മുംബൈ: ഇന്ത്യന്‍ നാഷണല്‍ സിനി അക്കാദമി (INCA) അവതരിപ്പിക്കുന്ന ആദ്യ കല്യാണ്‍ ജ്വല്ലേഴ്‌സ്- INCA അവാര്‍ഡുകളുടെ നാമനിര്‍ദ്ദേശങ്ങള്‍ പ്രഖ്യാപിച്ചു. രാജ്യത്തെ വിവിധ ഭാഷാ സിനിമകളിലെ മികവുകള്‍ ആദരിക്കാന്‍ ലക്ഷ്യമിട്ടുള്ള ഈ അവാര്‍ഡുകള്‍ ഇന്ത്യന്‍ സിനിമയ്ക്ക് ഒരു ദേശീയ വേദിയായി മാറുമെന്നാണ് പ്രതീക്ഷിക്കുന്നത്.

2025 ജനുവരി മുതല്‍ ഡിസംബര്‍ വരെ തിയേറ്ററുകളില്‍ റിലീസ് ചെയ്ത ചിത്രങ്ങളില്‍ നിന്നാണ് നാമനിര്‍ദ്ദേശങ്ങള്‍ തെരഞ്ഞെടുത്തിരിക്കുന്നത്. മൊത്തം 25 വിഭാഗങ്ങളിലായി അവാര്‍ഡുകള്‍ നല്‍കും. മികച്ച ചിത്രം, മികച്ച സംവിധായകന്‍, മികച്ച നടന്‍, മികച്ച നടി എന്നീ നാല് പ്രധാന അവാര്‍ഡുകള്‍ 12 ഇന്ത്യന്‍ ഭാഷകളിലായി പ്രഖ്യാപിക്കും. കൂടാതെ സംഗീതം, രചന, സാങ്കേതിക മേഖലകള്‍ ഉള്‍പ്പെടെ 21 വിഭാഗങ്ങളും ഉള്‍പ്പെടുത്തിയിട്ടുണ്ട്.

ഈ വര്‍ഷം ഏറ്റവും കൂടുതല്‍ നാമനിര്‍ദ്ദേശങ്ങള്‍ നേടിയ ചിത്രങ്ങളില്‍ ധുരന്ധര്‍ (17), ലോക: ചാപ്റ്റര്‍ വണ്‍ (15), കാന്താര: ചാപ്റ്റര്‍ 1 (13), ഛാവാ (13), സയ്യാറ (13), ലാലോ (12), റുദ്ര (11), മിറായ് (10), ഹോംബൗണ്ട് (9), ദ ഗേള്‍ഫ്രണ്ട് (8) എന്നിവ മുന്‍പന്തിയിലാണ്.

നാമനിര്‍ദ്ദേശങ്ങള്‍ INCA ജൂറി നടത്തിയ വിലയിരുത്തലിന്റെ അടിസ്ഥാനത്തിലാണ് ഷോര്‍ട്ട്ലിസ്റ്റ് ചെയ്തത്. അന്തിമ വിജയികളെ രാജ്യത്തെ വിവിധ സിനിമാ ഇന്‍ഡസ്ട്രികളെ പ്രതിനിധീകരിക്കുന്ന സംഘടനകള്‍ തിരഞ്ഞെടുക്കും.
INCA അവാര്‍ഡ് വിതരണം ഏപ്രില്‍ 16ന് മുംബൈയില്‍ നടക്കും. പ്രമുഖ സിനിമാ പ്രവര്‍ത്തകര്‍ ഈ ചടങ്ങില്‍ പങ്കെടുക്കും.