വാഷിങ്ടൺ: അമേരിക്കൻ സെക്കൻഡ് ലേഡി ഉഷ വാൻസ് കുട്ടികളിൽ വായനാശീലം വളർത്തുന്നതിനായി പുതിയ പോഡ്കാസ്റ്റ് പരമ്പര ആരംഭിച്ചു. 'സ്റ്റോറി ടൈം  വിത്ത് ദ സെക്കൻഡ് ലേഡി' എന്ന പേരിലുള്ള ഈ പോഡ്കാസ്റ്റ് കഥപറച്ചിലും പ്രമുഖരുടെ പങ്കാളിത്തവും ഉൾപ്പെടുത്തി കുട്ടികളിൽ വായനയോട് താൽപ്പര്യം വളർത്തുകയെന്ന ലക്ഷ്യത്തോടെയാണ് ആരംഭിച്ചത്.

സ്പോട്ടിഫൈയും യൂട്യൂബും വഴി ഒരേസമയം മൂന്ന് എപ്പിസോഡുകൾ പുറത്തിറക്കിയാണ് പോഡ്കാസ്റ്റ് ആരംഭിച്ചത്. ആദ്യ എപ്പിസോഡിൽ ബിയാട്രിക്‌സ് പോട്ടറിന്റെ പ്രശസ്ത ബാലസാഹിത്യ കൃതി ദ ടെയിൽ ഓഫ് പീറ്റർ റാബിറ്റ് ഉഷ വാൻസ് വായിച്ചു. ബാല്യകാലത്ത് തനിക്ക് ഏറെ പ്രിയപ്പെട്ട പുസ്തകമായിരുന്നു ഇതെന്നും  ഇപ്പോൾ സ്വന്തം കുട്ടികൾക്കും ഇത് വായിച്ചുകൊടുക്കാറുണ്ടെന്നും അവർ പറഞ്ഞു.

തന്റെ കുട്ടികളോടൊപ്പം കഥ വായിക്കുന്ന സമയം ദിവസത്തിലെ ഏറ്റവും സന്തോഷകരമായ നിമിഷമാണ് എന്ന് അവർ അഭിപ്രായപ്പെട്ടു. പുസ്തകങ്ങൾ വഴി ശാസ്ത്രം, പ്രകൃതി, ദൂരദേശങ്ങൾ, പുരാതന സംസ്കാരങ്ങൾ, അമേരിക്കയുടെ ചരിത്രം എന്നിവയെക്കുറിച്ച് കുട്ടികൾക്ക് അറിയാൻ സാധിക്കുന്നുവെന്നും അവർ കൂട്ടിച്ചേർത്തു.

ക്ലാസ് മുറിക്ക് പുറത്തുള്ള വായനയെ പ്രോത്സാഹിപ്പിക്കുകയും കുട്ടികളിൽ വായനാശേഷി മെച്ചപ്പെടുത്തുകയും ചെയ്യുകയാണ് ഈ സംരംഭത്തിന്റെ ലക്ഷ്യം. വീട്ടിൽ വായനാശീലം വളർത്തുന്നത് കുട്ടികളുടെ പഠനശേഷിയും ആത്മവിശ്വാസവും വർധിപ്പിക്കുമെന്ന് ഉഷ വാൻസ് വ്യക്തമാക്കി.

പോഡ്കാസ്റ്റിന്റെ തുടർ എപ്പിസോഡുകളിൽ വിവിധ മേഖലകളിലെ പ്രമുഖർ പങ്കാളികളാകും. മുൻ റേസിംഗ് ഡ്രൈവർ ഡാനിക്ക പാട്രിക് ഡിസ്നിയുടെ കാർസ് എന്ന കഥ വായിച്ചുകൊടുക്കുന്ന എപ്പിസോഡും ഇതിനകം പുറത്തിറങ്ങി. ബാല്യകാല വായനാനുഭവങ്ങൾ പങ്കുവെച്ചുകൊണ്ടായിരുന്നു അവരുടെ അവതരണം.

മറ്റൊരു എപ്പിസോഡിൽ പാരാലിംപ്യനും എഴുത്തുകാരനുമായ ബ്രെന്റ് പോപ്പൻ കുട്ടികളുടെ പുസ്തകമായ പ്ലേഗ്രൗണ്ട് ലെസൺസ് വായിച്ചു. വൈകല്യമുള്ള കുട്ടികളുടെ ആത്മവിശ്വാസവും ഉൾക്കൊള്ളലും പ്രോത്സാഹിപ്പിക്കുന്ന സന്ദേശമാണ് ഈ കഥ നൽകുന്നത്.

2025 ജൂണിൽ ആരംഭിച്ച സമ്മർ റീഡിംഗ് ചാലഞ്ചിന്റെ തുടർച്ചയായാണ് പുതിയ പോഡ്കാസ്റ്റ് അവതരിപ്പിച്ചതെന്ന് അധികൃതർ അറിയിച്ചു. പ്രസ്തുത പദ്ധതിയിൽ അമേരിക്കയിലെ എല്ലാ സംസ്ഥാനങ്ങളിൽ നിന്നുമായി പതിനായിരക്കണക്കിന് കുട്ടികൾ പങ്കെടുത്തിരുന്നു.

കോവിഡ് കാലഘട്ടത്തിന് ശേഷം അമേരിക്കയിൽ കുട്ടികളുടെ വായനാശീലം കുറഞ്ഞുവരുന്നതായി റിപ്പോർട്ടുകൾ സൂചിപ്പിക്കുന്ന സാഹചര്യത്തിലാണ് ഈ സംരംഭം ആരംഭിച്ചതെന്ന് വിലയിരുത്തപ്പെടുന്നു. കുടുംബങ്ങൾ ഒരുമിച്ച് വായനയിൽ പങ്കാളികളാകണമെന്ന് ആഹ്വാനം ചെയ്തുകൊണ്ട് ഓരോ എപ്പിസോഡും 'നാം വായിക്കുമ്പോൾ വളരുന്നു' എന്ന സന്ദേശത്തോടെയാണ് അവസാനിക്കുന്നത്.