ഡിട്രോയിറ്റ്: മിഷിഗണിലെ മലയാളി സമൂഹം വർഷങ്ങളായി കാത്തിരുന്ന ആ സുവർണ്ണ നിമിഷം യാഥാർത്ഥ്യമായി. ഡിട്രോയിറ്റ് മലയാളി അസോസിയേഷൻ (DMA) അവതരിപ്പിച്ച 'കിലുക്കം 25 – മോഹൻലാൽ ലൈവ് സ്റ്റേജ് ഷോ' മിഷിഗൺ മണ്ണിൽ ചരിത്രമെഴുതി. ഏപ്രിൽ 25-ന് ഡിട്രോയിറ്റിലെ സെക്കൻഡ് എബനേസർ ചർച്ച് ഓഡിറ്റോറിയത്തിൽ അരങ്ങേറിയ ഈ മഹാമേള, പ്രവാസി മലയാളികളുടെ ഹൃദയത്തിൽ ഒരിക്കലും മായാത്ത ഒരോർമ്മയായി മാറി.

മൂവായിരത്തോളം പേർക്ക് ഇരിക്കാവുന്ന ഓഡിറ്റോറിയം ലാലേട്ടനെ ഒരുനോക്കു കാണാനെത്തിയ മലയാളികളെക്കൊണ്ട് നിറഞ്ഞുകവിഞ്ഞു. മിഷിഗണിൽ നിന്നു മാത്രമല്ല, അയൽ സംസ്ഥാനങ്ങളിൽ നിന്നുപോലും കുടുംബസമേതം ജനങ്ങൾ ഷോ കാണാനെത്തി.

മലയാള സിനിമയുടെ അഭിമാനതാരം മോഹൻലാൽ വേദിയിലെത്തിയപ്പോൾ ഓഡിറ്റോറിയം ഹർഷാരവത്തിൽ മുങ്ങി. "നിങ്ങളെയെല്ലാം കാണുമ്പോൾ എനിക്ക് നാട്ടിലെത്തിയ പ്രതീതിയാണ്" എന്ന ലാലേട്ടന്റെ വാക്കുകൾ സദസ്സിനെ വൈകാരികമാക്കി. പ്രശസ്ത സിനിമാഗാനങ്ങൾ ലാലേട്ടൻ തന്നെ പാടി ആരാധകർക്ക് സമ്മാനിച്ച നിമിഷങ്ങൾ ആവേശത്തിന്റെ പാരമ്യത്തിലെത്തി.

ഡിട്രോയിറ്റ് ഷോയെ ചരിത്രസംഭവമാക്കിയ മറ്റൊരു അവിസ്മരണീയ നിമിഷം കൂടി ഉണ്ടായി. 'ഒന്നു മുതൽ പൂജ്യം വരെ' (1986) എന്ന ക്ലാസിക് ചിത്രത്തിൽ ലാലേട്ടനൊപ്പം അഭിനയിച്ച ആശാ ജയറാം 40 വർഷങ്ങൾക്ക് ശേഷം വേദിയിൽ വീണ്ടും ലാലേട്ടനെ കണ്ടുമുട്ടി. നിലവിൽ ഡിട്രോയിറ്റിൽ താമസിക്കുന്ന ആശാ ജയറാമിന് ഇത് അവിശ്വസനീയമായ ഒരു മുഹൂർത്തമായിരുന്നു. "40 വർഷങ്ങൾക്ക് ശേഷം ലാലേട്ടനെ കാണാൻ പോകുന്നു, എനിക്കിത് വിശ്വസിക്കാൻ പോലും കഴിയുന്നില്ല" എന്ന അവരുടെ വാക്കുകൾ സോഷ്യൽ മീഡിയയിൽ വൈറലായി. സഹതാരങ്ങളെപ്പോലും 40 വർഷങ്ങൾക്ക് ശേഷവും ഓർമ്മിച്ച് സ്നേഹപൂർവ്വം പെരുമാറുന്ന ലാലേട്ടന്റെ വ്യക്തിത്വം ഏവരെയും അദ്ഭുതപ്പെടുത്തി.

പ്രശസ്ത സംഗീതജ്ഞൻ സ്റ്റീഫൻ ദേവസ്സിയുടെ കീബോർഡ് മാന്ത്രികത സദസ്സിനെ വിസ്മയിപ്പിച്ചു. ജനപ്രിയ നടൻ മനോജ് കെ. ജയൻ, ജ്യോത്സ്ന രാധാകൃഷ്ണൻ, രമ്യ പണിക്കർ, നോബി, ഫ്രാൻസിസ്, അഖിൽ, മുരളി കൃഷ്ണ, അപർണ്ണ മൾബറി തുടങ്ങി 22 അംഗ പ്രതിഭാസംഘം സംഗീതവും നൃത്തവും ഹാസ്യവും കോർത്തിണക്കി ഒരു സമ്പൂർണ്ണ കലാവിരുന്ന് ഒരുക്കി.

