പശ്ചിമേഷ്യയെ യുദ്ധക്കളമാക്കി മാറ്റിക്കൊണ്ട് അമേരിക്ക-ഇസ്രായേൽ സഖ്യവും ഇറാനും തമ്മിലുള്ള പോരാട്ടം അതീവ ഗുരുതരമായ ഘട്ടത്തിലേക്ക് കടക്കുന്നു. യുദ്ധത്തിന്റെ ആദ്യ നാളുകളിൽ തന്നെ ഏകദേശം 800-ഓളം പേർ കൊല്ലപ്പെട്ടതായാണ് ഔദ്യോഗിക റിപ്പോർട്ടുകൾ സൂചിപ്പിക്കുന്നത്.

ലോകസമാധാനത്തിന് ഭീഷണിയായി ഇറാൻ വളർത്തുന്ന പ്രോക്സി ഗ്രൂപ്പുകളെയും അവരുടെ ആണവ പദ്ധതികളെയും തകർക്കുക എന്ന ലക്ഷ്യത്തോടെ അമേരിക്ക നടത്തുന്ന 'ഓപ്പറേഷൻ എപ്പിക് ഫ്യൂറി ഇസ്രായേലിന്റെ 'ഓപ്പറേഷൻ ലയൺസ് റോർ' എന്നീ സൈനിക നീക്കങ്ങളിൽ ഇരുപക്ഷത്തും വൻതോതിലുള്ള നാശനഷ്ടങ്ങളാണ് റിപ്പോർട്ട് ചെയ്യപ്പെടുന്നത്.

യുദ്ധത്തിന്റെ ആഘാതം ഇറാനിലാണ് ഏറ്റവും കൂടുതൽ പ്രതിഫലിക്കുന്നത്. ഇറാാനിലെ റെഡ് ക്രസന്റ് സൊസൈറ്റിയുടെ കണക്കുകൾ പ്രകാരം മരണസംഖ്യ 787 ആയി ഉയർന്നു. എൻബിസി ന്യൂസ്, അൽ ജസീറ, വാൾസ്ട്രീറ്റ് ജേർണൽ തുടങ്ങിയ പ്രമുഖ മാധ്യമങ്ങൾ ഇക്കാര്യം സ്ഥിരീകരിച്ചിട്ടുണ്ട്. ഇറാന്റെ പകുതിയോളം നഗരങ്ങളെ യുദ്ധം നേരിട്ട് ബാധിച്ചിരിക്കുകയാണ്.

ഏകദേശം 1,039 ആക്രമണങ്ങൾ രാജ്യത്തിന്റെ വിവിധ ഭാഗങ്ങളിൽ നടന്നതായും 153 നഗരങ്ങളിൽ നാശനഷ്ടങ്ങൾ സംഭവിച്ചതായും ഇറാന്റെ ഔദ്യോഗിക വാർത്താ ഏജൻസിയായ തസ്നീം റിപ്പോർട്ട് ചെയ്യുന്നു. 153 കൗണ്ടികളിലായി 1,009 എമർജൻസി റെസ്പോൺസ് ടീമുകളെ വിന്യസിച്ചുകൊണ്ട് ദുരിതാശ്വാസ പ്രവർത്തനങ്ങൾ തുടരുകയാണെന്ന് റെഡ് ക്രസന്റ് അറിയിച്ചു.

ഇറാന്റെ പരമോന്നത നേതാവ് ആയത്തുള്ള അലി ഖൊമേനിയും നാല്പതോളം ഇറാനിലെ മുതിർന്ന നേതാക്കളും ഇസ്രായേൽ വ്യോമാക്രമണത്തിൽ കൊല്ലപ്പെട്ടത് ഇറാൻ ഭരണകൂടത്തിന് ഏറ്റ ഏറ്റവും വലിയ പ്രഹരമായി. ഇതിനുപുറമെ, ഇറാന്റെ 20 ഓളം പടക്കപ്പലുകളും പ്രധാന മിസൈൽ കേന്ദ്രങ്ങളും തകർക്കപ്പെട്ടു. തന്ത്രപ്രധാനമായ നതാൻസ് ആണവനിലയത്തിനും ഡ്രോൺ നിർമ്മാണ ശാലകൾക്കും നേരെയും ആക്രമണമുണ്ടായി.

അമേരിക്കൻ-ഇസ്രായേൽ കേന്ദ്രങ്ങൾക്കും തിരിച്ചടി: തിരിച്ചടിയായി ഇറാൻ നടത്തിയ ബാലിസ്റ്റിക് മിസൈൽ വർഷത്തിൽ ഇസ്രായേലിലും അമേരിക്കൻ സൈനിക കേന്ദ്രങ്ങളിലും നാശനഷ്ടങ്ങൾ സംഭവിച്ചിട്ടുണ്ട്. ടെൽ അവീവ് ഉൾപ്പെടെയുള്ള ജനവാസ മേഖലകളിൽ പതിച്ച മിസൈലുകൾ കെട്ടിടങ്ങൾ തകർക്കുകയും സിവിലിയന്മാരുടെ മരണത്തിന് ഇടയാക്കുകയും ചെയ്തു. കുവൈറ്റിലെയും റിയാദിലെയും അമേരിക്കൻ എംബസികൾക്ക് നേരെയും ആക്രമണമുണ്ടായി. യുദ്ധത്തിനിടയിലുണ്ടായ പിഴവുമൂലം മൂന്ന് അമേരിക്കൻ എഫ്-15 യുദ്ധവിമാനങ്ങൾ തകർന്നതായും ആറ് അമേരിക്കൻ സൈനികർ കൊല്ലപ്പെട്ടതായും സ്ഥിരീകരിച്ചിട്ടുണ്ട്. ദുബായ് വിമാനത്താവളത്തിന് നേരെയുണ്ടായ ആക്രമണം ഗൾഫ് മേഖലയിലാകെ പരിഭ്രാന്തി പടർത്തി.

ലോകത്തെ പ്രധാന എണ്ണക്കടത്തു പാതയായ ഹോർമുസ് കടലിടുക്ക് ഇറാൻ അടച്ചതോടെ ആഗോള വിപണിയിൽ എണ്ണവില കുതിച്ചുയർന്നു. ഖത്തർ എനർജിയുടെ പ്രവർത്തനം തടസ്സപ്പെട്ടതും ഗൾഫ് രാജ്യങ്ങളിലെ പ്രധാന വിമാനത്താവളങ്ങൾ അടച്ചതും ആഗോള ഗതാഗത സംവിധാനത്തെ താറുമാറാക്കി. ഹൂതികളെപ്പോലെയുള്ള ഇറാൻ അനുകൂല സംഘടനകൾ അന്താരാഷ്ട്ര ചരക്കുനീക്കത്തിന് ഭീഷണിയായതും ആഗോള വ്യാപാര മേഖലയെ വലിയ പ്രതിസന്ധിയിലാക്കിയിരിക്കുകയാണ്.