ഹ്യൂസ്റ്റൺ: നർത്തകിയും പ്രശസ്ത നൃത്താധ്യാപികയുമായ ഡോ. സുനന്ദ നായർക്ക് ഭാരത സർക്കാരിന്റെ കേന്ദ്ര സംഗീത നാടക അക്കാദമി അവാർഡ്. കലാകാരന്മാർക്ക് ഇന്ത്യ നൽകുന്ന ഈ ഉന്നത പുരസ്കാരം തേടിയെത്തുന്ന ആദ്യ അമേരിക്കൻ മലയാളിയാണ് ഡോ. സുനന്ദ നായർ.  നമ്മുടെ സമൂഹത്തിന് ഒന്നടങ്കം വലിയ അഭിമാനവും ആഹ്ലാദവും പകരുന്നതാണ് ഈ സുവർണ്ണ നേട്ടം. ഈ ഉന്നത ബഹുമതി സ്വന്തമാക്കിയ ഡോ. സുനന്ദ നായരെ ഹൂസ്‌റ്റൻ കോൺസുലേറ്റ് പ്രത്യേകം അഭിനന്ദിച്ചു.

തന്റെ നൃത്തസപര്യയ്ക്ക് ലഭിച്ച ഈ വലിയ അംഗീകാരത്തെക്കുറിച്ച് ഡോ. സുനന്ദ നായർ  ഇ-മലയാളിയോട്  പ്രതികരിച്ചു:

"എന്റെ അമ്മയുടെ ജന്മദിനത്തിലാണ് ഈ പുരസ്‍കാരം എന്നെ തേടിയെത്തുന്നത്, അതുകൊണ്ടുതന്നെ ഇത് ഏറെ സന്തോഷം പകരുന്നു. ഈ അവാർഡ് കിട്ടാൻ ഏറെ വൈകിപ്പോയി എന്ന് ചിലർ പറയുന്നുണ്ട്. എന്നാൽ അവാർഡിന് വേണ്ടി ഞാൻ ഒരു പരിശ്രമവും നടത്തിയിട്ടില്ല. അർഹമായത് തീർച്ചയായും തേടി വരും എന്നതാണ് എന്റെ ഫിലോസഫി. നമ്മൾ ചെയ്യുന്ന ജോലിയിൽ പൂർണ്ണമായി ശ്രദ്ധ കേന്ദ്രീകരിക്കുമ്പോൾ ബാക്കിയെല്ലാം താനേ വന്നുചേരും എന്ന് വിശ്വസിക്കുന്ന ആളാണ് ഞാൻ."

കഥകളിയും ഭരതനാട്യവും ഒരേപോലെ മികവോടെ പകർന്നാടി പേരെടുത്തിട്ടും, കേരളത്തിന്റെ തനതുനൃത്തം എന്ന നിലയിലാണ് ഡോ. സുനന്ദ മോഹിനിയാട്ടത്തെ നെഞ്ചോട് ചേർത്തത്. ഭാരതത്തിൽ നിന്ന് മോഹിനിയാട്ടത്തിൽ ആദ്യമായി ബിരുദാനന്തരബിരുദം നേടിയ ഈ അതുല്യകലാകാരിയുടെ ശിക്ഷണം, പ്രഗത്ഭമതികളായ നിരവധി നർത്തകരെയാണ് ഇതിനകം ആസ്വാദനലോകത്തിന് സംഭാവന ചെയ്തിട്ടുള്ളത്. ഇന്റർ കോളജ് ലെവലിൽ ഭരതനാട്യത്തിന് ഗോൾഡ് മെഡൽ നേടിയിട്ടുണ്ട്.

