...

ശീലമൊന്നും മാറ്റിടേണ്ട
മറ്റൊരു വാക്കെനിക്കേകാൻ
ലോലചിത്തം നിനക്കുണ്ടെ
ന്നാകിലോഞാൻ പൂർണ തൃപ്തൻ!

നോക്കിടേണം പൊന്നുപോലെ- 
ന്നച്ഛനമ്മമാരെ സ്വന്തം 
ഡ്യൂട്ടിയാണതെന്ന തോന്നൽ 
നിനക്കിപ്പോൾ മുതൽ വേണം

വിട്ടുവീഴ്ചയില്ലയിക്കാ- 
ര്യത്തിലൊട്ടുമത്രമാത്രം
ചിട്ടയായിട്ടടുത്ത നാൾ
മുതൽക്കതു തുടങ്ങേണം

പഴുതില്ലാ നിബന്ധന
ക്കുരുക്കിനെ മറുചോദ്യ
ക്കൊടുംമന്ത്രക്കരുത്താലേ
യറുക്കുന്നൂ വധു,വേഗം

എന്നെയും പെറ്റുയിർ പോറ്റി -
പ്പഠിപ്പിച്ചു പുലർത്തിയ
രണ്ടുപേരുണ്ടങ്ങു നാട്ടി-
ലവരെയാർ നോക്കിടുന്നൂ...?

ക്ഷമകെട്ടങ്ങിതിഹാസ
കഥാനായകൻ വിറയ്ക്കേ,
ക്ഷണം,സെൽഫോ-
ണെടുത്തവൾ 'യൂബറൊ'ന്നു
വിളിക്കുന്നു...

തുറക്കും വാതിലിലൂടെ
ജയിൽ ശിക്ഷ മതിയാക്കി-
പ്പുറത്തേക്ക് കുതിക്കെ 
നിലാവവൾക്കൊപ്പം തിരിക്കുന്നൂ..

നടപ്പിൽ, തൻ കറുപ്പിന്റെ 
മിഴിച്ചെപ്പൊന്നടച്ചൂർന്ന 
വിളക്കൊന്നാക്കരം തന്നിൽ
പിടിപ്പിച്ചു പിരിയുന്നൂ!

               ****

**മാറ്റം [ ലാറ്റിൻ പദം ]