ന്യൂഡൽഹി: അമേരിക്കയിൽ ജനിച്ച പെൺകുട്ടിയുടെ കസ്റ്റഡി സംബന്ധിച്ച  തർക്കത്തിൽ, വിദേശ കോടതിയുടെ ഉത്തരവിന് പ്രാധാന്യമുണ്ടെങ്കിലും കുട്ടി ഇന്ത്യയിൽ ഇതിനകം ഉറച്ച ജീവിത അടിത്തറ നേടിയിട്ടുണ്ടെങ്കിൽ അവ മാത്രം നിർണായക ഘടകമാകില്ലെന്ന് ഡൽഹി ഹൈക്കോടതി വ്യക്തമാക്കി. വേർപിരിഞ്ഞ് കഴിയുന്ന ദമ്പതികൾ നൽകിയ രണ്ട് ഹർജികൾ പരിഗണിച്ചുകൊണ്ടാണ് ഏപ്രിൽ 1-നുള്ള ഉത്തരവിൽ ജഡ്ജിമാർ ഈ വിലയിരുത്തൽ നടത്തിയത്.  ജസ്റ്റിസുമാരായ നവീൻ ചൗള, രവീന്ദർ ദുദേജ  എന്നിവരടങ്ങിയ ബെഞ്ചിന്റേതാണ് നിരീക്ഷണം.

അമേരിക്കൻ പൗരത്വമുള്ളതോ കുറച്ച് വർഷങ്ങൾ അവിടെ താമസിച്ചിട്ടുള്ളതോ ആയ കുട്ടിയുടെ ക്ഷേമം നിർണയിക്കാൻ അമേരിക്കൻ കോടതിക്ക് സാധിക്കില്ലെന്ന് ജഡ്ജിമാർ അഭിപ്രായപ്പെട്ടു.

ഇപ്പോൾ 11 വയസുള്ള കുട്ടി അമ്മയോടൊപ്പം ഇന്ത്യയിൽ താമസിക്കുകയും ഇവിടെ വിദ്യാഭ്യാസം തുടരുകയും ചെയ്യുന്നതായും കോടതി ശ്രദ്ധിച്ചു. 2022-ൽ സുപ്പീരിയർ കോർട്ട് ഓഫ് ന്യൂ ഹാവെൻ ദമ്പതികൾക്ക് വിവാഹമോചനം അനുവദിക്കുകയും കുട്ടിക്ക് സംയുക്ത രക്ഷാകർതൃത്വം നിർദേശിക്കുകയും ചെയ്തിരുന്നു.

ഭർത്താവിനെതിരെ ഭാര്യ ഉന്നയിച്ച ലൈംഗികാതിക്രമ ആരോപണങ്ങൾക്ക് അമേരിക്കൻ കോടതി മതിയായ തെളിവില്ലെന്ന് കണ്ടെത്തിയിരുന്നെങ്കിലും, ആ ഉത്തരവിന് നിർബന്ധിതമായ സ്വാധീനമല്ലാതെ ഉപദേശപരമായ സ്വഭാവമേ ഉണ്ടാകൂ എന്നും ഡൽഹി ഹൈക്കോടതി പറഞ്ഞു. അതേസമയം, ഭാര്യക്കെതിരായ ഗാർഹിക പീഡന ആരോപണങ്ങൾ സാധുവാണെന്ന് കണ്ടെത്തിയിട്ടുണ്ടെന്നും കോടതി രേഖപ്പെടുത്തി.

2022-ലെ അമേരിക്കൻ കോടതി ഉത്തരവിന് പിന്നാലെ കുട്ടിയെ ഇന്ത്യയിലേക്ക് കൊണ്ടുവന്ന നടപടി പൂർണമായും സത്യസന്ധമായ നടപടിയെന്നു പറയാനാകില്ലെന്നും കോടതി നിരീക്ഷിച്ചു. എന്നാൽ കുട്ടി കഴിഞ്ഞ നാല് വർഷമായി ഇന്ത്യയിൽ പഠിച്ചും ജീവിച്ചും വരുന്നതിനാൽ വീണ്ടും അമേരിക്കയിലേക്ക് അയയ്ക്കുന്നത് കുട്ടിയുടെ ക്ഷേമത്തിന് അനുകൂലമാകില്ലെന്നും കോടതി വിലയിരുത്തി.

ഇരുവരും ഇന്ത്യൻ പൗരന്മാരാണെന്നും, ഭർത്താവിന് മാത്രമാണ് അമേരിക്കയിൽ ജോലി ചെയ്യാനുള്ള അനുമതിയുള്ളതെന്നും, ഭാര്യയ്ക്ക് അത്തരമൊരു അനുമതിയില്ലെന്നും കോടതി ചൂണ്ടിക്കാട്ടി. കുട്ടിയെ അമേരിക്കയിലേക്ക് തിരികെ അയയ്ക്കണമെങ്കിൽ അമ്മയും അവിടെ പോകേണ്ട സാഹചര്യമുണ്ടാകുമെന്നും, അവൾക്ക് അവിടെ എത്രകാലം തുടരാനാകുമെന്ന കാര്യത്തിൽ ഉറപ്പില്ലെന്നും കോടതി പറഞ്ഞു.

അതേസമയം,  ഭർത്താവ് കുട്ടിയെ ലൈംഗികമായി പീഡിപ്പിച്ചെന്ന ഗുരുതര ആരോപണങ്ങൾ ഭാര്യ ഉന്നയിക്കുകയും 2017-ൽ അമേരിക്കയിൽ പോലീസ് പരാതി നൽകിയതിനെ തുടർന്ന് ഭർത്താവിനെ അറസ്റ്റ് ചെയ്തതായും കോടതിയിൽ ചൂണ്ടിക്കാട്ടി. കുട്ടിയുടെ മാനസികാവസ്ഥയെ ഇത് ബാധിച്ചിട്ടുണ്ടെന്നും യുഎസിൽ നിയമിച്ച സൈക്കോതെറാപ്പിസ്റ്റിന്റെ റിപ്പോർട്ട് സൂചിപ്പിക്കുന്നതായി ഭാര്യയുടെ അഭിഭാഷകൻ കോടതിയിൽ വാദിച്ചു.

മറുവശത്ത്, ഭാര്യ കോടതിയുടെ അനുമതിയില്ലാതെ തെറ്റായ കാരണങ്ങൾ ചൂണ്ടിക്കാട്ടി കുട്ടിയെ ഇന്ത്യയിലേക്ക് കൊണ്ടുവന്നതാണെന്ന് ഭർത്താവിന്റെ അഭിഭാഷകൻ വാദിച്ചു. അമേരിക്കൻ കോടതി തെളിവുകൾ വിശദമായി പരിശോധിച്ച ശേഷമാണ് സംയുക്ത രക്ഷാകർതൃത്വം നിർദേശിച്ചതെന്നും അദ്ദേഹം പറഞ്ഞു.

ഇരുവിഭാഗങ്ങളുടെയും ഹർജികൾ പരിഗണിച്ച ശേഷം, കുട്ടിയുടെ ക്ഷേമമാണ് പ്രധാന പരിഗണനയെന്ന് ആവർത്തിച്ച കോടതി, രക്ഷാകർതൃത്വവുമായി ബന്ധപ്പെട്ട മറ്റ് നിയമപരമായ മാർഗങ്ങൾ സ്വീകരിക്കാൻ ഇരുവർക്കും സ്വാതന്ത്ര്യമുണ്ടെന്ന് വ്യക്തമാക്കിയതോടെയാണ് ഹർജികൾ തള്ളിയത്.