നൃത്തത്തെ ഉപാസിച്ച ജീവിതയാനം: മുംബൈയിൽ നിന്ന് അമേരിക്കയിലേക്ക്

അമ്മയുടെ വീട് മേടത്തൂർ വൈദ്യമഠത്തിനടുത്തും അച്ഛന്റെ വീട് പട്ടാമ്പിയിലുമാണെങ്കിലും സുനന്ദ ജനിച്ചുവളർന്നത് മുംബൈയിലാണ്. സ്കൂൾ-കോളജ് കാലഘട്ടത്തിൽ നൃത്തത്തിൽ മാത്രമല്ല, കായികരംഗത്തും അവർ ഒരു 'സ്റ്റാർ' ആയിരുന്നു. സ്പ്രിന്റ്, ഹൈജംപ്, ലോങ്ങ് ജംപ് എന്നിവയിലെല്ലാം സജീവമായിരുന്ന സുനന്ദ, ഇന്റർ-സ്കൂൾ മത്സരങ്ങളിൽ നിരവധി സമ്മാനങ്ങൾ നേടിയിട്ടുണ്ട്. പന്ത്രണ്ടാം ക്ലാസ്സിൽ പഠിക്കുമ്പോൾ ഒന്നരമണിക്കൂർ ദൈർഘ്യമുള്ള 'ഫ്ലോ ഓഫ് ദി ഗംഗ' എന്ന നൃത്തനാടകം കൊറിയോഗ്രാഫ് ചെയ്ത് പ്രിൻസിപ്പാളിന്റെ പ്രത്യേക പുരസ്കാരവും നേടി. കൂടാതെ കോളജിൽ ബാഡ്മിന്റൺ, ക്യാരംസ്, ചെസ്സ് എന്നിവയിലെല്ലാം ചാമ്പ്യനായിരുന്നു.

കേവലം പതിനാറാം വയസ്സിലാണ് സുനന്ദയിലെ അധ്യാപികയെ അവരുടെ ഗുരു കണ്ടെത്തുന്നത്. ഗുരുവിന്റെ വലിയ വിശ്വാസത്തിൽ 62 കുട്ടികളുമായി തുടങ്ങിയ ആ നൃത്താധ്യാപനം പിന്നീട് നാല് പതിറ്റാണ്ടിലേറെ നീണ്ട പ്രൊഫഷണൽ കരിയറായി വളരുകയായിരുന്നു. കോമേഴ്‌സ് ബിരുദധാരിയായ അവർ, നിയമപഠനത്തിന് ചേർന്നുവെങ്കിലും നൃത്തത്തോടുള്ള അഭിനിവേശം കാരണം നൃത്ത പരിശീലനത്തിന് മുൻഗണന നൽകി. മുംബൈ യൂണിവേഴ്സിറ്റിക്കു കീഴിലുള്ള നളന്ദ നൃത്യ കലാവിദ്യാലയയിൽ നിന്ന് ഫൈൻ ആർട്സിൽ ബിരുദവും ബിരുദാനന്തരബിരുദവും നേടി. 1991 മുതൽ 1999 വരെ അവിടെ ലെക്ച്ചറർ ആയി സേവനമനുഷ്ഠിച്ചു. തുടർന്ന് പദ്മഭൂഷൺ ഡോ. കനക റെലെയുടെ ശിക്ഷണത്തിലാണ് മോഹിനിയാട്ടത്തിൽ മുംബൈ യൂണിവേഴ്സിറ്റിയിൽ നിന്ന്   ഡോക്ടറേറ്റ് (2016) കരസ്ഥമാക്കിയത്.

ഭർത്താവ് ആനന്ദിന് (മർച്ചന്റ് നേവി ക്യാപ്റ്റൻ) യു.എസിൽ നിന്ന് ലഭിച്ച അപ്രതീക്ഷിത തൊഴിൽ അവസരമാണ് മകന് എട്ട് വയസ്സുള്ളപ്പോൾ സുനന്ദയെ അമേരിക്കയിലെത്തിക്കുന്നത്. കരിയറിന്റെ ഉച്ചസ്ഥായിയിൽ നിൽക്കുമ്പോൾ അമേരിക്കയിലേക്ക് മാറിയ ആദ്യ നാളുകളിൽ, നൃത്തമില്ലാതെ വെറുതെയിരിക്കേണ്ടി വന്ന മൂന്നാഴ്ചകൾ വലിയ പ്രതിസന്ധിയായിരുന്നുവെന്ന് അവർ ഓർക്കുന്നു. എന്നാൽ, പ്രാദേശിക മലയാളികളുടെ അഭ്യർത്ഥനപ്രകാരം തിരുവാതിരകളി പഠിപ്പിച്ചുകൊണ്ട് തുടങ്ങിയ യാത്ര പിന്നീട് വലിയൊരു ഡാൻസ് സ്കൂളായി മാറി. ലൂസിയാനയിൽ സ്ഥിരതാമസമാക്കിയെങ്കിലും കത്രീന കൊടുങ്കാറ്റിൽ വീട് വെള്ളത്തിലായതിനെ തുടർന്ന് ഹ്യൂസ്റ്റണിലേക്ക് മാറേണ്ടി വന്നു. പ്രതിസന്ധികളിലും നൃത്തം അവരെ വിട്ടുപിരിഞ്ഞില്ല. ഹ്യൂസ്റ്റണിലും ചുരുങ്ങിയ കാലം കൊണ്ട് നിരവധി ശിഷ്യരുമായി ഡാൻസ് സ്കൂൾ പച്ചപിടിച്ചു.

