ടാമ്പ, ഫ്ലോറിഡ: ഫെബ്രുവരി 28-ന് നടന്ന മലയാളി അസോസിയേഷൻ ഓഫ് ടാമ്പ (MAT) യുടെ പുതിയ ഭാരവാഹികളുടെ സ്ഥാനാരോഹണച്ചടങ്ങിൽ ശ്രദ്ധേയ സാന്നിധ്യമായി എത്തിയത് ഫൊക്കാന  പ്രസിഡന്റ് സ്ഥാനാർത്ഥി ലീലാ മാരേട്ടായിരുന്നു. പരിപാടി വൈവിധ്യമാർന്ന സമൂഹനേതാക്കളുടെയും വിവിധ മലയാളി ഫെഡറേഷനുകളിലെ പ്രതിനിധികളുടെയും സാന്നിധ്യത്തോടെ ഒരു കുടുംബസംഗമത്തിന്റെ സൗഹൃദാന്തരീക്ഷത്തിൽ നടന്നു. 

വർഷങ്ങളായി ഫൊക്കാനയുടെ വിവിധ  നേതൃത്വപദവികൾ അലങ്കരിച്ച  ലീലാ മാരേട്ട്, സംഘടനാ രാഷ്ട്രീയത്തിലെ പല വെല്ലുവിളികളും നേരിട്ടിട്ടും തന്റെ ലക്ഷ്യത്തിൽ നിന്ന് പിന്മാറാത്ത നേതാവെന്ന നിലയിലാണ് അറിയപ്പെടുന്നത്. മുൻകാല തിരഞ്ഞെടുപ്പുകളിൽ വിവിധ രാഷ്ട്രീയ സാഹചര്യങ്ങൾ മൂലം അവസരം നഷ്ടപ്പെട്ടെങ്കിലും,  പിന്മാറാതെ കൂടുതൽ കരുത്തോടെ മുന്നേറുന്ന നിലപാടാണ് അവർ സ്വീകരിച്ചിട്ടുള്ളത്.

അമേരിക്കൻ മലയാളി സമൂഹത്തെ നേരിട്ട് സമീപിച്ച്, ശക്തമായ എക്സിക്യൂട്ടീവ്-നാഷണൽ കമ്മിറ്റിയുമായി അവർ രൂപപ്പെടുത്തിയ പാനൽ ഇന്ന് ഫൊക്കാന തെരഞ്ഞെടുപ്പ് രംഗത്ത് ഏറ്റവും ശക്തമായ ടീമുകളിലൊന്നായി വിലയിരുത്തപ്പെടുന്നു. രാഷ്ട്രീയഭിന്നതകളെ അതിജീവിച്ച് പ്രവർത്തിക്കാൻ കഴിയുന്ന കഴിവും ദീർഘകാല സംഘടനാനുഭവവും അവരെ വ്യത്യസ്തയാക്കുന്നു.

അമേരിക്കൻ മലയാളികളുടെ ആവശ്യങ്ങൾ മനസ്സിലാക്കി, ചോദിക്കാതെ തന്നെ ഉചിതമായ കാര്യങ്ങൾ നടപ്പിലാക്കാൻ കഴിയുന്ന നേതൃത്വം ആവശ്യമാണെന്നും അതിനായി താൻ തയ്യാറാണെന്നും അവർ  വ്യക്തമാക്കി. 22 വർഷത്തെ സാമൂഹിക-സംഘടനാനുഭവവും കുടുംബപരമായ പാരമ്പര്യവും ചേർന്ന ദീർഘദർശിത്വം ഫൊക്കാനയെ പുതിയ ഉയരങ്ങളിലേക്ക് നയിക്കുമെന്ന ആത്മവിശ്വാസവും അവർ പങ്കുവച്ചു.

പുരുഷാധിപത്യ  രാഷ്ട്രീയപരിസരത്തിലും ആത്മവിശ്വാസത്തോടും സഹിഷ്ണുതയോടും കൂടി മുന്നണിയിൽ നിന്ന് പോരാടുന്ന നേതാവെന്ന നിലയിൽ ലീലാ മാരേട്ടിന്റെ  പ്രവർത്തനം  ശ്രദ്ധേയമാണ്.  

ന്യൂയോർക്കിൽ നിന്ന് ഫ്ലോറിഡയിലെത്തി  സംസ്ഥാനതല പരിപാടികളിൽ സജീവ പങ്കാളിത്തം ഉറപ്പാക്കുന്ന ലീല, സാധാരണക്കാരന്റെ പ്രതീക്ഷകൾ പൂർത്തിയാക്കുക എന്ന ലക്ഷ്യത്തോടെ വിശ്രമമില്ലാതെ പ്രവർത്തിക്കുമെന്ന് വ്യക്തമാക്കി.   വ്യാപക പിന്തുണയും പ്രവർത്തനവും ഈ തിരഞ്ഞെടുപ്പിൽ വിജയത്തിലേക്കുള്ള ആത്മവിശ്വാസം വർധിപ്പിക്കുന്നതായി അവരുടെ അനുകൂലകർ വിലയിരുത്തുന്നു.

ഫൊക്കാന പ്രസിഡന്റ് തിരഞ്ഞെടുപ്പ് അടുത്തുവരുമ്പോൾ, ലീലാ മാരേട്ടിന്റെ  സാന്നിധ്യവും ദൂരദർശിത്വവും അമേരിക്കൻ മലയാളി സമൂഹത്തിൽ ശക്തമായ പ്രതീക്ഷകൾ സൃഷ്ടിച്ചിരിക്കുകയാണ്.