DMA പ്രസിഡന്റ് ബോബി തോമസിന്റെ നേതൃത്വത്തിലും ഷോ ചെയർപേഴ്സൺ രാജേഷ് നായരുടെ മേൽനോട്ടത്തിലുമാണ് ഈ ബൃഹദ് പരിപാടി വിജയകരമായി പൂർത്തിയാക്കിയത്. അശോക് ജോർദാൻ, സദീപ് മുരളീധരൻ, ഓസ്ബൺ ഡേവിഡ്, നാരായണൻ നമ്പൂതിരി തുടങ്ങിയ ഭാരവാഹികൾക്കൊപ്പം അമ്പതോളം വരുന്ന സന്നദ്ധ പ്രവർത്തകരുടെ അക്ഷീണ പരിശ്രമമാണ് ഈ വിജയത്തിന് പിന്നിൽ.

"ഇത് ഞങ്ങളുടെ ഡിട്രോയിറ്റ് മലയാളീ അസ്സോസിയേഷൻന്റെ കൂട്ടായ്മയുടെയും സ്നേഹത്തിന്റെയും വിജയമാണ്. ലാലേട്ടനെ മിഷിഗണിലെത്തിക്കാൻ കഴിഞ്ഞത് അഭിമാനകരമായ നേട്ടമാണ്" എന്ന് DMA പ്രസിഡന്റ് ബോബി തോമസ് പറഞ്ഞു. "സ്പോൺസർമാർ, വോളണ്ടിയർമാർ, പ്രേക്ഷകർ – എല്ലാവരുടെയും കൈകോർത്തുള്ള പ്രവർത്തനമാണ് ഈ ഷോയെ വിജയത്തിലെത്തിച്ചത്" എന്ന് ഷോ ചെയർപേഴ്സൺ രാജേഷ് നായർ കൂട്ടിച്ചേർത്തു.

മിഷിഗണിലെ പ്രശസ്ത റെസ്റ്റോറന്റായ Authentikka ആയിരുന്നു പരിപാടിയുടെ ടൈറ്റിൽ സ്പോൺസർ. ഡോ. നരേന്ദ്ര കുമാർ, സാബു – അനുപമ കൃഷ്ണൻ ദമ്പതികൾ, കോശി ജോർജ് (ReMax Group), ചാണ്ടിച്ചായൻ (National Groceries), ഡോ. റെമി നായർ സർന (Bright Side Dental) എന്നിവർ പ്രധാന സ്പോൺസർമാരായി. Windsor Home Lending, Windsor Entertainment എന്നിവർ നാഷണൽ സ്പോൺസർമാരായി. അമേരിക്കയിലെ നാല് നഗരങ്ങളിലായി നടന്ന 'കിലുക്കം 25' ടൂറിന്റെ പിന്നിലെ അമരക്കാരൻ വിൻഡ്സർ ഹോം ലെൻഡിംഗ് ഉടമ റെൻജു രാജിന് DMA പ്രത്യേക നന്ദി രേഖപ്പെടുത്തി.

ഹ്യൂസ്റ്റൺ, ടാംപ, ഡിട്രോയിറ്റ്, ന്യൂജേഴ്സി എന്നീ നാല് നഗരങ്ങളിൽ അരങ്ങേറിയ 'കിലുക്കം 25' ടൂറിലെ ഏറ്റവും ശ്രദ്ധേയമായ പരിപാടികളിലൊന്നായി ഡിട്രോയിറ്റ് ഷോ മാറി. പരിപാടി കഴിഞ്ഞ് മടങ്ങുമ്പോൾ ഓരോ പ്രേക്ഷകന്റെയും കണ്ണുകളിൽ സംതൃപ്തിയും ഹൃദയത്തിൽ ലാലേട്ടൻ സമ്മാനിച്ച ഓർമ്മകളും നിറഞ്ഞുനിന്നു. മിഷിഗണിലെ മലയാളി സമൂഹത്തിന് വർഷങ്ങളോളം പറയാനും ഓർമ്മിക്കാനുമുള്ള ഒരു സാംസ്കാരിക മഹോത്സവമായി 'കിലുക്കം 25' ഡിട്രോയിറ്റ് മാറി.