മഹാരഥന്മാരായ ഗുരുക്കന്മാരും പുരസ്കാരങ്ങളും

പ്രശസ്തരായ ആചാര്യന്മാരുടെ കീഴിലാണ് ഡോ. സുനന്ദ നൃത്തം അഭ്യസിച്ചത്:

കഥകളി: ആദ്യഗുരു കലാമണ്ഡലം കൃഷ്ണൻകുട്ടി വാര്യർ. നിലവിൽ കലാമണ്ഡലം ഗോപാലകൃഷ്‍ണൻ നായരുടെ കീഴിൽ പരിശീലനം തുടരുന്നു.

ഭരതനാട്യം: ദീപക് മസുംദാ (ഭരതനാട്യം നർത്തകിയായി മാറ്റിയെടുത്ത ഗുരു), കലൈമാമണി മഹാലിംഗം പിള്ള, കലൈമാമണി കതറിവേലുപ്പിള്ള, പത്മശ്രീ ചിത്ര വിശ്വേശരൻ.

മോഹിനിയാട്ടം: പത്മഭൂഷൺ ഡോ. കനക് റേലെ.

2011-ൽ കേരള സംഗീത നാടക അക്കാഡമിയുടെ 'കലാശ്രീ' അവാർഡും കലാമണ്ഡലത്തിന്റെ 'കലാരത്‌നാ' പുരസ്കാരവും അവർ നേടിയിട്ടുണ്ട്. കൂടാതെ അഭിനയ ശിരോമണി, ശിങ്കാരമണി, അനന്തമാർഗ്ഗശീർഷ നാട്യ പുരസ്കാരം, ചെന്നൈ നാട്യാഞ്ജലി ട്രസ്റ്റിന്റെ നാട്യമയൂരി പുരസ്കാരം, മുദ്രയ് പതിത്ത വിരൽകൾ പുരസ്കാരം, നാട്യശ്രീ, ദേവദാസി നാഷണൽ അവാർഡ്, നളന്ദ കനക നർത്തന പുരസ്‌കാരം, നൃത്യ സേവാമണി (2020) തുടങ്ങി എണ്ണമറ്റ പുരസ്കാരങ്ങൾ ഈ കലാകാരിയെ തേടിയെത്തിയിട്ടുണ്ട്. ഡോ. സുനന്ദയുടെ കീഴിൽ നൃത്തം അഭ്യസിച്ച നിരവധി വിദ്യാർത്ഥികൾ ദേശീയ സ്കോളർഷിപ്പുകളും ദൂരദർശൻ ഗ്രേഡഡ് ആർട്ടിസ്റ്റ് പദവികളും കേന്ദ്ര-സംസ്ഥാന പുരസ്കാരങ്ങളും നേടിയിട്ടുണ്ട്.

കോവിഡ് കാലത്തെ ദശാസന്ധിയും സാങ്കേതികവിദ്യയുടെ സാധ്യതകളും

കോവിഡ് മഹാമാരി ലോകത്തെ നിശ്ചലമാക്കിയപ്പോൾ, നർത്തകർ അഭിമുഖീകരിച്ച വലിയ അനിശ്ചിതത്വത്തെ ഡോ. സുനന്ദ മറികടന്നത് സാങ്കേതികവിദ്യയുടെ സഹായത്തോടെയാണ്. വ്യക്തിപരമായ സാന്നിധ്യമില്ലാതെ ഓൺലൈനിലൂടെ നൃത്തം പഠിപ്പിക്കുന്നതിലെ ആശങ്കകൾ തുടക്കത്തിൽ ഉണ്ടായിരുന്നുവെങ്കിലും, സൂം (Zoom) ക്ലാസുകളിലൂടെ വിദ്യാർത്ഥികൾക്ക് കൂടുതൽ സമയം നൽകാൻ അവർക്ക് സാധിച്ചു.

