മെയ്ൻ സെനറ്റ് തിരഞ്ഞെടുപ്പിൽ നിന്ന് ഡെമോക്രാറ്റിക് പാർട്ടിയുടെ ഔദ്യോഗിക സ്ഥാനാർത്ഥിയായി പരിഗണിക്കപ്പെട്ടിരുന്ന ഗവർണ്ണർ ജാനറ്റ് മിൽസ് അപ്രതീക്ഷിതമായി പിന്മാറി. സാമ്പത്തിക സ്രോതസ്സുകളുടെ കുറവ് ചൂണ്ടിക്കാട്ടിയാണ് 78-കാരിയായ മിൽസ് തന്റെ പ്രചാരണം അവസാനിപ്പിച്ചത്. ഇതോടെ, പുരോഗമനവാദിയായ രാഷ്ട്രീയ പുതുമുഖം ഗ്രഹാം പ്ലാറ്റ്‌നർ (41) ഡെമോക്രാറ്റിക് സ്ഥാനാർത്ഥിയാകുമെന്ന് ഉറപ്പായി. റിപ്പബ്ലിക്കൻ സെനറ്റർ സൂസൻ കോളിൻസിനെ നേരിടാൻ പാർട്ടിക്ക് മുന്നിലുള്ള ഏക പേരായി ഇതോടെ പ്ലാറ്റ്‌നർ മാറി.
 

പ്രവർത്തനമികവും അനുഭവസമ്പത്തും ഉണ്ടെങ്കിലും ഇന്നത്തെ കാലത്ത് രാഷ്ട്രീയ പ്രചാരണത്തിന് ആവശ്യമായ സാമ്പത്തിക സ്രോതസ്സുകൾ തന്റെ കൈവശമില്ലെന്ന് മിൽസ് പ്രസ്താവനയിൽ വ്യക്തമാക്കി. എന്നാൽ പ്ലാറ്റ്‌നറെ പിന്തുണയ്ക്കുന്ന കാര്യത്തിൽ അവർ വ്യക്തമായ മറുപടി നൽകിയിട്ടില്ല. സൂസൻ കോളിൻസിന് ഒരിക്കലും വോട്ട് ചെയ്തിട്ടില്ലെന്നും ഇത്തവണയും അത് തന്നെയാണ് നിലപാടെന്നും മിൽസിന്റെ വക്താവ് അറിയിച്ചു. അതേസമയം, അഗസ്റ്റയിൽ അനുയായികൾക്കൊപ്പം വിജയാഘോഷം നടത്തിയ പ്ലാറ്റ്‌നർ, സൂസൻ കോളിൻസിനെ പരാജയപ്പെടുത്തുമെന്നും സാധാരണക്കാരെ വിസ്മരിച്ച നിലവിലെ രാഷ്ട്രീയ വ്യവസ്ഥിതിയെ മാറ്റിമറിക്കുമെന്നും പ്രഖ്യാപിച്ചു.

ഡെമോക്രാറ്റിക് പാർട്ടിക്കുള്ളിലെ പുതിയ തലമുറയുടെയും താഴെത്തട്ടിലുള്ള പ്രവർത്തകരുടെയും ശക്തമായ സ്വാധീനമാണ് മിൽസിന്റെ പിന്മാറ്റത്തിലൂടെ വ്യക്തമാകുന്നത്. മുതിർന്ന നേതാവ് ചക് ഷൂമർ ഉൾപ്പെടെയുള്ള പാർട്ടി നേതൃത്വത്തിന്റെ പിന്തുണയുണ്ടായിട്ടും സോഷ്യൽ മീഡിയയിലും ലിബറൽ പോഡ്‌കാസ്റ്റുകളിലും പ്ലാറ്റ്‌നർ ഉണ്ടാക്കിയ സ്വാധീനത്തിന് മുന്നിൽ മിൽസിന് പിടിച്ചുനിൽക്കാനായില്ല. സെനറ്റിലെ ഭൂരിപക്ഷം തിരിച്ചുപിടിക്കാൻ ശ്രമിക്കുന്ന ഡെമോക്രാറ്റുകൾക്ക് മെയ്നിലെ ഈ പുതിയ രാഷ്ട്രീയ മാറ്റം ഏറെ നിർണ്ണായകമാണ്.