തിരുവനന്തപുരം: സണ്ണി ജോസഫ് മന്ത്രിസഭയിലേക്ക് മാറിയതോടെ ഒഴിവുവന്ന കെപിസിസി അധ്യക്ഷ സ്ഥാനത്തേക്ക് പുതിയ നേതാവിനെ കണ്ടെത്താനുള്ള ചർച്ചകൾ കോൺഗ്രസ് ഹൈക്കമാൻഡിൽ ഊർജ്ജിതമായി. പുതിയ അധ്യക്ഷനെ നിശ്ചയിക്കുന്നതിൽ മുഖ്യമന്ത്രി വി.ഡി. സതീശൻ, മുൻ കെപിസിസി പ്രസിഡന്റ് വി.എം. സുധീരൻ എന്നിവരുടെ നിലപാടുകൾ നിർണായകമാകും. സംഘടനയിലും ഭരണത്തിലും തന്റെ സ്വാധീനം ഉറപ്പിക്കുന്നതിന്റെ ഭാഗമായി ലോക്സഭാ ചീഫ് വിപ്പ് കൊടിക്കുന്നിൽ സുരേഷിനെ അധ്യക്ഷനാക്കാനാണ് സതീശൻ-സുധീരൻ ക്യാമ്പ് നീക്കം നടത്തുന്നത്. ഭാവിയിൽ മുഖ്യമന്ത്രി സ്ഥാനത്തിനായി വി.ഡി. സതീശനും കോൺഗ്രസ് ജനറൽ സെക്രട്ടറി കെ.സി. വേണുഗോപാലും തമ്മിൽ നിലനിൽക്കുന്ന രാഷ്ട്രീയ മത്സരത്തിനിടയിലാണ് ഈ പുതിയ സമവാക്യം രൂപപ്പെട്ടിരിക്കുന്നത്. ന്യൂഡൽഹിയിൽ സതീശന് വേണ്ടി സുധീരൻ നടത്തുന്ന ശക്തമായ ലോബിയിംഗ് ഇരുവരും തമ്മിലുള്ള അടുപ്പം വർദ്ധിപ്പിച്ചിട്ടുണ്ട്.

​എട്ടുതവണ എംപിയായ കൊടിക്കുന്നിൽ സുരേഷിന് പുറമെ, മുൻ യുഡിഎഫ് കൺവീനർ ബെന്നി ബെഹനാൻ എംപിയാണ് നിലവിൽ പരിഗണനയിലുള്ള മറ്റൊരു പ്രമുഖ നേതാവ്. പുതിയ സാഹചര്യത്തിൽ കൊടിക്കുന്നിലും ബെന്നി ബെഹനാനും തമ്മിലുള്ള നേരിട്ടുള്ള പോരാട്ടത്തിനാണ് കെപിസിസിയിൽ കളമൊരുങ്ങുന്നത്. സതീശൻ തന്റെ നിലപാട് ഇതിനകം തന്നെ ഹൈക്കമാൻഡിനെ ഔദ്യോഗികമായി അറിയിച്ചിട്ടുണ്ട്. കഴിഞ്ഞ തവണ സണ്ണി ജോസഫിനെ നിയമിച്ചപ്പോഴും കൊടിക്കുന്നിൽ അവസാന നിമിഷം വരെ സജീവമായി രംഗത്തുണ്ടായിരുന്നു. നിയമിക്കപ്പെടുകയാണെങ്കിൽ കെപിസിസിയുടെ ചരിത്രത്തിലെ ആദ്യ ദലിത് പ്രസിഡന്റാകും കൊടിക്കുന്നിൽ സുരേഷ്. എന്നാൽ, മുൻപ് നിയമസഭാ തെരഞ്ഞെടുപ്പ് വേളയിൽ തനിക്ക് ലഭിച്ച ഉറപ്പിന്റെ പിൻബലത്തിലാണ് ബെന്നി ബെഹനാന്റെ അവകാശവാദം.

​കൊടിക്കുന്നിലിനെ അധ്യക്ഷസ്ഥാനത്തേക്ക് ഉയർത്തിക്കാട്ടുന്നതിലൂടെ കെ.സി. വേണുഗോപാൽ പക്ഷത്തെ പ്രതിരോധിക്കാനും സംസ്ഥാനത്ത് പുതിയൊരു സോഷ്യൽ എൻജിനീയറിങ് ഫോർമുല നടപ്പിലാക്കാനും സതീശൻ ക്യാമ്പ് ലക്ഷ്യമിടുന്നു. പട്ടികജാതി, പിന്നാക്ക വിഭാഗങ്ങളിലെ നേതാക്കൾക്ക് പാർട്ടിയിലും സർക്കാരിലും അർഹമായ പ്രാധാന്യം നൽകണമെന്ന എഐസിസി പ്രസിഡന്റ് മല്ലികാർജുൻ ഖാർഗെയുടെ താല്പര്യവും കൊടിക്കുന്നിലിന് അനുകൂല ഘടകമാണ്. അതേസമയം, വി.എം. സുധീരനെ കേരള ഭരണപരിഷ്കാര കമ്മീഷൻ ചെയർമാനായി നിയമിക്കാൻ സർക്കാർ ആലോചിക്കുന്ന പശ്ചാത്തലത്തിൽ, സുധീരനുമായി സതീശൻ പുലർത്തുന്ന അമിത അടുപ്പത്തിൽ പാർട്ടിയിലെ ഒരു വിഭാഗത്തിന് വിയോജിപ്പുണ്ട്. ഉമ്മൻചാണ്ടി സർക്കാരിന്റെ കാലത്ത് സുധീരൻ കെപിസിസി പ്രസിഡന്റായിരുന്നപ്പോഴത്തെ തർക്കങ്ങൾ ചൂണ്ടിക്കാണിച്ചാണ് ഇവർ ആശങ്ക പ്രകടിപ്പിക്കുന്നത്.

​അന്തിമ തീരുമാനം പ്രഖ്യാപിച്ചിട്ടില്ലെങ്കിലും ഭരണവും സംഘടനയും തമ്മിലുള്ള സന്തുലിതാവസ്ഥ നിലനിർത്താൻ മുഖ്യമന്ത്രിയുടെ അഭിപ്രായം ഹൈക്കമാൻഡ് പൂർണ്ണമായും മാനിക്കുമെന്നാണ് റിപ്പോർട്ടുകൾ. നിലവിലെ പ്രത്യേക സാഹചര്യത്തിൽ ആരെ മുന്നോട്ട് വെയ്ക്കണം എന്ന കാര്യത്തിൽ കെ.സി. വേണുഗോപാൽ പക്ഷത്ത് അനിശ്ചിതത്വം നിലനിൽക്കുകയാണ്. ഇതോടെയാണ് കൊടിക്കുന്നിലും ബെന്നി ബെഹനാനും തമ്മിലുള്ള മത്സരം അനിവാര്യമായി മാറിയത്. വരും ദിവസങ്ങളിൽ ഡൽഹി കേന്ദ്രീകരിച്ച് നടക്കുന്ന ഹൈക്കമാൻഡ് ചർച്ചകൾക്ക് ശേഷമേ സംസ്ഥാന കോൺഗ്രസിലെ അധികാര സന്തുലിതാവസ്ഥ നിർണ്ണയിക്കുന്ന അന്തിമ പ്രഖ്യാപനം ഉണ്ടാവുകയുള്ളൂ.