അപ്പൻ കൊമ്പത്ത് !

'അമ്മ വരമ്പത്ത്

ഒത്തിരിയൊത്തിരി ഓർമ്മകൾ പെയ്യും

വിത്തും കൈക്കോട്ടും !

വിരഹ ബാല്യത്തിന്റെ

മഷിത്തണ്ടിൽ മായാതെ

വിഷുപ്പക്ഷി പാടുമീ

വിരഹ ഗാനം !

മമ ഹൃദയത്തിന്റെ

കുളിരോർമ്മകൾ - അതിൽ

തറയുമെൻ ജീവിത

തേൻ മുള്ളുകൾ

അകലത്തെ ആകാശത്തിൻ മഴക്കാറിൻ കൊന്നപ്പൂക്കൾ മഴത്തുള്ളി കിലുക്കമായ്

കണി വയ്ക്കുമ്പോൾ,

വിലങ്ങിട്ട മോഹങ്ങളാൽ

പിടയുമെൻ കുടിലിലെ

കരുതലായ് വല്യാമ്മ തൻ

സ്നേഹ സ്വർഗ്ഗങ്ങൾ !

ഒരു ദശം പാത്രങ്ങളിൽ

വിളമ്പി വന്നവസാനം

ഒഴിയുന്ന കങ്ങൻ കലം

ബാക്കിയാകുമ്പോൾ

ഒരു തവി കഞ്ഞാളത്തിൽ

ഒതുക്കി തൻ വിശപ്പിനെ

പരിഭവം പറയാതെ

കീഴടക്കുന്നു !!

അറിയിച്ചില്ലറിഞ്ഞില്ല -

ന്നൊരിക്കലും നിറയാത്ത

വയറുമായ് വല്യാമ്മച്ചി  

പറന്നു പോകുന്നു - പിന്നെ

ഒരു വിഷുപ്പക്ഷി പോലെ  

മറഞ്ഞു പോകുന്നു !

മമ ജീവിതത്തിന്റെ

പകൽ മാഞ്ഞു പോയ് - ദൂരെ

പടിഞ്ഞാറിൽ ഇരുളിന്റെ പടി ചേർന്നു പോയ്.

ഒരു കാലം രചിച്ചിട്ട തളിരോർമ്മകൾ -  ഇന്നും

വിട ചൊല്ലാൻ വിതുമ്പും പോൽ വിലപിക്കുന്നു !

ഹൃദയ വിപഞ്ചികയിൽ

വിരലോടുമ്പോൾ- ഒരു

വിഷുപ്പക്ഷി തേങ്ങൽ വീണ്ടും

വന്നു പോകുന്നു !