യുദ്ധം, യുദ്ധം, ലോകം മുഴുവൻ, 
പടഹം കൊട്ടിപ്പരസ്യങ്ങൾ. 
യുദ്ധം, വെള്ളിടിവെട്ടുംമട്ടിൽ, 
ഉൾക്കിടിലത്തിൻ മാറ്റൊലി ഹാ! 
യുദ്ധം, നരസംഹാര നൃത്തം, 
ശത്രുത മൂത്തവരന്യോന്യം, 
ചത്തും കൊന്നും വെല്ലുവിളിച്ചും, 
പട്ടട തീർത്തു രസിക്കുന്നു.

അധികാരത്തിന്നാൾ രൂപങ്ങൾ, 
ഭരണത്തലവന്മാരായി, 
ഭസ്മാസുരസന്നാഹം കൂട്ടി. 
പടയോട്ടങ്ങൾ പണ്ടുമുതൽ.
ശപ്തന്മാർ, യുദ്ധക്കൊതിയന്മാർ-
അടിച്ചമർത്തുന്നയൽ രാജ്യം; 
ആയുധക്കളിമേളത്തോടെ,
കുരുതിക്കളമായ് മാറ്റുന്നു; 
മണ്ണാകുന്ന മനുഷ്യാ, 
നിന്റെ മതിബഭ്രമങ്ങൾക്കതിരുണ്ടോ? 
പ്രതികാരത്തിൻ മുർത്തികളായ്, 
മരണം വാരി വിതയ്ക്കുന്നോ? 
ആകാശം, കര, കടലെല്ലാം,
പോരാട്ടത്തിൻ വേദികളായ്, 
കണ്ണീർപ്പുഴകളൊഴുക്കുന്നു. 
കുരുതിക്കളമായ് മാറ്റുന്നു. 
കൂട്ടം വിട്ടഭയാർത്ഥികളായി, 
ഓട്ടം, നിലവിളിയോടൊപ്പം; 
അംഗവിഹീനർ, 
മൃതപ്രായർ-ഗതികിട്ടാതെയുഴലുന്നോർ, 
ജീവനുവേണ്ടിപ്പിടയുന്ന, 
ദൃശ്യങ്ങൾ ഭയദായകമായ് തീവ്രവാദികളങ്ങിങ്ങമ്പേ; 
കാഹളമൂതിയടുക്കുന്നു.
എത്ര ദുരന്തം, ദയനീയം....! 
ദുഷ്ടത തൻ വിളയാട്ടങ്ങൾ. 
ഏകാധിപത്യം തകരുന്ന,
കാലം ചിരമാഗതമായി, 
ലോകമഹായുദ്ധങ്ങളിനി, 
താണ്ഡവമാടരുതേ മേലിൽ.