ഈ അടുത്ത സമയത്തു ന്യൂയോര്‍ക്കിലെ ലോങ്ങ് ഐലണ്ടിലുള്ള ഒരു ഇന്ത്യന്‍ കടയില്‍ പച്ചക്കറി വാങ്ങാന്‍ കയറി. ഒരു സാംബാര്‍ ഉണ്ടാക്കാനുള്ള ശ്രമം ആയിരുന്നു മനസ്സില്‍. മുരിങ്ങക്ക വേണമെന്ന് ഭാര്യ നിര്‍ദേശിച്ചിരുന്നതുകൊണ്ടു അവിടേക്കുതന്നെ പോയി. പൗണ്ടിന് 7.99 അമേരിക്കന്‍ ഡോളര്‍ എന്ന് അവിടെ കുറിച്ചിരുന്നു. ഉണങ്ങി വരണ്ട ലുക്ക് ആയിരുന്നെങ്കിലും മൂന്നുനാലു മുരിങ്ങക്കായ്കള്‍ എടുത്തു അടുത്തുണ്ടായിരുന്ന ത്രാസില്‍ വച്ചു നോക്കി, ഓരോന്നായി പിന്‍വലിച്ചു. ഒടുവില്‍ ഒരു മുരിങ്ങക്കായ അവശേഷിച്ചു, ഒരു പൗണ്ട്, 8 ഡോളര്‍, രൂപക്കണക്കില്‍ 736.00. വാങ്ങാനോ, അതോ സാംബാര്‍ ആശയം ഉപേക്ഷിക്കണോ? ഒരു പൗണ്ടുള്ള മുങ്ങിക്കയുംപിടിച്ചു അവിടുത്തെ 7.99 ഡോളര്‍ വിലയുടെ ബോര്‍ഡിനടുത്തു വിളറിയ മുഖവുമായി ഒരു സാംബാര്‍ സ്നേഹി നില്‍ക്കുന്ന പടം ഭാര്യക്ക് അയച്ചുകൊടുത്തു.

ഇപ്പോള്‍ ഓരോ നിമിഷവും ഒരു തിരഞ്ഞെടുപ്പാണ് ആവശ്യം. നിലനില്പിനുള്ള തിരഞ്ഞെടുപ്പ്. സാമ്പത്തിക റിപ്പോര്‍ട്ടുകളില്‍ പണപ്പെരുപ്പം ഒരു ശതമാന സംഖ്യയായി മാത്രം കാണപ്പെടുന്നു 3%, 6%, ചിലപ്പോള്‍ 8%. പെട്രോള്‍ വില കുറച്ച് സെന്റുകള്‍ ഉയരുന്നു, സാധനങ്ങളുടെ വില കുറച്ച് ഡോളര്‍ കൂടി. സാമ്പത്തിക വിദഗ്ധരും രാഷ്ട്രീയ നേതാക്കളും ഇതിനെ കുറിച്ച് ചര്‍ച്ച ചെയ്യുന്നു. എന്നാല്‍ ഈ കണക്കുകളുടെ പിന്നില്‍ മറ്റൊരു നിശ്ശബ്ദ കഥയുണ്ട്‌സാധാരണ മനുഷ്യന്റെ ക്രമേണ വര്‍ധിക്കുന്ന ക്ഷീണം.

ഒരു സാധാരണ ജോലി ചെയ്യുന്ന മനുഷ്യനു സാമ്പത്തിക സമ്മര്‍ദ്ദം പെട്ടെന്ന് വരുന്ന ഒരു ദുരന്തമല്ല. അത് പതുക്കെ ജീവിതത്തിലേക്ക് കടന്നു വരുന്നതാണ്. ആ മാറ്റം ആദ്യം കാണുന്നത് പെട്രോള്‍ പമ്പിലായിരിക്കും.
ഒരിക്കല്‍ സാധാരണ ചെലവായിരുന്ന ജോലി യാത്ര, ഇപ്പോള്‍ ഒരു ഭാരം പോലെ തോന്നുന്നു. മുമ്പ് നാല്പത് ഡോളര്‍ കൊണ്ട് നിറഞ്ഞിരുന്ന ടാങ്ക്, ഇന്ന് അറുപത് ഡോളറിനും മുകളിലേക്ക് പോകുന്നു. പമ്പിലെ അക്കങ്ങള്‍ പതുക്കെ ഉയരുമ്പോള്‍ അതിനെ നോക്കി നില്‍ക്കുന്ന മനുഷ്യന്റെ മനസ്സിലും ഒരു ഭാരം കൂടി ഉയരുന്നു.

പലര്‍ക്കും കാറില്‍ ജോലി സ്ഥലത്തേക്ക് പോകുന്നത് ഒരു തിരഞ്ഞെടുപ്പ് അല്ല-അത് ഒരു അനിവാര്യതയാണ്. അതിനാല്‍ പെട്രോള്‍ വില ഉയരുന്നത് അവരുടെ ജീവിതച്ചെലവില്‍ ഒരു നിര്‍ബന്ധിത വര്‍ധനയായി മാറുന്നു.
എന്നാല്‍ പ്രശ്‌നം പെട്രോളില്‍ മാത്രം ഒതുങ്ങുന്നില്ല.

പണപ്പെരുപ്പ് പതുക്കെ ജീവിതത്തിന്റെ എല്ലാ മേഖലകളിലേക്കും പടരുന്നു. സൂപ്പര്‍മാര്‍ക്കറ്റില്‍ പോകുമ്പോള്‍ പഴയ വിലകള്‍ മാറിയതായി കാണാം. പാല്‍, മുട്ട, ബ്രെഡ്, പച്ചക്കറികള്‍-എല്ലാം കുറച്ചു കൂടി വില കൂടിയിരിക്കുന്നു. ഒരൊറ്റ സാധനത്തിന്റെ വില വലിയ ആഘാതമല്ലെങ്കിലും, ബില്ലിന്റെ മൊത്തം തുക മാസംതോറും ഉയരുന്നു.

