ന്യൂയോർക്ക്: ഇന്ത്യൻ നഴ്സസ് അസോസിയേഷൻ ഓഫ് ന്യൂ യോർക്കിന്റെ (INANY) ആഭിമുഖ്യത്തിൽ 2026 മേയ് 9-ാം തീയതി ശനിയാഴ്ച നഴ്സസ് ദിനാഘോഷം വിപുലമായ പരിപാടികളോടെ കൊണ്ടാടി . ന്യൂയോർക്കിലെ എൽമോണ്ടിലുള്ള കേരള സെന്ററിൽ (1824 Fairfax Street, Elmont, NY 11003) രാവിലെ 10:00 മണി മുതൽ ഉച്ചയ്ക്ക് 2:00 മണി വരെയുള്ള വിവിധ പരിപാടികൾക്ക്  INANY പ്രസിഡന്റ് ഡോ. ഷൈല റോഷിൻ നേതൃത്വം നൽകി. പ്രമുഖ അവയവദാന സംഘടനയായ 'LiveOnNY' പ്രസിഡന്റും സി.ഇ.ഒയുമായ ലിയോണാർഡ് അച്ചൻ -Leonard Achan- (RN, MA, ANP) ചടങ്ങിൽ മുഖ്യാതിഥിയായിരുന്നു. അമേരിക്കൻ ആരോഗ്യരംഗത്ത് ഇന്ത്യൻ നഴ്സുമാർ നൽകുന്ന സമാനതകളില്ലാത്ത സംഭാവനകളെ അദ്ദേഹം തന്റെ മുഖ്യപ്രഭാഷണത്തിൽ എടുത്തുപറഞ്ഞു. 

കഠിനാധ്വാനവും കാരുണ്യവും കൈമുതലാക്കിയ ഇന്ത്യൻ നഴ്സിംഗ് സമൂഹം ന്യൂയോർക്കിലെ ആശുപത്രികളുടെ അവിഭാജ്യ ഘടകമാണെന്ന് അദ്ദേഹം ഓർമ്മിപ്പിച്ചു. അവയവദാനത്തിന്റെ (Organ Donation) പ്രാധാന്യത്തെക്കുറിച്ചും, അതിലൂടെ നിരവധി ജീവനുകൾ രക്ഷിക്കുന്നതിൽ നഴ്സുമാർക്ക് വഹിക്കാൻ കഴിയുന്ന നിർണ്ണായക പങ്കിനെക്കുറിച്ചും അദ്ദേഹം ഊന്നിപ്പറഞ്ഞു. മുന്നൂറിലധികം ജീവനക്കാരുള്ള തന്റെ സ്ഥാപനമായ 'LiveOnNY' അവയവദാന ബോധവൽക്കരണത്തിനായി വർഷത്തിൽ 365 ദിവസവും രാപ്പകലില്ലാതെ പ്രവർത്തിക്കുന്നുണ്ടെന്നും അദ്ദേഹം കൂട്ടിച്ചേർത്തു.

അമേരിക്കൻ രാഷ്ട്രീയ രംഗത്തെ പ്രമുഖരായ നിരവധി ജനപ്രതിനിധികൾ ചടങ്ങിൽ സംബന്ധിച്ച് ആശംസകൾ അർപ്പിച്ചു. Hon. എഡ്വേർഡ് സി. ബ്രൗൺസ്റ്റീൻ (അസംബ്ലിമാൻ, NYS അസംബ്ലി ഡിസ്ട്രിക്റ്റ് 26), Hon. മീഷേൽ സി. സോളജസ് (അസംബ്ലി മെമ്പർ, NYS അസംബ്ലി ഡിസ്ട്രിക്റ്റ് 22), Hon. കാരി സോളജസ് (ലെജിസ്ലേറ്റർ,  Nassau County ഡിസ്ട്രിക്റ്റ് 3), Hon. രാഗിണി ശ്രീവാസ്തവ (ടൗൺ ക്ലർക്ക്, ടൗൺ ഓഫ് നോർത്ത് ഹെംപ്സ്റ്റെഡ്) എന്നിവർ ഇതിൽ ഉൾപ്പെടുന്നു.

അവാർഡുകളും സമ്മാനദാനവും: നഴ്സിംഗ് രംഗത്തെ മികവിനെ ആദരിക്കുന്നതിനായി അസോസിയേഷൻ ഈ വർഷത്തെ പുരസ്കാരങ്ങളും പ്രശംസാപത്രങ്ങളും വിതരണം ചെയ്തു. രോഗീപരിചരണം, കമ്മ്യൂണിറ്റി സേവനം എന്നിവ മുൻനിർത്തി തിരഞ്ഞെടുത്ത മികച്ച നഴ്സിംഗ് പ്രൊഫഷണലുകൾക്ക് വിശിഷ്ട വ്യക്തികൾ പുരസ്കാരങ്ങൾ സമ്മാനിച്ചു. 2026-ലെ  'INANY നഴ്സ് എക്സലൻസ് അവാർഡിന്' (INA-NY Nurse Excellence Award 2026) ആന്റോ പോൾ അർഹനായി. സംഘടനയുടെ പ്രവർത്തനങ്ങളിൽ ഗണ്യമായ സംഭാവനകൾ നൽകുകയും പ്രൊഫഷണൽ നഴ്സിംഗ് പ്രാക്ടീസിനോട് മികച്ച പ്രതിബദ്ധത പുലർത്തുകയും ചെയ്യുന്ന അംഗങ്ങളെയാണ് ഓരോ വർഷവും ഈ പുരസ്കാരത്തിനായി തിരഞ്ഞെടുക്കുന്നത്.

ചടങ്ങിനോടനുബന്ധിച്ച് അസോസിയേഷൻ അംഗങ്ങളും അവരുടെ കുടുംബാംഗങ്ങളും അവതരിപ്പിച്ച വൈവിധ്യമാർന്ന കലാപരിപാടികൾ ആഘോഷങ്ങൾക്ക് മാറ്റുകൂട്ടി. നഴ്സസ് ദിനാഘോഷത്തിൽ പങ്കെടുത്തവർക്കായി ഒരുക്കിയ റാഫിൾ നറുക്കെടുപ്പും സമ്മേളനത്തിന് കൂടുതൽ ആവേശവും ഹൃദ്യതയും പകർന്നു.ആരോഗ്യസേവന മേഖലയിൽ ഇന്ത്യൻ നഴ്സുമാർ നൽകുന്ന അതുല്യമായ സംഭാവനകളെയും അവരുടെ അർപ്പണ മനോഭാവത്തെയും ഉയർത്തിക്കാട്ടാൻ ഈ സമ്മേളനം വേദിയൊരുക്കി.