സാൻ ഫ്രാൻസിസ്കോ: കാലിഫോർണിയയിലെ 11-ാം കോൺഗ്രസ് ഡിസ്ട്രിക്ടിൽ നിന്ന് മത്സരിച്ച ഇന്ത്യൻ വംശജനും സാങ്കേതിക സംരംഭകനുമായ സൈകത് ചക്രബർത്തി തിരഞ്ഞെടുപ്പ് മത്സരത്തിൽ നിന്ന് പിന്മാറി. പ്രാഥമിക തിരഞ്ഞെടുപ്പിൽ സ്റ്റേറ്റ് സെനറ്റർ സ്കോട്ട് വീനറിനും സാൻ ഫ്രാൻസിസ്കോ സൂപ്പർവൈസർ കോന്നി ചാനിനും പിന്നിലായതോടെയാണ് പിന്മാറ്റം.
 

ഏകദേശം നാല് പതിറ്റാണ്ടോളം സാൻ ഫ്രാൻസിസ്കോയെ പ്രതിനിധീകരിച്ച ശേഷം വിരമിക്കുന്ന മുൻ സ്പീക്കർ നാൻസി പെലോസിയുടെ പിൻഗാമിയാകുക എന്ന ലക്ഷ്യത്തോടെയായിരുന്നു ചക്രബർത്തി രംഗത്തെത്തിയത്. എന്നാൽ കാലിഫോർണിയയിലെ 'ടോപ്പ്-ടു' പ്രൈമറി സമ്പ്രദായത്തിൽ ഏറ്റവും കൂടുതൽ വോട്ടുകൾ നേടിയ സ്കോട്ട് വീനറും കോന്നി ചാനും നവംബറിൽ നടക്കുന്ന പൊതുതിരഞ്ഞെടുപ്പിലേക്ക് മുന്നേറി.

ജൂൺ 3-ന് നടത്തിയ പ്രഖ്യാപനത്തിലാണ് ചക്രബർത്തി തന്റെ പ്രചാരണം അവസാനിപ്പിക്കുന്നതായി അറിയിച്ചത്. വിജയികളായ സ്കോട്ട് വീനറിനെയും കോന്നി ചാനിനെയും അദ്ദേഹം അഭിനന്ദിക്കുകയും തിരഞ്ഞെടുപ്പിൽ പങ്കെടുത്ത എല്ലാവർക്കും നന്ദി അറിയിക്കുകയും ചെയ്തു.പ്രാഥമിക ഫലങ്ങൾ പ്രകാരം സ്കോട്ട് വീനർ 41 ശതമാനത്തിലധികം വോട്ടുകൾ നേടി ഒന്നാം സ്ഥാനത്തെത്തി. കോന്നി ചാൻ ഏകദേശം 29 ശതമാനം വോട്ടുകളുമായി രണ്ടാം സ്ഥാനത്തും സൈകത് ചക്രബർത്തി 15 ശതമാനത്തോളം വോട്ടുകളുമായി മൂന്നാം സ്ഥാനത്തുമായിരുന്നു. കോന്നി ചാനെ മുൻ സ്പീക്കർ നാൻസി പെലോസി തുറന്ന് പിന്തുണച്ചിരുന്നു.

ഓൺലൈൻ പേയ്മെന്റ് കമ്പനിയായ സ്ട്രൈപ്പിലെ മുൻ എൻജിനീയറായിരുന്ന ചക്രബർത്തി പിന്നീട് കോൺഗ്രസ് അംഗമായിരുന്ന അലക്‌സാൻഡ്ര ഒകാസിയോ കോർട്ടസിന്റെ  ചീഫ് ഓഫ് സ്റ്റാഫായും പ്രവർത്തിച്ചിരുന്നു.തിരഞ്ഞെടുപ്പിൽ കൃത്രിമ ബുദ്ധി (AI), ക്രിപ്റ്റോകറൻസി മേഖലകൾ, അമേരിക്കൻ ഇസ്രയേൽ പബ്ലിക് അഫയേഴ്സ് കമ്മിറ്റി (എഐപിഎസി) എന്നിവയുമായി ബന്ധപ്പെട്ട വൻതോതിലുള്ള ധനസഹായത്തെ മറികടക്കാൻ തന്റെ പ്രചാരണത്തിന് സാധിച്ചില്ലെന്ന് അദ്ദേഹം അഭിപ്രായപ്പെട്ടു.

അതേസമയം, സന്നദ്ധപ്രവർത്തകരുടെയും അനുഭാവികളുടെയും പിന്തുണയ്ക്ക് നന്ദി രേഖപ്പെടുത്തിയ ചക്രബർത്തി, സാൻ ഫ്രാൻസിസ്കോയുടെ ചരിത്രത്തിലെ ഏറ്റവും വലിയ ജനകീയ പ്രചാരണ ശൃംഖലകളിലൊന്ന് കെട്ടിപ്പടുക്കാൻ തന്റെ സംഘത്തിന് കഴിഞ്ഞതായി പറഞ്ഞു. നഗരവും രാജ്യവും നേരിടുന്ന വെല്ലുവിളികൾ തുടരുകയാണെന്നും പുരോഗമന രാഷ്ട്രീയ പ്രസ്ഥാനത്തിന് വേണ്ടിയുള്ള പ്രവർത്തനം ഇനിയും തുടരുമെന്നും അദ്ദേഹം വ്യക്തമാക്കി. ഇൻസ്റ്റഗ്രാമിലൂടെ നടത്തിയ പ്രതികരണത്തിലും തിരഞ്ഞെടുപ്പ് പ്രചാരണം അവസാനിച്ചെങ്കിലും അതിന്റെ ലക്ഷ്യങ്ങളും ആശയങ്ങളും മുന്നോട്ടുകൊണ്ടുപോകുമെന്ന നിലപാട് അദ്ദേഹം ആവർത്തിച്ചു.