ഇതിന് കുടുംബങ്ങള്‍ പതുക്കെ മാറ്റങ്ങള്‍ വരുത്തുന്നു. പരിചിത ബ്രാന്‍ഡുകള്‍ക്ക് പകരം സ്റ്റോര്‍ ബ്രാന്‍ഡുകള്‍ തിരഞ്ഞെടുക്കുന്നു. റെസ്റ്റോറന്റുകളിലേക്കുള്ള യാത്ര കുറയ്ക്കുന്നു. വീട്ടിലെ ചില ചെലവുകള്‍ പിന്നോട്ട് മാറ്റുന്നു. ഇവ വാര്‍ത്തകളില്‍ പ്രത്യക്ഷപ്പെടുന്ന കാര്യങ്ങള്‍ അല്ലെങ്കിലും, മധ്യവര്‍ഗ്ഗത്തിന്റെ ജീവിതത്തില്‍ നടക്കുന്ന വലിയ മാറ്റങ്ങളുടെ അടയാളങ്ങളാണ്.

പണപ്പെരുപ്പത്തിന്റെ ഏറ്റവും ശ്രദ്ധിക്കപ്പെടാത്ത ഫലം മാനസിക ക്ഷീണമാണ്. ഓരോ തീരുമാനവും ഇപ്പോള്‍ കണക്കുകൂട്ടലുകളോടെയാണ്. സൂപ്പര്‍മാര്‍ക്കറ്റിലേക്കുള്ള ഒരു ചെറിയ യാത്ര പോലും ഒരു ബജറ്റ് ചിന്തയായി മാറുന്നു. ഒരു ചെറിയ യാത്ര പോലും പെട്രോള്‍ ചെലവിനെ ആശ്രയിച്ച് തീരുമാനിക്കേണ്ടിവരുന്നു. മാസ ശമ്പളം പഴയപോലെ തന്നെ ആയിരിക്കുമ്പോഴും, ചെലവുകള്‍ പതുക്കെ ഉയരുകയാണ്.
ഈ സ്ഥിരമായ കണക്കുകൂട്ടല്‍ മനുഷ്യനെ ക്ഷീണിപ്പിക്കുന്നു.

ഇത് വെറും സാമ്പത്തിക പ്രശ്‌നമല്ല-മനസ്സിനെയും ബാധിക്കുന്ന ഒരു അവസ്ഥയാണ്. ഓരോ തീരുമാനവും പണവുമായി ബന്ധപ്പെട്ടാല്‍ ജീവിതം കൂടുതല്‍ ചുരുങ്ങിയതായി തോന്നും. ദേശീയ തലത്തില്‍ പണപ്പെരുപ്പത്തെക്കുറിച്ചുള്ള ചര്‍ച്ചകള്‍ പലപ്പോഴും വലിയ സാമ്പത്തിക ആശയങ്ങളിലായിരിക്കും. പലിശനിരക്കുകള്‍, ആഗോള വിപണികള്‍, ഊര്‍ജ്ജനയങ്ങള്‍-ഇവയെല്ലാം പ്രധാനമാണ്. പക്ഷേ സാധാരണ മനുഷ്യന്റെ അനുഭവം അതിലുപരി വ്യത്യസ്തമാണ്. അവര്‍ക്കു സാമ്പത്തികം ഒരു ഗ്രാഫോ റിപ്പോര്‍ട്ടോ അല്ല. അത് പെട്രോള്‍ പമ്പിലെ ഉയരുന്ന അക്കങ്ങളാണ്. സൂപ്പര്‍മാര്‍ക്കറ്റിലെ ബില്ലാണ്.

മാസാവസാനം ശമ്പളം മതിയാകുമോ എന്നുള്ള ചിന്തയാണ്. എന്നിരുന്നാലും സാധാരണ മനുഷ്യന്റെ സഹിഷ്ണുത അതിശയകരമാണ്. അവര്‍ ജോലി തുടരുന്നു, കുടുംബത്തെ സംരക്ഷിക്കുന്നു, ജീവിതം മുന്നോട്ട് കൊണ്ടുപോകുന്നു. എന്നാല്‍ ആ ക്ഷീണം യഥാര്‍ത്ഥമാണ്. പണപ്പെരുപ്പം ഒറ്റ സംഖ്യയല്ല.അത് ദിവസേന ജീവിതം മുന്നോട്ട് കൊണ്ടുപോകാന്‍ ശ്രമിക്കുന്ന സാധാരണ മനുഷ്യന്‍ നിശ്ശബ്ദമായി വഹിക്കുന്ന ഭാരമാണ്.

ഇവിടെ വിലകുറയുന്നതു മനുഷ്യനുമാത്രമാണ്, യുദ്ധങ്ങളില്‍ എത്ര സൈനികര്‍, എത്ര കുട്ടികള്‍ , എത്ര സാധാരണക്കാര്‍ മരിച്ചു എന്നതാണ് കാര്യം. ഒക്കെ ഒരു സംഖ്യ മാത്രം. യുദ്ധത്തിനും വെട്ടിപ്പിടിക്കലിനും പിടിച്ചെടുക്കലിനും പരിധിയില്ലാത്ത നീക്കുപോക്കുകള്‍ നടത്തുമ്പോള്‍, സാധാരണക്കാരുടെ സമ്മര്‍ദ്ദം, ക്ഷീണം അതളക്കാന്‍ പാകത്തില്‍ വല്ലതും നിലവിലുണ്ടോ? കാണുമായിരിക്കും.-vkorason@yahoo.com.