കേരളത്തിലെ സ്ത്രീ സുരക്ഷയെയും 'ലവ് ജിഹാദ്' വിഷയത്തെയും കുറിച്ച്  മുൻ ഡിജിപിയും ബിജെപി നേതാവുമായ ആർ. ശ്രീലേഖയുടെ പരാമർശം വിവാദത്തിൽ . സംസ്ഥാനത്ത് ലവ് ജിഹാദ് പോലുള്ള പ്രവണതകൾ ശക്തമാണെന്നും എന്നാൽ സർക്കാർ ഇതിന് നേരെ കണ്ണടയ്ക്കുകയാണെന്നും ശ്രീലേഖ ആരോപിച്ചു .  ഇത്തരത്തിലുള്ള നിസ്സംഗത കേരളത്തിലെ സ്ത്രീകളുടെ സുരക്ഷയെ അപകടത്തിലാക്കുന്നുവെന്ന് അവർ വിമർശനം ഉന്നയിച്ചു.

കേരളത്തിൽ സ്ത്രീകൾക്കെതിരെയുള്ള അതിക്രമങ്ങൾ വർദ്ധിച്ചുവരികയാണെന്നും ഇതിൽ ലവ് ജിഹാദിന് വലിയ പങ്കുണ്ടെന്നും ശ്രീലേഖ ചൂണ്ടിക്കാട്ടുന്നു. ഇത്തരം കേസുകളിൽ കൃത്യമായ അന്വേഷണമോ നടപടിയോ ഉണ്ടാകുന്നില്ല. വോട്ട് ബാങ്ക് ലക്ഷ്യമിട്ടുള്ള രാഷ്ട്രീയ താൽപ്പര്യങ്ങളാണ് സർക്കാരിനെ ഇതിൽ നിന്ന് പിന്നോട്ട് വലിക്കുന്നത്. ലവ് ജിഹാദ് എന്നത് വെറും മിഥ്യയല്ലെന്നും അത് യാഥാർത്ഥ്യമാണെന്ന് തെളിയിക്കുന്ന ഒട്ടേറെ സംഭവങ്ങൾ തന്റെ സർവീസ് കാലയളവിൽ കണ്ടിട്ടുണ്ടെന്നും അവർ വെളിപ്പെടുത്തി

സ്ത്രീകൾക്ക് നിർഭയമായി പുറത്തിറങ്ങാൻ കഴിയാത്ത അവസ്ഥയാണ് കേരളത്തിലുള്ളതെന്ന് ശ്രീലേഖ ആരോപിക്കുന്നു. സൈബർ ഇടങ്ങളിലും പുറത്തും സ്ത്രീകൾ വേട്ടയാടപ്പെടുന്നു. ലവ് ജിഹാദിന് ഇരയാകുന്ന പെൺകുട്ടികളുടെ കുടുംബങ്ങൾ സഹായത്തിനായി അധികൃതരെ സമീപിക്കുമ്പോൾ പലപ്പോഴും അവഗണിക്കപ്പെടുകയാണ് പതിവ്. ഈ സാഹചര്യം മുതലെടുത്ത് പല ക്രിമിനൽ സംഘങ്ങളും പെൺകുട്ടികളെ വലയിലാക്കുന്നുവെന്നും ഇതിന് ഭരണകൂടത്തിന്റെ പരോക്ഷമായ പിന്തുണയുണ്ടെന്നും അവർ കൂട്ടിച്ചേർത്തു.

 പൊലീസ് ഉദ്യോഗസ്ഥയായിരുന്ന കാലത്ത് ലഭിച്ച വിവരങ്ങളുടെയും അനുഭവങ്ങളുടെയും അടിസ്ഥാനത്തിലാണ് താൻ സംസാരിക്കുന്നതെന്ന് ശ്രീലേഖ വ്യക്തമാക്കി. നിലവിൽ ബിജെപി തിരുവനന്തപുരം കോർപ്പറേഷൻ കൗൺസിലർ കൂടിയായ ശ്രീലേഖ നിയമസഭാ തിരഞ്ഞെടുപ്പിൽ വട്ടിയൂർക്കാവ് മണ്ഡലത്തിലെ എൻഡിഎ സ്ഥാനാർഥികൂടിയാണ്. കേരളത്തിലെ ക്രമസമാധാന നില തകർന്നിരിക്കുകയാണെന്നും സ്ത്രീകൾക്ക് നേരെ നടക്കുന്ന അതിക്രമങ്ങൾ  തടയാൻ കർശനമായ നിയമനിർമാണം ആവശ്യമാണെന്നും അവർ പറഞ്ഞു.