ന്യൂയോർക്ക്: പ്രായം കൂടുന്നത് നിങ്ങളെ അലട്ടാറുണ്ടോ, അങ്ങനെയുള്ളവരെ പെട്ടെന്ന് വാർദ്ധക്യം ബാധിക്കുമെന്നാണ് പുതിയ പഠനം പറയുന്നത്.  പ്രായം കൂടുന്നതിനെക്കുറിച്ചുള്ള ഭയം ശരീരത്തിന്റെ കോശനിലയിൽ തന്നെ വേഗത്തിൽ വാർദ്ധക്യം വരുത്താൻ ഇടയാക്കാമെന്ന് പഠനം വ്യക്തമാക്കുന്നു. ന്യൂയോർക്ക് യൂണിവേഴ്സിറ്റിയുടെ ഗ്ലോബൽ പബ്ലിക് ഹെൽത്ത് സ്കൂൾ നടത്തിയ പഠനത്തിലാണ് ഈ കണ്ടെത്തൽ.

700-ലധികം സ്ത്രീകളെ ഉൾപ്പെടുത്തി നടത്തിയ പഠനത്തിൽ, പ്രായം കൂടുന്നതിനെക്കുറിച്ച് കൂടുതൽ ആശങ്ക പ്രകടിപ്പിച്ചവർക്ക് രക്തപരിശോധനയിൽ വേഗത്തിലുള്ള ജൈവ വാർദ്ധക്യത്തിന്റെ അടയാളങ്ങൾ കണ്ടെത്തി. 'എപിജെനറ്റിക് ക്ലോക്കുകൾ' എന്നറിയപ്പെടുന്ന ആധുനിക അളവുകോലുകളാണ് ഇതിന് ഉപയോഗിച്ചത്. ആരോഗ്യപ്രശ്നങ്ങൾ വരുമെന്ന ഭയമാണ് ഏറ്റവും ശക്തമായി ജൈവ വാർദ്ധക്യവുമായി ബന്ധപ്പെട്ടു കണ്ടത്. സൗന്ദര്യം കുറയുമോ, ആകർഷകത്വം കുറയുമോ, ആരോഗ്യപ്രശ്നങ്ങൾ വരുമോ ,പ്രസവശേഷി നഷ്ടപ്പെടുമോ എന്ന ആശങ്കകൾക്ക് ഇത്രയും ജൈവപ്രഭാവം കണ്ടെത്താനായില്ല.വാർദ്ധക്യഭയം വെറും മാനസിക പ്രശ്നമല്ല; അത് ശരീരത്തിലും അടയാളം വീഴ്ത്താം എന്നാണ് ഇതുസംബന്ധിച്ച ജേണലിൽ പ്രസിദ്ധീകരിച്ചിട്ടുള്ളത്.

ഫലങ്ങൾ പ്രകാരം, ആരോഗ്യപ്രശ്നങ്ങളെക്കുറിച്ചുള്ള സ്ഥിരമായ ആശങ്കയാണ് വേഗത്തിലുള്ള ജൈവ വാർദ്ധക്യവുമായി ഏറ്റവും ശക്തമായി ബന്ധപ്പെട്ടു കണ്ടത്. മുൻ ഗവേഷണങ്ങൾ വേഗത്തിലുള്ള എപിജെനറ്റിക് വാർദ്ധക്യം ശരീര ക്ഷയം, പ്രായബന്ധിത രോഗങ്ങളുടെ സാധ്യത വർധിക്കൽ എന്നിവയുമായി ബന്ധപ്പെട്ടതായി കാണിച്ചിട്ടുണ്ട്.

സ്ത്രീകൾക്ക് പ്രായത്തെക്കുറിച്ചുള്ള സാമൂഹിക സമ്മർദ്ദങ്ങൾ കൂടുതലാണെന്നും ഗവേഷകർ ചൂണ്ടിക്കാട്ടുന്നു. യുവത്വം, സൗന്ദര്യം, പ്രസവശേഷി എന്നിവയെക്കുറിച്ചുള്ള സമൂഹത്തിന്റെ പ്രതീക്ഷകളും മധ്യവയസ്സിൽ മാതാപിതാക്കളെ പരിചരിക്കുന്ന ചുമതലകളും ചേർന്ന് ആശങ്ക വർധിപ്പിക്കാമെന്നും ഗവേഷകർ വ്യക്തമാക്കി.

അതേസമയം, ഈ പഠനം വളരെകുറച്ചുപേരുടെ വിവരങ്ങൾ മാത്രം ഉൾക്കൊള്ളുന്നതെന്നും  ഗവേഷകർ മുന്നറിയിപ്പ് നൽകി. പുകവലി, മദ്യപാനം പോലുള്ള ആരോഗ്യശീലങ്ങൾ ഉൾപ്പെടുത്തി വീണ്ടും വിശകലനം ചെയ്തപ്പോൾ, വാർദ്ധക്യഭയവും ജൈവ വാർദ്ധക്യവും തമ്മിലുള്ള ബന്ധം സ്ഥിതിവിവരശാസ്ത്രപരമായി ശക്തമല്ലാതായി.

മാനസികാരോഗ്യവും ശാരീരികാരോഗ്യവും തമ്മിലുള്ള ബന്ധം ഒരുപോലെ പ്രധാനമാണ്. വാർദ്ധക്യം എല്ലാവർക്കും അനുഭവിക്കേണ്ട ഒന്നാണ്. അതിനെക്കുറിച്ച് സമൂഹതലത്തിൽ കൂടുതൽ ആരോഗ്യകരമായ സമീപനം ആവശ്യമുണ്ട് എന്നും ഗവേഷകർ അഭിപ്രായപ്പെട്ടു.

പ്രായം കൂടുന്നതിനെക്കുറിച്ചുള്ള ആശങ്കകൾ ദീർഘകാല ആരോഗ്യത്തെ എങ്ങനെ സ്വാധീനിക്കുന്നു എന്നതിൽ കൂടുതൽ പഠനങ്ങൾ ആവശ്യമാണെന്ന് അവർ കൂട്ടിച്ചേർത്തു.