അർജന്റീനയിൽ നിന്ന് യാത്രതിരിച്ച ഡച്ച് ആഡംബര ക്രൂയിസ് കപ്പലായ ‘എംവി ഹോണ്ടിയസ്’ ൽ ഹാൻ്റവൈറസ് സ്ഥിരീകരിച്ചതോടെ ലോകാരോഗ്യ സംഘടന (WHO) ആഗോള ജാഗ്രതാ നിർദേശം പുറപ്പെടുവിച്ചു. കപ്പലിലെ യാത്രക്കാരിൽ രോഗലക്ഷണങ്ങൾ കണ്ടെത്തിയതിനെ തുടർന്ന് ഇതുവരെ എട്ട് കേസുകളാണ് റിപ്പോർട്ട് ചെയ്തിരിക്കുന്നത്. ഇവരിൽ അഞ്ചുപേർക്ക് ഹാൻ്റവൈറസ് സ്ഥിരീകരിച്ചെന്നും മൂന്ന് പേർ മരിച്ചതായും റിപ്പോർട്ടുകളുണ്ട്.

149 പേർ സഞ്ചരിച്ചിരുന്ന ഈ പര്യവേഷണ കപ്പൽ നിലവിൽ വെസ്റ്റ് ആഫ്രിക്കൻ തീരത്തോട് ചേർന്ന അറ്റ്ലാന്റിക് സമുദ്രത്തിലാണ്. കപ്പലിൽ മൂന്ന് ഇന്ത്യൻ ജീവനക്കാരും ഉണ്ടെന്നാണ് വിവരം. രോഗലക്ഷണങ്ങൾ പ്രകടമായതിനെ തുടർന്ന് മൂന്ന് യാത്രക്കാരെ കപ്പലിൽ നിന്ന് ഒഴിപ്പിച്ചിട്ടുണ്ട്.

എന്താണ് ഹാൻ്റവൈറസ്?
എലികളുടെ മൂത്രം, ഉമിനീർ, മലം എന്നിവയുമായി സമ്പർക്കത്തിൽപ്പെടുന്നതിലൂടെ മനുഷ്യരിലേക്ക് പകരുന്ന വൈറസ് രോഗമാണിത്. സാധാരണയായി മനുഷ്യരിൽ നിന്ന് മനുഷ്യരിലേക്ക് വൈറസ് പകരുന്നത് അപൂർവമാണ്. എന്നാൽ അടച്ചിട്ട ഇടങ്ങളിൽ ദീർഘസമയ സമ്പർക്കം ഉണ്ടായാൽ രോഗബാധയ്ക്ക് സാധ്യത ഉണ്ടാകാമെന്ന് WHO വിദഗ്ധർ മുന്നറിയിപ്പ് നൽകുന്നു.

WHO വിദഗ്ധ ഡോ. മരിയയുടെ വാക്കുകളിൽ, “ഇത് കൊറോണ വൈറസ് പോലെ വേഗത്തിൽ പടരുന്ന രോഗമല്ല. വളരെ അടുത്ത ശാരീരിക സമ്പർക്കത്തിലൂടെയാണ് അപൂർവമായി രോഗം പകരുന്നത്.” 2018-ൽ അർജന്റീനയിൽ ഉണ്ടായ ഹാൻ്റവൈറസ് വ്യാപന സമയത്ത് മനുഷ്യരിൽ നിന്ന് മനുഷ്യരിലേക്ക് പകരുന്ന സാഹചര്യം കണ്ടെത്തിയിരുന്നുവെന്നും അവർ ചൂണ്ടിക്കാട്ടി.

രോഗവ്യാപനം എങ്ങനെ ആരംഭിച്ചു?
ഏപ്രിൽ ഒന്നിന് തെക്കൻ അർജന്റീനയിലെ ഉസുവായയിൽ നിന്നാണ് കപ്പൽ യാത്ര തിരിച്ചത്. യാത്ര തുടങ്ങുമ്പോൾ ആരിലും രോഗലക്ഷണങ്ങൾ ഉണ്ടായിരുന്നില്ലെന്ന് അധികൃതർ വ്യക്തമാക്കി.

