ഹൂസ്റ്റൺ: വേൾഡ് മലയാളി കൗൺസിൽ (WMC) അമേരിക്ക റീജിയന്റെ പ്രസിഡന്റായി പിന്റോ കണ്ണമ്പള്ളി തിരഞ്ഞെടുക്കപ്പെട്ടു. വിവിധ പ്രൊവിൻസുകളിലെ പ്രതിനിധികളും അംഗങ്ങളും നൽകിയ ഏകകണ്ഠ പിന്തുണയോടെയാണ് പുതിയ നേതൃത്വം രൂപം കൊണ്ടത്.

പുതുപുത്തൻ ആശയങ്ങളും നൂതന പദ്ധതികളും അവതരിപ്പിച്ച്, വ്യത്യസ്ത പരിപാടികൾ വഴി അമേരിക്കയിലെ സംഘടനയുടെ പ്രവർത്തനങ്ങളിൽ ശക്തമായ സാന്നിധ്യമായി മാറാൻ പോകുകയാണെന്ന് പുതുതായി ചുമതലയേറ്റ വേൾഡ് മലയാളി കൗൺസിൽ (WMC) അമേരിക്ക റീജിയൻ പ്രസിഡന്റ് പിന്റോ കണ്ണമ്പള്ളി പറഞ്ഞു.

ലോകമെമ്പാടുമുള്ള മലയാളികളെ ഭാഷ, സംസ്കാരം, പാരമ്പര്യം, സാമൂഹിക പ്രതിബദ്ധത എന്നിവയുടെ അടിസ്ഥാനത്തിൽ ഒരുമിപ്പിക്കുന്ന അന്തർദേശീയ സംഘടനയായ വേൾഡ് മലയാളി കൗൺസിൽ, വിവിധ രാജ്യങ്ങളിലായി സാംസ്കാരിക, സാമൂഹിക, ജീവകാരുണ്യ പ്രവർത്തനങ്ങളിലൂടെ സജീവ സാന്നിധ്യമാണ്.

പുതിയ പ്രസിഡന്റായി തിരഞ്ഞെടുക്കപ്പെട്ടതിന് പിന്നാലെ പ്രതികരിച്ച പിന്റോ കണ്ണമ്പള്ളി, സംഘടനയിലെ നേതാക്കളോടും പ്രവർത്തകരോടും അംഗങ്ങളോടും നന്ദി രേഖപ്പെടുത്തി. അമേരിക്ക റീജിയന്റെ പ്രവർത്തനങ്ങൾക്ക് കൂടുതൽ ഐക്യം, സുതാര്യത, കാര്യക്ഷമത എന്നിവ നൽകുന്ന നേതൃത്വമായിരിക്കും ലക്ഷ്യമെന്ന് അദ്ദേഹം വ്യക്തമാക്കി.

അടുത്ത രണ്ട് വർഷം പ്രൊവിൻസുകൾ തമ്മിലുള്ള ഏകോപനം ശക്തിപ്പെടുത്തുകയും അംഗങ്ങളുടെ സജീവ പങ്കാളിത്തം വർധിപ്പിക്കുകയും ചെയ്യുന്നതിന് പ്രത്യേക പദ്ധതികൾ ആവിഷ്കരിക്കുമെന്ന് അദ്ദേഹം പറഞ്ഞു. യുവജനങ്ങൾക്കും യുവ പ്രൊഫഷണലുകൾക്കും കൂടുതൽ നേതൃത്വ അവസരങ്ങൾ സൃഷ്ടിക്കുക എന്നത് സംഘടനയുടെ ഭാവി വളർച്ചയ്ക്ക് നിർണായകമാണെന്നും അദ്ദേഹം കൂട്ടിച്ചേർത്തു.

അമേരിക്കയിലും കേരളത്തിലും കൂടുതൽ സാമൂഹ്യസേവന-ജീവകാരുണ്യ പദ്ധതികൾ നടപ്പാക്കുന്നതിനും സംഘടനയുടെ പ്രവർത്തനങ്ങളിൽ ഉത്തരവാദിത്വബോധവും സുതാര്യതയും ഉറപ്പാക്കുന്നതിനും പുതിയ നേതൃത്വം മുൻഗണന നൽകും. മലയാള ഭാഷയും സംസ്കാരവും പുതിയ തലമുറയിലേക്ക് കൈമാറുന്നതിനായി ഡിജിറ്റൽ സംവിധാനങ്ങൾ ശക്തിപ്പെടുത്തുന്ന പദ്ധതികളും നടപ്പിലാക്കും.

സംഘടനയുടെ ബൈലോ പ്രകാരം രണ്ട് ടേം വരെ തുടരാനുള്ള അവസരം ഉണ്ടായിരുന്നാലും, സാമൂഹിക-സാംസ്കാരിക സംഘടനകളിൽ പുതിയ ആളുകൾക്ക് നേതൃത്വം നൽകാനുള്ള അവസരങ്ങൾ സൃഷ്ടിക്കപ്പെടണം എന്ന നിലപാടും പിന്റോ കണ്ണമ്പള്ളി പങ്കുവച്ചു.

