ഫ്രിസ്കോ (ടെക്സസ്): കുടിയേറ്റവുമായി ബന്ധപ്പെട്ട പ്രതിഷേധത്തിനിടെ ഇന്ത്യൻ ദേശീയപതാക കീറിമുറിച്ച സംഭവത്തെ തുടർന്ന് ടെക്സസിലെ ഫ്രിസ്കോ നഗരത്തിൽ വിവാദം ശക്തമായി. ഫ്രിസ്കോ സിറ്റി ഹാളിന് പുറത്ത് നടന്ന പ്രതിഷേധത്തിനിടെയാണ് സംഭവം അരങ്ങേറിയത്. സാമൂഹിക മാധ്യമങ്ങളിൽ വ്യാപകമായി പ്രചരിച്ച വീഡിയോയിൽ ക്ലേട്ടൺ വാക്കർ എന്നയാൾ ഇന്ത്യൻ ത്രിവർണ പതാക കീറിമുറിക്കുന്നതും അതേസമയം പ്രതിഷേധക്കാരിൽ നിന്ന് ഇന്ത്യാവിരുദ്ധ മുദ്രാവാക്യങ്ങൾ ഉയരുന്നതും കാണാം.
 

വീഡിയോ പുറത്തുവന്നതിന് പിന്നാലെ ഇന്ത്യൻ-അമേരിക്കൻ സമൂഹത്തിൽ നിന്നും മറ്റ് സാമൂഹിക മാധ്യമ ഉപയോക്താക്കളിൽ നിന്നും ശക്തമായ പ്രതിഷേധമാണ് ഉയർന്നത്. കുടിയേറ്റ നയങ്ങളുമായി ബന്ധപ്പെട്ട അഭിപ്രായവ്യത്യാസങ്ങൾ ഒരു മുഴുവൻ സമൂഹത്തെയോ ജനവിഭാഗത്തെയോ ലക്ഷ്യമാക്കി പ്രകടിപ്പിക്കരുതെന്ന് നിരവധി പേർ അഭിപ്രായപ്പെട്ടു.

അമേരിക്കൻ സമ്പദ്‌വ്യവസ്ഥയ്ക്കും ശാസ്ത്ര-സാങ്കേതിക രംഗങ്ങൾക്കും ഇന്ത്യൻ കുടിയേറ്റക്കാരും ഇന്ത്യൻ-അമേരിക്കക്കാരും നൽകിയ സംഭാവനകൾ പലരും ചൂണ്ടിക്കാട്ടി. കുടിയേറ്റ വിഷയങ്ങളിലെ ചർച്ചകൾ പ്രത്യേക ജനവിഭാഗങ്ങളെ ലക്ഷ്യമിടാതെ നയപരമായ വിഷയങ്ങളിൽ മാത്രം കേന്ദ്രീകരിക്കണമെന്നും വിമർശകർ ആവശ്യപ്പെട്ടു.

സംഭവം ഫ്രിസ്കോയിലും സമീപ പ്രദേശങ്ങളിലുമുള്ള ജനസംഖ്യാപരമായ മാറ്റങ്ങളെക്കുറിച്ചുള്ള ചർച്ചകൾക്കും വീണ്ടും വഴിവെച്ചിരിക്കുകയാണ്. സമീപ വർഷങ്ങളിൽ ഉത്തര ടെക്സസിലെ ഫ്രിസ്കോ ഉൾപ്പെടെയുള്ള പ്രദേശങ്ങളിൽ ഇന്ത്യൻ-അമേരിക്കൻ ജനസംഖ്യ ഗണ്യമായി വർധിച്ചിട്ടുണ്ട്. ഈ വളർച്ചയും അതിന്റെ പ്രാദേശിക വിഭവങ്ങളിലുള്ള സ്വാധീനവും സംബന്ധിച്ച ചർച്ചകൾ പൊതുയോഗങ്ങളിൽ പതിവായി ഉയരുന്ന വിഷയങ്ങളാണ്.

അടുത്തിടെ ഫ്രിസ്കോ സിറ്റി കൗൺസിൽ യോഗങ്ങളിൽ ചിലർ ഇന്ത്യൻ അധിനിവേശം എന്ന തരത്തിൽ വിശേഷിപ്പിച്ച പ്രസ്താവനകൾ നടത്തിയതും വിവാദമായിരുന്നു. എന്നാൽ ഇത്തരം പരാമർശങ്ങൾ വിഭജനപരവും തെറ്റിദ്ധരിപ്പിക്കുന്നതുമാണെന്ന് പ്രാദേശിക നേതാക്കളും സമൂഹ പ്രതിനിധികളും തിരിച്ചടിച്ചിരുന്നു. വീഡിയോ പ്രചരിച്ചതിന് പിന്നാലെ തനിക്ക് ഭീഷണി സന്ദേശങ്ങൾ ലഭിച്ചുവെന്ന് ക്ലേട്ടൺ വാക്കർ സാമൂഹിക മാധ്യമങ്ങളിലൂടെ അറിയിച്ചു. തന്റെ നടപടി അഭിപ്രായസ്വാതന്ത്ര്യത്തിന്റെ ഭാഗമാണെന്നാണ് അദ്ദേഹം വിശദീകരിച്ചത്. ലഭിച്ചതായി അവകാശപ്പെടുന്ന ഒരു ഭീഷണി സന്ദേശത്തിന്റെ സ്ക്രീൻഷോട്ടും അദ്ദേഹം പങ്കുവെച്ചിട്ടുണ്ട്. സംഭവത്തെക്കുറിച്ച് കൂടുതൽ വിശദീകരണം പിന്നീട് നൽകുമെന്നും വാക്കർ അറിയിച്ചു. അഭിപ്രായസ്വാതന്ത്ര്യത്തിന്റെയും വിദ്വേഷപരമായ പെരുമാറ്റത്തിന്റെയും അതിർവരമ്പുകളെക്കുറിച്ചുള്ള സംവാദങ്ങളും ഇതോടെ ശക്തമായിട്ടുണ്ട്.