ലോസ് ആഞ്ചലസ്: നഗരത്തിലെ വര്‍ധിച്ചുവരുന്ന ചൂടും കാലാവസ്ഥാ വ്യതിയാനവും നേരിടാന്‍ ബൃഹത്തായ പദ്ധതികളുമായി മേയര്‍ സ്ഥാനാര്‍ത്ഥി നിത്യ രാമന്‍. നഗരത്തിലുടനീളം ഒരു ലക്ഷം മരങ്ങള്‍ നട്ടുപിടിപ്പിക്കുമെന്നും തണല്‍ സൗകര്യങ്ങള്‍ വര്‍ദ്ധിപ്പിക്കുമെന്നും തന്റെ തിരഞ്ഞെടുപ്പ് പ്രചാരണത്തിനിടെ അവര്‍ പ്രഖ്യാപിച്ചു.

സമ്പന്നമായ പ്രദേശങ്ങളില്‍ ധാരാളം മരങ്ങളും പാര്‍ക്കുകളും ഉള്ളപ്പോള്‍, പാവപ്പെട്ടവര്‍ താമസിക്കുന്ന ഇടങ്ങളില്‍ മരങ്ങളില്ലാത്തതും കൊടുംചൂട് അനുഭവപ്പെടുന്നതും ചൂണ്ടിക്കാട്ടി 'സിപ് കോഡ്' അനുസരിച്ചാണ് താപനില നിശ്ചയിക്കപ്പെടുന്നതെന്ന് അവര്‍ കുറ്റപ്പെടുത്തി.

നഗരത്തിലെ ചൂട് കുറയ്ക്കുന്നതിനായി ഒരു ലക്ഷം മരങ്ങള്‍ നട്ടുപിടിപ്പിക്കും. പ്രത്യേകിച്ച് ആഫ്രിക്കന്‍-അമേരിക്കന്‍, ലാറ്റിനോ വിഭാഗങ്ങള്‍ താമസിക്കുന്ന പിന്നാക്ക മേഖലകളില്‍ കൂടുതല്‍ തണല്‍ ഉറപ്പാക്കും.

അത്യുഷ്ണം മൂലമുള്ള മരണങ്ങള്‍ ഒഴിവാക്കാവുന്നതാണെന്നും, വെയിലില്‍ നിന്ന് രക്ഷപ്പെടാനുള്ള സുരക്ഷിതമായ ഇടങ്ങള്‍ എല്ലാ നഗരവാസികള്‍ക്കും ലഭ്യമാക്കുമെന്നും നിത്യ രാമന്‍ ഉറപ്പുനല്‍കി.

പതിറ്റാണ്ടുകളായുള്ള നഗര ആസൂത്രണത്തിലെ പിഴവുകള്‍ തിരുത്തി പരിസ്ഥിതി നീതി നടപ്പാക്കാനാണ് തന്റെ ശ്രമമെന്ന് അവര്‍ കൂട്ടിച്ചേര്‍ത്തു.