ഏപ്രിൽ ആറിനാണ് 70 വയസ്സുള്ള ഡച്ച് യാത്രക്കാരനിൽ പനി, തലവേദന, വയറിളക്കം തുടങ്ങിയ ലക്ഷണങ്ങൾ കണ്ടെത്തിയത്. പിന്നീട് അദ്ദേഹത്തിന് ശ്വാസതടസ്സം അനുഭവപ്പെടുകയും ഏപ്രിൽ 11-ന് മരണം സംഭവിക്കുകയും ചെയ്തു. പിന്നാലെ ഭാര്യക്കും സമാന ലക്ഷണങ്ങൾ പ്രകടമായി. തെക്കൻ ആഫ്രിക്കയിൽ വെച്ച് ഏപ്രിൽ 26-ന് അവർയും മരിച്ചു. പരിശോധനയിലാണ് ഇരുവർക്കും ഹാൻ്റവൈറസ് സ്ഥിരീകരിച്ചത്.

12 രാജ്യങ്ങൾക്ക് മുന്നറിയിപ്പ്
കപ്പലിൽ നിന്ന് സെന്റ് ഹെലീനയിൽ ഇറങ്ങിയ യാത്രക്കാരുടെ പശ്ചാത്തലത്തിൽ ബ്രിട്ടൻ, അമേരിക്ക, കാനഡ, ജർമ്മനി, നെതർലൻഡ്‌സ്, സ്വിറ്റ്സർലൻഡ്, സിംഗപ്പൂർ, തുർക്കി ഉൾപ്പെടെ 12 രാജ്യങ്ങൾക്ക് WHO ഔദ്യോഗിക മുന്നറിയിപ്പ് നൽകി.

കപ്പലിലെ സാഹചര്യം വിലയിരുത്താൻ WHO വിദഗ്ധരും യൂറോപ്യൻ ആരോഗ്യ ഏജൻസികളിലെ ഡോക്ടർമാരും അടങ്ങുന്ന സംഘം നിലവിൽ കപ്പലിൽ പരിശോധന തുടരുകയാണ്. കപ്പൽ കാനറി ദ്വീപുകളിൽ എത്തുന്നതുവരെ നിരീക്ഷണം ശക്തമാക്കാനാണ് തീരുമാനം.

ഹാൻ്റവൈറസ് ലക്ഷണങ്ങൾ
ഹാൻ്റവൈറസിന്റെ തുടക്കലക്ഷണങ്ങൾ സാധാരണ പനിയോട് സാമ്യമുള്ളതാണ്.

ഉയർന്ന പനി
ശരീരവേദന
കടുത്ത ക്ഷീണം
തലവേദന
വയറിളക്കം
എന്നാൽ പിന്നീട് രോഗം ഗുരുതരമായി മാറാം. വൈറസ് രക്തക്കുഴലുകളെ ദുർബലമാക്കുകയും ശ്വാസകോശത്തിൽ ദ്രാവകം നിറയുകയും ചെയ്യാം. ഇതോടെ ഗുരുതര ശ്വാസതടസ്സം ഉണ്ടാകാം. ചില ഘട്ടങ്ങളിൽ ECMO പോലുള്ള അത്യാഹിത ചികിത്സാ സംവിധാനങ്ങൾ ആവശ്യമായി വരും.

ആശങ്കയുണ്ടെങ്കിലും മഹാമാരി സാധ്യത കുറവ്
ഹാൻ്റവൈറസ് ഗുരുതര രോഗമാണെങ്കിലും ഇത് കോവിഡ് പോലെ ആഗോള മഹാമാരിയായി പടരാനുള്ള സാധ്യത വളരെ കുറവാണെന്ന് WHO വ്യക്തമാക്കി. എന്നിരുന്നാലും ദീർഘ ഇൻകുബേഷൻ കാലയളവ് — ആറാഴ്ച വരെ — ഉള്ളതിനാൽ വരും ദിവസങ്ങളിൽ കൂടുതൽ കേസുകൾ റിപ്പോർട്ട് ചെയ്യപ്പെടാനിടയുണ്ടെന്നാണ് ആരോഗ്യ വിദഗ്ധരുടെ മുന്നറിയിപ്പ്.

കടപ്പാട്: വിവിധ മാധ്യമ ന്യൂസ്