ന്യൂയോർക്ക്: അമേരിക്കയിലെ പ്രവാസി മലയാളികളെ സംഗീതത്തിന്റെയും ഗൃഹാതുരത്വത്തിന്റെയും വിസ്മയത്തുമ്പത്ത് എത്തിച്ച 'കിലുക്കം 25' എന്ന സംഗീത സപര്യ വിജയകരമായി സമാപിച്ചു. നാല് പ്രമുഖ നഗരങ്ങളെ ആവേശക്കടലാക്കി മാറ്റിയ ഈ മെഗാ ഷോ, സംഘാടന മികവ് കൊണ്ടും കലാപരമായ ഔന്നത്യം കൊണ്ടും ചരിത്ര സംഭവമായി മാറി.

കൊട്ടാരക്കര സ്വദേശിയും വിൻഡ്‌സർ ഹോം ലെൻഡിംഗ് ഉടമയുമായ റെൻജു രാജാണ് അമേരിക്കൻ മണ്ണിലെ ഈ ചരിത്ര വിസ്മയത്തിന് പിന്നിലെ അമരക്കാരൻ. കഴിഞ്ഞ 10 വർഷംകൊണ്ട് അമേരിക്കയിൽ വലിയ വിശ്വാസ്യത നേടിയെടുത്ത വിൻഡ്സർ ഫിനാൻഷ്യൽ കമ്പനി എന്റർടെയ്‌ൻമെന്റ്‌ രംഗത്തേക്കുകൂടി തിരിഞ്ഞത് ഇതിന്റെ സാരഥിയായ റെൻജു രാജിന് കലയോടുള്ള അഭിനിവേശം കൊണ്ടാണ്. എം.ജി. ശ്രീകുമാറും സ്റ്റീഫൻ ദേവസിയും അണിനിരന്ന ഷോയിലൂടെയായിരുന്നു വിൻഡ്സർ എന്റർടൈൻമെന്റിന്റെ അരങ്ങേറ്റം. വിൻഡ്സർ ടീമിന്റെ രണ്ടാമത്തെ ഉദ്യമമായ 'കിലുക്കം 25' വൻ വിജയമായതോടെ നിലവിൽ ടെക്സസിലുള്ള റെൻജു രാജിന് അഭിനന്ദന പ്രവാഹമാണ് ലഭിക്കുന്നത്.

താരപ്പൊലിമയിൽ വിസ്മയക്കാഴ്ചകൾ
 

ലാലേട്ടൻ എന്ന് മലയാളികൾ സ്നേഹപൂർവ്വം വിളിക്കുന്ന 'കംപ്ലീറ്റ് ആക്ടർ' മോഹൻലാലിന്റെ സാന്നിധ്യം ഷോയുടെ തിളക്കം വർദ്ധിപ്പിച്ചു. മനോജ് കെ. ജയൻ, സ്റ്റീഫൻ ദേവസ്സി, ജ്യോത്സ്ന രാധാകൃഷ്ണൻ, രമ്യ പണിക്കർ എന്നിവരടങ്ങിയ 22 അംഗ പ്രതിഭകളുടെ സംഘം സംഗീതവും നൃത്തവും ഹാസ്യവും കോർത്തിണക്കി ഒരു വിസ്മയ ലോകമാണ് വേദിയിൽ തീർത്തത്.

നാല് നഗരങ്ങളിൽ ആവേശത്തിരമാലകൾ

ഹ്യൂസ്റ്റൺ (ഏപ്രിൽ 17): പര്യടനത്തിന്റെ തുടക്കം ടെക്സസിലെ ഹ്യൂസ്റ്റണിലായിരുന്നു. സെന്റ് തോമസ് ഇന്ത്യൻ ഓർത്തഡോക്സ് ചർച്ച് അധികൃതരായ ഫാ. ഐസക് ബി. പ്രകാശ്, ഫാ. ജോൺസൺ പുഞ്ചക്കോണം, ഫാ. ടെജി എബ്രഹാം എന്നിവരുടെയും കമ്മിറ്റി അംഗങ്ങളുടെയും സന്നദ്ധ പ്രവർത്തകരുടെയും സഹകരണം പരിപാടിയെ അത്യന്തം ഹൃദ്യമാക്കി.

ടാംപ (ഏപ്രിൽ 19): ഫ്‌ളോറിഡയിലെ ടാംപയിൽ നടന്ന പരിപാടിയിൽ ജോസ്‌കുട്ടി മാടത്തിൽ, തോമസ് പാപ്പാളി എന്നിവരുടെ പിന്തുണ സംഗീതസാന്ദ്രമായ ഒരു സായാഹ്നം സമ്മാനിച്ചു.

ഡെട്രോയിറ്റ് (ഏപ്രിൽ 25): മിഷിഗണിലെ ഡെട്രോയിറ്റിൽ മലയാളി അസോസിയേഷന്റെ കരുത്തിൽ ബോബി തോമസ്, രാജേഷ് നായർ എന്നിവരുടെ നേതൃത്വത്തിൽ ഒരു വലിയ സാംസ്കാരിക ആഘോഷം തന്നെ അരങ്ങേറി.

ന്യൂജേഴ്‌സി (ഏപ്രിൽ 26): ലോഡിയിൽ നടന്ന ഗ്രാൻഡ് ഫിനാലെയിൽ വൻ ജനപങ്കാളിത്തമാണ് ദൃശ്യമായത്. ട്വിലൈറ്റ് മീഡിയയിലെ ഷിജോ പൗലോസ്, ബൈജു വർഗീസ് എന്നിവർക്കൊപ്പം ഡോ. ആനി ലിബു, ഷൈബു, അനിയൻ ജോർജ് എന്നിവരുടെ ടീം സമാപന പരിപാടി അവിസ്മരണീയമാക്കി.

പ്രേക്ഷകരുടെ പൾസ് തിരിച്ചറിഞ്ഞ് റെൻജു രാജ്

ഈ വൻ വിജയം അമേരിക്കൻ മലയാളികളുടെ അഭിരുചിയും ആഗ്രഹങ്ങളും ശരിയായ ദിശയിൽ തിരിച്ചറിയാൻ തനിക്ക് സാധിക്കുന്നു എന്നതിന്റെ തെളിവാണെന്ന് റെൻജു രാജ് പറഞ്ഞു. 'കിലുക്കം 25'-ന്റെ വിജയം തന്റെ ഉത്തരവാദിത്തം വർദ്ധിപ്പിക്കുന്നുവെന്നും, ഇതിനോട് കിടപിടിക്കുന്ന ബ്രഹ്‌മാണ്ഡ ഷോകളുമായി വിൻഡ്സർ ടീം ഇനിയും വരുമെന്നും അദ്ദേഹം കൂട്ടിച്ചേർത്തു. മലയാളി പ്രേക്ഷകർ നൽകുന്ന ഈ സ്നേഹവും പിന്തുണയും വരും വർഷങ്ങളിൽ ഇതിലും മികച്ച കലാവിരുന്നുകൾ പ്രവാസികൾക്കായി എത്തിക്കാൻ വലിയ ധൈര്യമാണ് നൽകുന്നത്. സ്പോൺസർമാർക്കും പിന്തുണച്ചവർക്കും പ്രത്യേകിച്ച് ഷോ ഏറ്റെടുത്ത അമേരിക്കൻ മലയാളി പ്രേക്ഷകർക്കും റെൻജു രാജും സംഘവും ഹൃദയം നിറഞ്ഞ നന്ദി അറിയിച്ചു.