വേൾഡ് മലയാളി കൗൺസിലിന്റെ വളർച്ചയിൽ പ്രൊവിൻസ് നേതാക്കളുടെയും പ്രവർത്തകരുടെയും വോളണ്ടിയർമാരുടെയും നിസ്വാർത്ഥ സേവനമാണ് പ്രധാന ശക്തിയെന്ന് അദ്ദേഹം ചൂണ്ടിക്കാട്ടി. അവരുടെ പ്രവർത്തനങ്ങൾക്ക് കൂടുതൽ അംഗീകാരവും പിന്തുണയും ഉറപ്പാക്കുന്ന സമീപനമായിരിക്കും പുതിയ നേതൃത്വത്തിന്റേതെന്നും അദ്ദേഹം വ്യക്തമാക്കി.

ഒരു സംഘടനയുടെ ശക്തി ഒരാൾക്കല്ല, മറിച്ച് വിവിധ വ്യക്തികളുടെ കഴിവുകളും അനുഭവങ്ങളും ഒരുമിച്ച് പ്രവർത്തിക്കുമ്പോഴാണ് അതിന്റെ യഥാർത്ഥ വളർച്ച സാധ്യമാകുന്നത്. പുതിയ തലമുറക്കും പുതിയ നേതൃത്വത്തിനും വഴിയൊരുക്കുമ്പോഴാണ് സമൂഹത്തിന് കൂടുതൽ ഗുണം ലഭിക്കുക,” അദ്ദേഹം കൂട്ടിച്ചേർത്തു. തന്റെ നേതൃത്വ ദർശനത്തിലെ പ്രധാന മുൻഗണനകൾ അദ്ദേഹം ഇങ്ങനെ വിശദീകരിച്ചു:

• എല്ലാ പ്രവിശ്യകളിലും കൂടുതൽ ഐക്യവും സഹകരണവും ശക്തിപ്പെടുത്തുക
• യുവജനങ്ങൾക്കും യുവ പ്രൊഫഷണലുകൾക്കും കൂടുതൽ നേതൃത്വ അവസരങ്ങൾ സൃഷ്ടിക്കുക 
• സംഘടനയിൽ സുതാര്യതയും ഉത്തരവാദിത്വബോധവും ഉറപ്പാക്കുക 
• സാമൂഹ്യ സേവന-കാരുണ്യ പ്രവർത്തനങ്ങൾ അമേരിക്കയിലും കേരളത്തിലും വ്യാപിപ്പിക്കുക 
• മലയാള ഭാഷയും സംസ്കാരവും പാരമ്പര്യവും പുതിയ തലമുറയിലേക്ക് കൈമാറുക 
• ഡിജിറ്റൽ സംവിധാനങ്ങൾ ശക്തിപ്പെടുത്തി അംഗങ്ങളുടെ പങ്കാളിത്തം വർധിപ്പിക്കുക 
• സംഘടനയുടെ നെടുംതൂണായ പ്രവർത്തകരെയും വോളണ്ടിയർമാരെയും ആദരിക്കുകയും പ്രോത്സാഹിപ്പിക്കുകയും ചെയ്യുക
“നേതൃത്വം ഒരു പദവി അല്ല; അത് സമൂഹത്തിനുള്ള സേവനമാണ്. എല്ലാവരെയും കേൾക്കുകയും ഒരുമിച്ച് മുന്നോട്ട് കൊണ്ടുപോകുകയും ചെയ്യുന്നതാണ് എന്റെ പ്രവർത്തന ശൈലി,” അദ്ദേഹം പറഞ്ഞു.  

ഐക്യം, ഉൾക്കൊള്ളൽ, സേവന മനോഭാവം, യുവശക്തിയുടെ പങ്കാളിത്തം എന്നിവ മുൻനിർത്തി അമേരിക്ക റീജിയനെ കൂടുതൽ ശക്തവും സജീവവും മാതൃകാപരവുമായ ഘടകമാക്കി ഉയർത്തുകയാണ് പുതിയ നേതൃത്വത്തിന്റെ ലക്ഷ്യം.

അമേരിക്കൻ റീജിയന്റെ പുതിയ ഭാരവാഹികൾ:

• ചെയർമാൻ – ജോണി കുന്നംപുറം (ഡാളസ്)
• പ്രസിഡന്റ് – പിന്റോ കണ്ണമ്പള്ളി (സൗത്ത് ജേഴ്‌സി)
• ജനറൽ സെക്രട്ടറി – അനീഷ് ജെയിംസ് (സൗത്ത് ജേഴ്‌സി)
• ട്രഷറർ – നിവിൻ വിൽഫ്രഡ് (ഒന്റാറിയോ, കാനഡ)
• വൈസ് പ്രസിഡന്റ് (അഡ്മിൻ) – ജേക്കബ് എഫ്രേം (കാലിഫോർണിയ)
• വൈസ് പ്രസിഡന്റ് – ജോസ് ആറ്റുപുറം (ഫിലാഡൽഫിയ)
• വൈസ് ചെയർപേഴ്സൺ – മിനി നായർ (സതേൺ ആൽബർട്ട)
• വൈസ് ചെയർമാൻ – ജെയിംസ് പീറ്റർ (ഫിലാഡൽഫിയ)
• ജോയിന്റ് സെക്രട്ടറി – സ്മിതാമോൾ ജി. തോമസ് (ഫ്ലോറിഡ)
• വിമൻസ് ഫോറം പ്രസിഡന്റ് – ഡോ. സൂസൻ ചാണ്ടി (സതേൺ ആൽബർട്ട)
• വിമൻസ് ഫോറം സെക്രട്ടറി – ആലീസ് മാഞ്ചേരി (ഫ്ലോറിഡ)
• യൂത്ത് ഫോറം പ്രസിഡന്റ് – ബിബി മോഹൻ (സതേൺ ആൽബർട്ട)