മെയ്ൻ ഗവർണർ സ്ഥാനത്തേക്കുള്ള ഡെമോക്രാറ്റിക് പ്രൈമറി തിരഞ്ഞെടുപ്പിന് മുന്നോടിയായി നടന്ന സർവേയിൽ ഇന്ത്യൻ വംശജനായ നീരവ് ഷാ വൻ മുന്നേറ്റം നടത്തുന്നതായി റിപ്പോർട്ട്.

 ഷൂൺ കൂപ്പർമാൻ റിസർച്ച് നടത്തിയ വോട്ടെടുപ്പ് ഫലമനുസരിച്ച് 28 ശതമാനം വോട്ടർമാരുടെ പിന്തുണയോടെയാണ് നീരവ് ഷാ ഒന്നാമതെത്തിയത്. അദ്ദേഹത്തിന്റെ തൊട്ടടുത്ത എതിരാളിയായ ആംഗസ് കിംഗ് മൂന്നാമന് 19 ശതമാനം പിന്തുണ മാത്രമാണ് നേടാനായത്. ഹന്ന പിംഗ്രീ, ഷീന ബെല്ലോസ് എന്നിവർ 16 ശതമാനം വോട്ടുകളും മുൻ സെനറ്റ് പ്രസിഡന്റ് ട്രോയ് ജാക്സൺ 14 ശതമാനം വോട്ടുകളും നേടി പിന്നിലുണ്ട്.
 

കോവിഡ് കാലത്ത് മെയ്ൻ സെന്റർ ഫോർ ഡിസീസ് കൺട്രോൾ ആൻഡ് പ്രിവൻഷൻ ഡയറക്ടർ എന്ന നിലയിൽ നടത്തിയ മികച്ച പ്രവർത്തനങ്ങളിലൂടെയാണ് നീരവ് ഷാ ജനശ്രദ്ധ പിടിച്ചുപറ്റിയത്. പിന്നീട് യുഎസ് സിഡിസിയിൽ പ്രിൻസിപ്പൽ ഡെപ്യൂട്ടി ഡയറക്ടറായി സേവനമനുഷ്ഠിച്ച അദ്ദേഹം 2025-ലാണ് ഗവർണർ സ്ഥാനത്തേക്കുള്ള പോരാട്ടത്തിനിറങ്ങിയത്. വീട് നിർമ്മാണത്തിലെ ചെലവ് കുറയ്ക്കുക, ആരോഗ്യ പരിരക്ഷ ഉറപ്പാക്കുക, സാമ്പത്തിക വളർച്ച, ഭക്ഷ്യസുരക്ഷ എന്നിവയ്ക്കാണ് അദ്ദേഹം തന്റെ പ്രചാരണത്തിൽ മുൻഗണന നൽകുന്നത്.

നിലവിലെ ഗവർണർ ജാനറ്റ് മിൽസിന്റെ കാലാവധി അവസാനിക്കുന്ന സാഹചര്യത്തിലാണ് പുതിയ ഗവർണറെ കണ്ടെത്താനുള്ള തിരഞ്ഞെടുപ്പ് നടക്കുന്നത്. പ്രചാരണത്തിനായി 830,000 ഡോളറിലധികം സമാഹരിച്ച നീരവ് ഷായ്ക്ക് വിവിധ നഗര മേധാവികളുടെയും ആരോഗ്യപ്രവർത്തകരുടെയും പിന്തുണയും ലഭിക്കുന്നുണ്ട്. ജൂൺ 9-നാണ് നിർണ്ണായകമായ പ്രൈമറി തിരഞ്ഞെടുപ്പ് നടക്കുന്നത്. വോട്ടെടുപ്പ് ഫലം പുറത്തുവന്നതിന് പിന്നാലെ വോട്ടർമാർക്ക് നന്ദി അറിയിച്ച നീരവ് ഷാ, വരും ദിവസങ്ങളിലും ജനങ്ങളിലേക്ക് നേരിട്ടെത്തി പിന്തുണ ഉറപ്പാക്കുമെന്ന് വ്യക്തമാക്കി.