ലെബനൻ ഇപ്പോൾ വളരെ അപകടകരമായ ഒരു അവസ്ഥയിലൂടെയാണ് കടന്നുപോകുന്നത്. നിലവിലെ ഇസ്രായേൽ/അമേരിക്ക-ഇറാൻ യുദ്ധത്തിൽ ഹിസ്ബുള്ള കൂടി ഇസ്രായേലുമായി ഏറ്റുമുട്ടലിന് ഒരുങ്ങുന്നത് ലെബനനെ വലിയൊരു നാശത്തിലേക്ക് എത്തിക്കുമെന്നതിനു സംശയമില്ല.

മുമ്പ് 2023-ൽ ഇസ്രായേൽ-ഹമാസ് യുദ്ധം ആരംഭിച്ചതിന്റെ തൊട്ടുപിന്നാലെ ഹിസ്ബുള്ളയും ഇസ്രായേലും തമ്മിൽ അതിർത്തിയിൽ ഏറ്റുമുട്ടൽ നടത്തി. ഇത് ഒരു വർഷത്തോളം നീണ്ടുനിൽക്കുകയും അത് മൂലം രാജ്യത്തിന്റെ സാമ്പത്തിക അടിത്തറ തകരുകയും ചെയ്തിരുന്നു. ഈ ഘട്ടത്തിൽ ഇപ്പോൾ ഹിസ്ബുള്ളയുടെ ഓരോ റോക്കറ്റ് വിക്ഷേപണവും ലെബനന്റെ നിലനിൽപ്പിനെത്തന്നെയാണ് ചോദ്യം ചെയ്യുന്നത്.

നിലവിൽ ലെബനൻ നേരിടുന്ന ഏറ്റവും വലിയ വെല്ലുവിളി ഹിസ്ബുള്ളയുടെ സമാന്തര സൈനിക ഭരണകൂടമാണ്. ഇറാൻ നൽകുന്ന ആയുധബലത്തിലും സാമ്പത്തിക പിന്തുണയിലും വിശ്വസിച്ച് ഇസ്രായേലിനെതിരെ ഹിസ്ബുള്ള നടത്തുന്ന നീക്കങ്ങൾ പലപ്പോഴും ലെബനൻ സർക്കാരിന്റെ അറിവോ സമ്മതമോ ഇല്ലാതെയാണ്
ഇസ്രായേലിന്റെ സൈനിക കരുത്തിനെ നേരിടാൻ ഹിസ്ബുള്ളയുടെ ഗറില്ലാ പോരാളികൾക്ക് സാധിക്കുമെങ്കിലും, തിരിച്ചടിയുണ്ടായാൽ അത് ബാധിക്കുന്നത് ലെബനനിലെ സാധാരണക്കാരെയും അവിടുത്തെ അടിസ്ഥാന സൗകര്യങ്ങളെയുമാണ്. ഇസ്രായേലിന്റെ വിനാശകരമായ 'ദഹിയ സിദ്ധാന്തം' പ്രകാരം സൈനിക കേന്ദ്രങ്ങൾക്കൊപ്പം സിവിൽ മേഖലകളെയും ലക്ഷ്യം വെക്കുന്നത് രാജ്യത്തെ ദശാബ്ദങ്ങൾ പിന്നോട്ട് അടിപ്പിക്കും.

സാമ്പത്തികമായി തകർന്നുപോയ ഒരു ജനതയ്ക്ക് മേലാണ് യുദ്ധത്തിന്റെ ഈ അധികഭാരം അടിച്ചേൽപ്പിക്കപ്പെടുന്നത്. ലെബനൻ കറൻസിയുടെ മൂല്യം 90 ശതമാനത്തിലധികം ഇടിയുകയും ജനങ്ങൾമരുന്നിനും ഭക്ഷണത്തിനും വേണ്ടി നെട്ടോട്ടമോടുകയും ചെയ്യുന്ന സാഹചര്യത്തിൽ, ഒരു വലിയ യുദ്ധം താങ്ങാനുള്ള ശേഷി രാജ്യത്തിനില്ല.

ദക്ഷിണ ലെബനനിൽ നിന്നുള്ള ലക്ഷക്കണക്കിന് അഭയാർത്ഥികളുടെ ഒഴുക്ക് തലസ്ഥാനമായ ബെയ്റൂട്ടിലെയും മറ്റ് നഗരങ്ങളിലെയും സാമൂഹിക ക്രമം തെറ്റിച്ചിരിക്കുകയാണ്.

മാത്രമല്ല, ലബനനിലെ വിവിധ മത-രാഷ്ട്രീയ വിഭാഗങ്ങൾക്കിടയിൽ ഹിസ്ബുള്ളയുടെ നിലപാടുകൾ വലിയ ഭിന്നത സൃഷ്ടിച്ചിട്ടുണ്ട്. രാജ്യത്തിന്റെ വിദേശനയവും യുദ്ധപ്രഖ്യാപനവും ഒരു സായുധ സംഘടനയുടെ കൈകളിൽ എത്തുന്നതിനെ ക്രിസ്ത‌്യൻ, സുന്നി വിഭാഗങ്ങൾ ശക്തമായി എതിർക്കുന്നു.

ഈ ആഭ്യന്തര വിള്ളലുകൾ മറ്റൊരു ആഭ്യന്തര യുദ്ധത്തിലേക്കുള്ള സാധ്യതകളാണ് തുറന്നിടുന്നത്. ചുരുക്കത്തിൽ, ഇറാന്റെ പ്രാദേശിക താൽപ്പര്യങ്ങൾ സംരക്ഷിക്കാനായി ഹിസ്ബുള്ള നടത്തുന്ന ഓരോ നീക്കവും ലെബനൻ എന്ന പരമാധികാര രാഷ്ട്രത്തിന്റെ അന്ത്യത്തിലേക്കുള്ള ചുവടുവെപ്പായി മാറുകയാണ്. അന്താരാഷ്ട്ര സമൂഹം ഇടപെട്ട് നയതന്ത്രപരമായ പരിഹാരം കണ്ടില്ലെങ്കിൽ, പശ്ചിമേഷ്യയിലെ ഏറ്റവും മനോഹരമായ ഒരു രാജ്യം ചാരമായി മാറാൻ അധിക സമയം വേണ്ടിവരില്ല.