ന്യൂയോർക്ക്: നോർത്ത് അമേരിക്കയിൽ നിന്ന് ആദ്യമായി ക്നാനായ സമുദായത്തിനും പ്രത്യേകിച്ച് കോട്ടയം രൂപതയ്ക്കും വേണ്ടി പൗരോഹിത്യം സ്വീകരിക്കുന്ന  ബ്രദർ മോസസ് സ്റ്റീഫൻ പുതുപ്പള്ളിമ്മ്യാലിലിന്റെ പൗരോഹിത്യ സ്വീകരണ ശുശ്രൂഷകളും നവപൂജാ അർപ്പണവും 2026 ജൂൺ 27-ാം തീയതി  ന്യൂയോർക്കിലെ   സെന്റ് സ്റ്റീഫൻസ് ക്നാനായ കാത്തലിക് ഫൊറോനാ പള്ളിയിൽ  നടത്തപ്പെടുന്നു.

കോട്ടയം അതിരൂപതാ മെത്രാപ്പോലീത്ത ആർച്ച്ബിഷപ്പ് മാർ മാത്യു മൂലക്കാട്ട് മുഖ്യകാർമ്മികത്വം വഹിക്കുന്ന ശുശ്രൂഷയിൽ, കൈവയ്പ്പ് പ്രാർത്ഥനയിലൂടെ ഡീക്കൻ മോസസ് പൗരോഹിത്യം സ്വീകരിക്കും.

ഈ ശുശ്രൂഷയിൽ ചിക്കാഗോ രൂപതാദ്ധ്യക്ഷൻ അഭിവന്ദ്യ മാർ ജോയ് ആലപ്പാട്ട് പിതാവ് സഹകാർമ്മികനായിരിക്കുകയും, അന്നേ ദിവസത്തെ സന്ദേശം നൽകുകയും ചെയ്യും.

ക്നാനായ റീജിയൻ ഡയറക്ടറും ചിക്കാഗോ രൂപത പ്രോട്ടോസിഞ്ചെല്ലൂസുമായ ബഹുമാനപ്പെട്ട തോമസ് മുളവനാൽ അച്ചൻ ആർച്ച്ഡീക്കനായിരിക്കും. ഈ ധന്യനിമിഷത്തിന് സാക്ഷ്യം വഹിക്കാൻ ക്നാനായ റീജിയനിലെ വൈദികർ, സിസ്റ്റേഴ്സ്, സെമിനാരി വൈദികർ, വിദ്യാർത്ഥികൾ, ന്യൂയോർക്ക് മേഖലയിലെ മറ്റ് മലയാളി വൈദികർ എന്നിവരും ഒത്തുചേരും.

നോർത്ത് അമേരിക്കൻ ക്നാനായ സമൂഹത്തിനും കോട്ടയം അതിരൂപതയ്ക്കും ചരിത്രപരമായ ഒരു സുവർണ്ണ മുഹൂർത്തമായി മാറുന്ന ഈ പവിത്രമായ ചടങ്ങിനെ ഭക്തിപൂർവ്വം വരവേൽക്കാൻ ഇടവക സമൂഹം ഒന്നടങ്കം പ്രാർത്ഥനാപൂർവ്വം ഒരുങ്ങിക്കൊണ്ടിരിക്കുകയാണ്.