സമൂഹമാധ്യമങ്ങളില്‍ പ്രചരിക്കുന്ന വ്യാജപോസ്റ്റുകള്‍ക്കെതിരെ ആന്റണി വര്‍ഗീസ് (പെപ്പെ) രംഗത്ത്. പെപ്പെയുടെ പേരിലുള്ള ഫാന്‍സ് ഫേസ്ബുക്ക് പേജില്‍ നിന്നാണ് 'ദൃശ്യം 3' സിനിമയുടെ പിആര്‍ ടീം കാട്ടാളനെതിരെ പ്രവര്‍ത്തിക്കുന്ന രീതിയിലുള്ള പോസ്റ്റ് വന്നത്.

ഇതിനെതിരെയാണ് പെപ്പെ രംഗത്തെത്തിയത്. 'കാട്ടാളന്‍' സിനിമയെ ചില ഗൂഢ ആള്‍ക്കാര്‍ മനഃപൂര്‍വം നെഗറ്റീവ് പറഞ്ഞു പോസ്റ്റ് ഇട്ട് നശിപ്പിക്കാന്‍ ശ്രമിക്കുന്നുവെന്നും ഒരാഴ്ച മുന്‍പ് ഇറങ്ങിയ ഒരു സീരിയല്‍ നിലവാരം പോലും ഇല്ലാത്ത 'ദൃശ്യം 3'യുടെ പിആര്‍ ടീം ആണ് ഇതിന് പിന്നിലെന്നും അവരുടെ മോശം റിവ്യൂ ആരും വിശ്വസിക്കരുതെന്നുമായിരുന്നു ആന്റണി വര്‍ഗീസ് ഫാന്‍സ് പേജ് എന്ന ഫെയ്‌സ്ബുക്ക് അക്കൗണ്ടില്‍ നിന്നും വന്ന പോസ്റ്റിന്റെ ഉള്ളടക്കം.

തന്റെ ഫാന്‍സ് പേജ് എന്ന പേരില്‍ ഫെയ്‌സ്ബുക്കിലൂടെ തെറ്റായ വിവരങ്ങള്‍ പ്രചരിപ്പിക്കുന്നുവെന്നും പ്രസ്തുത പേജിന് താനുമായോ തന്റെ ആരാധകരുമായോ ബന്ധമില്ലെന്ന് താരം കുറിച്ചു.

''എന്റെ ഫാന്‍ പേജ് എന്ന പേരില്‍ ഒരു വ്യാജ ഫെയ്സ്ബുക്ക് പേജിലൂടെ തെറ്റായ വിവരങ്ങള്‍ പ്രചരിപ്പിക്കുന്നതായി ശ്രദ്ധയില്‍പ്പെട്ടു. ഈ പേജിന് ഞാനുമായോ എന്റെ ആരാധകരുമായോ യാതൊരു ബന്ധവുമില്ലെന്ന് അറിയിക്കുന്നു.

അനാവശ്യമായ ആരോപണങ്ങളും നാടകീയതയും സൃഷ്ടിക്കാനായി ബോധപൂര്‍വം വ്യാജ വാര്‍ത്ത പ്രചരിപ്പിക്കുകയാണിവര്‍. ഇവിടെ പോസ്റ്റ് ചെയ്യുന്നതൊന്നും വിശ്വസിക്കുകയോ പങ്കുവെക്കുകയോ ഇതുമായി ഇടപെടുകയോ ചെയ്യരുത്. ഇക്കാര്യം ശ്രദ്ധയില്‍പെടുത്തിയവര്‍ക്ക് നന്ദി.''- ആന്റണി വര്‍ഗീസ് കുറിച്ചു.