വാഷിംഗ്ടണ്‍ ഡി.സി: അമേരിക്കയിലെ കുടിയേറ്റക്കാര്‍ക്കും അവരുടെ മക്കള്‍ക്കും ഉന്നത വിദ്യാഭ്യാസത്തിനായി നല്‍കുന്ന പ്രശസ്തമായ 'പോള്‍ ആന്‍ഡ് ഡെയ്സി സൊറോസ് ഫെലോഷിപ്പ്' (Soros Fellowships 2026) പ്രഖ്യാപിച്ചു. ആകെ തിരഞ്ഞെടുത്ത 30 പേരില്‍ 11 പേരും ഇന്ത്യന്‍ വംശജരാണെന്നത് ഇത്തവണത്തെ പ്രത്യേകതയാണ്.

തിരഞ്ഞെടുക്കപ്പെട്ടവര്‍ക്ക് തങ്ങളുടെ ബിരുദാനന്തര പഠനത്തിനായി 90,000 ഡോളര്‍ (ഏകദേശം 75 ലക്ഷം രൂപ) വരെ സാമ്പത്തിക സഹായം ലഭിക്കും. 3,070 അപേക്ഷകരില്‍ നിന്നാണ് ഏറ്റവും മികച്ച 30 പേരെ കണ്ടെത്തിയത്.

തിരഞ്ഞെടുക്കപ്പെട്ട ഇന്ത്യന്‍ വംശജര്‍:

അഖില്‍ രാജന്‍: യേല്‍ സര്‍വകലാശാലയില്‍ പൊളിറ്റിക്കല്‍ സയന്‍സില്‍ പിഎച്ച്ഡിയും ജെഡിയും ചെയ്യുന്നു. ബൈഡന്‍ ഭരണകൂടത്തില്‍ സേവനമനുഷ്ഠിച്ചിട്ടുണ്ട്.

അക്ഷയ വിജയ അന്നപ്രഗഡ: കാന്‍സര്‍ കണ്ടെത്താനുള്ള ലിക്വിഡ് ബയോപ്‌സി സാങ്കേതികവിദ്യയില്‍ ഗവേഷണം നടത്തുന്ന ഡോക്ടര്‍-സയന്റിസ്റ്റ്.

അനന്തന്‍ സദഗോപന്‍: ഹാര്‍വാര്‍ഡില്‍ ബയോളജിക്കല്‍ സയന്‍സില്‍ പിഎച്ച്ഡി ചെയ്യുന്നു. കെമിക്കല്‍ ബയോളജിയില്‍ വിദഗ്ധന്‍.

ആര്യ റാവു: ഹാര്‍വാര്‍ഡ്-എംഐടി സംയുക്ത പ്രോഗ്രാമില്‍ എംഡി/പിഎച്ച്ഡി ചെയ്യുന്നു. എഐ ഉപയോഗിച്ചുള്ള ചികിത്സാ രീതികളില്‍ ഗവേഷണം.

അവിനാഷ് വദാലി: എംഐടിയില്‍ ഫിസിക്‌സില്‍ പിഎച്ച്ഡി ചെയ്യുന്നു. ക്വാണ്ടം സിസ്റ്റങ്ങളില്‍ ഗവേഷണം.

ഇലീന ലോഗാനി: സ്റ്റാന്‍ഫോര്‍ഡ് ലോ സ്‌കൂളില്‍ ജെഡി വിദ്യാര്‍ത്ഥി. സാമൂഹിക നീതിയും സാമ്പത്തിക നയങ്ങളും കേന്ദ്രീകരിച്ചുള്ള പ്രവര്‍ത്തനം.

റിയ ദാസ്: എംഐടിയില്‍ ഇലക്ട്രിക്കല്‍ എഞ്ചിനീയറിംഗിലും കമ്പ്യൂട്ടര്‍ സയന്‍സിലും പിഎച്ച്ഡി ചെയ്യുന്നു.

റോണക് ദേശായി: ആര്‍ട്ടിഫിഷ്യല്‍ ഇന്റലിജന്‍സ് ഉപയോഗിച്ച് പുതിയ ആന്റിബയോട്ടിക്കുകള്‍ കണ്ടെത്താനുള്ള ഗവേഷണത്തില്‍ ഏര്‍പ്പെട്ടിരിക്കുന്നു.

സെറീന്‍ സിംഗ്: ഓക്‌സ്‌ഫോര്‍ഡില്‍ നിന്ന് ക്രിമിനോളജിയില്‍ പിഎച്ച്ഡി നേടി. നീതിന്യായ വ്യവസ്ഥയിലെ പരിഷ്‌കാരങ്ങള്‍ക്കായി പ്രവര്‍ത്തിക്കുന്നു.

വിവസ്വന്‍ വൈകുണ്ഠ: യുസിഎസ്എഫില്‍ ഇമ്മ്യൂണോളജിയിലും ജീന്‍ എഡിറ്റിംഗിലും (CRISPR) ഗവേഷണം നടത്തുന്നു.

യാസ ബേഗ്: സ്റ്റാന്‍ഫോര്‍ഡ് സര്‍വകലാശാലയില്‍ ബയോ എഞ്ചിനീയറിംഗില്‍ പിഎച്ച്ഡി ചെയ്യുന്നു.

സയന്‍സ്, നിയമം, ആര്‍ട്ടിഫിഷ്യല്‍ ഇന്റലിജന്‍സ് തുടങ്ങി വിവിധ മേഖലകളില്‍ മികച്ച കഴിവ് തെളിയിച്ചവരാണ് ഇവര്‍. അമേരിക്കയുടെ സാമൂഹികവും ഭരണഘടനാപരവുമായ മൂല്യങ്ങള്‍ ഉയര്‍ത്തിപ്പിടിക്കാന്‍ പ്രതിജ്ഞാബദ്ധരായ 'പുതിയ അമേരിക്കക്കാരാണ്' ഈ പ്രതിഭകളെന്ന് ഫെലോഷിപ്പ് സമിതി വ്യക്തമാക്കി.