ലോക്ഡൗൺ കാലത്തെ സർഗ്ഗാത്മകമായി ഉപയോഗിച്ചുകൊണ്ട് 'അർപ്പണ' എന്ന പേരിൽ ഓൺലൈൻ ഡാൻസ് ഫെസ്റ്റിവൽ സംഘടിപ്പിച്ചു. ഇന്ത്യയിലെ പ്രഗത്ഭരായ നർത്തകരെയും പുതുമുഖങ്ങളെയും ഇതിൽ അണിനിരത്തി. കൂടാതെ, രാജ്യത്തെ മികച്ച നർത്തകരുമായി കുട്ടികൾക്ക് സംവദിക്കാൻ 'വാചിക' എന്ന ടോക്ക് ഷോയും, മൂന്നുനാലുമാസങ്ങൾ നീണ്ടുനിന്ന നാട്യശാസ്ത്ര ക്ലാസ്സുകളും, 'സമ്പത' എന്ന നൃത്തപരീക്ഷയും, 'കനക നൃത്യോത്സവം' എന്ന മോഹിനിയാട്ട ഫെസ്റ്റിവലും ഓൺലൈനായി വിജയകരമായി നടത്തി.

"നമ്മുടെ കുടുംബവും സുഹൃത്തുക്കളും സുരക്ഷിതരായിരിക്കുന്നതാണ് ജീവിതത്തിൽ ഏറ്റവും വലിയ കാര്യമെന്ന് കോവിഡ് കാലം പഠിപ്പിച്ചു. പ്രാണവായു പോലെയാണ് എനിക്ക് നൃത്തം. എന്റെ സന്തോഷവും സങ്കടവും വേദനകളുമെല്ലാം ഞാൻ പങ്കുവയ്ക്കുന്നത് നൃത്തത്തോടാണ്. എന്നെ ഇത്രത്തോളം മനസ്സിലാക്കുന്ന മറ്റൊരു സുഹൃത്തില്ല. എന്നിൽ നിന്ന് നൃത്തത്തെ വേർപെടുത്താനാകില്ല," ഡോ. സുനന്ദ നായർ നൃത്തത്തോടുള്ള തന്റെ ആത്മബന്ധം വെളിപ്പെടുത്തി.

ഡോ. സുനന്ദ നായരുടെ കലാജീവിതത്തിന് എന്നും ശക്തമായ പിന്തുണ നൽകിയിരിക്കുന്നത് കുടുംബമാണ്. മകൻ കെമിക്കൽ എൻജിനീയറിംഗിൽ ബിരുദം നേടിയ ശേഷം അമേരിക്കയിലെ പ്രശസ്തമായ റൈസ് യൂണിവേഴ്സിറ്റിയിൽ നിന്ന് എം.ബി.എ കരസ്ഥമാക്കി. മകന്റെ ഭാര്യ അനിത ധനകാര്യ മേഖലയിലാണ് പ്രവർത്തിക്കുന്നത്. കുടുംബത്തിലെ ഇളയ അംഗമായ മകൾ  ബിരുദപഠനം കഴിഞ്ഞു.

കലയെ ജീവിതമായി കണ്ട്, ഇരുപത്തിനാലുമണിക്കൂറും നൃത്തസപര്യയ്ക്കായി മാറ്റിവെച്ച ഡോ. സുനന്ദ നായർക്ക് ലഭിച്ച ഈ കേന്ദ്ര സംഗീത നാടക അക്കാദമി അവാർഡ്, ലോകമെമ്പാടുമുള്ള മലയാളി കലാകാരന്മാർക്ക് വലിയൊരു പ്രചോദനമാണ്.

see also: https://www.emalayalee.com/vartha/266794