വാഷിംഗ്ടൺ: ന്യൂയോർക്കിലെ റോക്ക്   ലാൻഡ്മേഖലയിലെ റാലിയിൽ പ്രസിഡന്റ് ഡൊണാൾഡ് ട്രംപ് വീണ്ടും ശക്തമായ കുടിയേറ്റ വിരുദ്ധ നിലപാട് ആവർത്തിച്ചു. അനധികൃത കുടിയേറ്റവും സാങ്ക്ച്വറി സിറ്റി നയങ്ങളും അമേരിക്കയിലെ കുറ്റകൃത്യങ്ങളും സാമ്പത്തിക തകർച്ചയും വർധിപ്പിക്കുന്നുവെന്നാണ് ട്രംപ് ആരോപിച്ചത്. 

റോക്‌ലാൻഡ് കമ്മ്യൂണിറ്റി കോളേജിലെ യൂജിൻ ലെവി ഫീൽഡ് ഹൗസിൽ നടന്ന റാലിയിൽ സംസാരിക്കവേ, ഉയർന്ന നികുതിയും കുറ്റകൃത്യങ്ങളും കാരണം ന്യൂയോർക്കിൽ നിന്ന് കമ്പനികളും സമ്പന്നരും ഒഴിഞ്ഞുപോകുകയാണെന്ന് ട്രംപ് പറഞ്ഞു. പ്രസംഗത്തിനിടെ ട്രംപ് ആവർത്തിച്ച് സാങ്ക്ച്വറി സിറ്റി നയങ്ങളെ വിമർശിക്കുകയും അനധികൃത കുടിയേറ്റത്തെ അക്രമകൃത്യങ്ങളുമായി ബന്ധിപ്പിക്കുകയും ചെയ്തു. ഈ വർഷം ചിക്കാഗോയിൽ കൊല്ലപ്പെട്ട ന്യൂയോർക്ക് കോളേജ് വിദ്യാർത്ഥിനി ഷെറിഡൻ ഗോർമന്റെ കുടുംബത്തെയും ട്രംപ് വേദിയിലേക്ക് ക്ഷണിച്ചു. ന്യൂയോർക്ക് സംസ്ഥാന ബജറ്റിൽ ഫെഡറൽ ഇമിഗ്രേഷൻ നടപടികളെ തടസ്സപ്പെടുത്തുന്ന വ്യവസ്ഥകൾ ഉൾപ്പെടുത്തിയിട്ടുണ്ടെന്നും ട്രംപ് ആരോപിച്ചു. “ഇത് ന്യൂയോർക്കിനെ കൂടുതൽ അപകടകരമായ സാങ്ക്ച്വറി സംസ്ഥാനമാക്കുകയാണ്,” എന്നും അദ്ദേഹം പറഞ്ഞു. റാലിക്കിടെ ട്രംപ്  സേവ് അമേരിക്ക ആക്ടിന് പിന്തുണ പ്രഖ്യാപിക്കുകയും വോട്ടർ ഐഡി നിർബന്ധമാക്കൽ, പൗരത്വ തെളിവ്, മെയിൽ-ഇൻ വോട്ടിംഗിന് കൂടുതൽ നിയന്ത്രണങ്ങൾ എന്നിവ ആവശ്യപ്പെടുകയും ചെയ്തു.

സാമ്പത്തിക വിഷയങ്ങളും പ്രസംഗത്തിൽ പ്രധാനമായി ഇടംപിടിച്ചു. കോൺഗ്രസ് അംഗം മൈക്ക് ലോളറെ പ്രശംസിച്ച ട്രംപ്, സ്റ്റേറ്റ്-ലോകൽ ടാക്സ് (SALT) ഇളവുകൾ പുനഃസ്ഥാപിക്കാൻ അദ്ദേഹത്തിന്റെ ഇടപെടൽ സഹായകമായതായി പറഞ്ഞു. ജനറൽ മോട്ടോഴ്സ്, മൈക്രോൺ പോലുള്ള കമ്പനികളുടെ ന്യൂയോർക്ക് നിക്ഷേപ പദ്ധതികളെയും ട്രംപ് പരാമർശിച്ചു. അമേരിക്കൻ കമ്പനികൾ ചരിത്രത്തിലെ ഏറ്റവും ഉയർന്ന നിരക്കിൽ നിക്ഷേപങ്ങൾ വികസിപ്പിക്കുകയാണെന്നും അദ്ദേഹം അവകാശപ്പെട്ടു.

അമേരിക്കൻ അതിർത്തി നിയന്ത്രണത്തിൽ തന്റെ ഭരണകൂടം വിജയിച്ചുവെന്നും കഴിഞ്ഞ 12 മാസത്തിനിടെ “ഒരാളെയും അനധികൃതമായി പ്രവേശിപ്പിച്ചിട്ടില്ല” എന്നും ട്രംപ് അവകാശപ്പെട്ടു. വിദേശനയ വിഷയങ്ങളിലും ട്രംപ് പരാമർശങ്ങൾ നടത്തി. ഇറാൻ ഒരിക്കലും ആണവായുധം കൈവശം വയ്ക്കില്ലെന്നും അടുത്തിടെ നടന്ന അമേരിക്കൻ സൈനിക നടപടികൾക്ക് ശേഷം ഇറാൻ ചർച്ചകൾക്ക് താത്പര്യം പ്രകടിപ്പിച്ചുവെന്നും അദ്ദേഹം പറഞ്ഞു.

സെപ്റ്റംബർ 11 ആക്രമണത്തിൽ നിരവധി ജീവനുകൾ രക്ഷിച്ച “മാൻ ഇൻ ദ റെഡ് ബന്ദാന” എന്നറിയപ്പെട്ട വെല്ലസ് ക്രൗതറിന് മരണാനന്തരമായി പ്രസിഡൻഷ്യൽ മെഡൽ ഓഫ് ഫ്രീഡം നൽകുമെന്ന് ട്രംപ് പ്രഖ്യാപിച്ചതും റാലിയിലെ വികാരനിർഭര നിമിഷമായി. അതേസമയം, ന്യൂയോർക്ക് ഗവർണർ സ്ഥാനത്തേക്ക് റിപ്പബ്ലിക്കൻ നേതാവ് ബ്രൂസ് ബ്ലേക്ക്‌മാനെ ട്രംപ് ഔദ്യോഗികമായി പിന്തുണച്ചു. “അദ്ദേഹം ന്യൂയോർക്കിനെ വേഗത്തിൽ മാറ്റിമറിക്കും,” എന്നും ട്രംപ് പറഞ്ഞു.