ഭാരതപ്പുഴയുടെ തീരത്ത്, നിളയോര പാതയിലൊരുങ്ങിയ നിള സംഗ്രഹാലയം ഇനി പൊതുജനങ്ങൾക്ക് തുറക്കാൻ ഒരുങ്ങുന്നു. വളരെ പെട്ടെന്ന് തന്നെ  ഉദ്ഘാടനം കഴിഞ്ഞ് പ്രവർത്തനമാരംഭിക്കാനിരിക്കുന്ന ഈ റിവർ മ്യൂസിയം, പൊന്നാനിക്കളരിയും കേരളത്തിന്റെ സമഗ്രചരിത്രവും ഒറ്റക്കെട്ടായി അവതരിപ്പിക്കുന്ന സാംസ്കാരിക കേന്ദ്രമായാണ് രൂപകൽപ്പന ചെയ്തിരിക്കുന്നത്. നദിയും നാടും ചേർന്നൊരു സ്മൃതിസ്ഥാപനമായി നിള സംഗ്രഹാലയം മാറുമെന്ന പ്രതീക്ഷയിലാണ് നാട്ടുകാർ.

*നിർമ്മാണവും സവിശേഷതകളും*

ചമ്രവട്ടം പ്രോജക്ട് ഓഫീസിന്റെ ഭാഗമായ ഇറിഗേഷൻ ഭൂമിയിലാണ് മ്യൂസിയം പണികഴിപ്പിച്ചിരിക്കുന്നത്. നിർമ്മാണ ഘട്ടത്തിൽ ഭൂമി വിട്ടുകിട്ടൽ ഉൾപ്പെടെ നിരവധി സാങ്കേതികവും ഭരണപരവുമായ തടസ്സങ്ങൾ നേരിട്ടെങ്കിലും, അവയെല്ലാം മറികടന്ന് ഇന്ന് മ്യൂസിയം പ്രവർത്തനസജ്ജമായി നിൽക്കുകയാണ്. ഏകദേശം പതിനേഴായിരം ചതുരശ്ര അടി വിസ്തീർണ്ണത്തിൽ ഇൻഡോ-ഡച്ച് വാസ്തു മാതൃകയിൽ ലോകോത്തര നിലവാരത്തിൽ നിർമിച്ചിരിക്കുന്ന ഈ കെട്ടിടം, പാരമ്പര്യവും ആധുനികതയും കൈകോർക്കുന്ന ശില്പസൗന്ദര്യത്തിന്റെ ഉദാഹരണമാണ്.

ഇന്ത്യയിലെ ആദ്യത്തെ ‘ബ്ലൈന്റ് ഫ്രണ്ട്ലി’ മ്യൂസിയം എന്ന പ്രത്യേകതയും നിള സംഗ്രഹാലയത്തിനുണ്ട്. കാഴ്ചവൈകല്യമുള്ളവർക്ക് സ്പർശിച്ച് മനസ്സിലാക്കാവുന്ന മോഡലുകൾ, ബ്രെയിൽ വിവരണങ്ങൾ, ശബ്ദസഹായ സംവിധാനങ്ങൾ എന്നിവ ഉൾപ്പെടുത്തി സജ്ജീകരിച്ചിരിക്കുന്നതിനാൽ ഉൾക്കൊള്ളലിന്റെ പുതിയ മാതൃകയാകുന്നു ഈ മ്യൂസിയം.

*കാഴ്ചകളും സ്മരണകളും*

നിള സംഗ്രഹാലയം ഒരു സാധാരണ മ്യൂസിയമല്ല; നദിയോടൊപ്പം ഒഴുകിയൊരു സംസ്കാരത്തിന്റെ കഥാപ്രവാഹമാണ്.
ഇടശ്ശേരിയുടെ പൂതപ്പാട്ട്, പറയിപെറ്റ പന്തിരുകുലം തുടങ്ങിയവയുടെ ചിത്രാവിഷ്കാരങ്ങൾ സാഹിത്യസ്മരണകളെ ജീവനുള്ളവയാക്കുന്നു. എഴുത്തച്ഛൻ, സൈനുദ്ധീൻ മഖ്‌ദൂം, പൂന്താനം തുടങ്ങിയ മഹാന്മാരുടെ സ്മരണകൾക്കും പ്രത്യേകം ഇടമുണ്ട്. ഇടശ്ശേരി, ഉറൂബ്, എം.ടി. വാസുദേവൻ നായർ, എം. ഗോവിന്ദൻ, അക്കിത്തം എന്നിവരുടെ സാഹിത്യ സംഭാവനകളും അവരുടെ കൂട്ടായ്മയും സമഗ്രമായി അവതരിപ്പിച്ചിരിക്കുന്നു.

പൊന്നാനിയുടെ സാമൂഹിക രാഷ്ട്രീയ ചരിത്രവും സമഗ്രമായി അവതരിപ്പിക്കുന്നു.
ബീഡിത്തൊഴിലാളി സമരം, സാമൂതിരിയുടെ കാലഘട്ടം, വാസ്കോ ഡ ഗാമയുടെ വരവ്, നിളാതീരത്തെ മാധവ ജ്യോതിഷപരമ്പര, തിരുന്നാവായ മാമാങ്കം, സർവോദയ മേള, നാവികബന്ധങ്ങൾ, സംഗീത പാരമ്പര്യം,ഇങ്ങനെ നാടിന്റെ പലതരം സ്മരണകളെ ഒരൊറ്റ സാംസ്കാരിക വേദിയിൽ ഒത്തുചേർത്തിരിക്കുന്നു.

*ഗവേഷണത്തിനും വിദ്യാഭ്യാസത്തിനും*

നിള സംഗ്രഹാലയം വെറും പ്രദർശനകേന്ദ്രമല്ല; ഗവേഷണത്തിനും വിദ്യാഭ്യാസത്തിനും പ്രാധാന്യം നൽകുന്ന വിജ്ഞാനകേന്ദ്രമാണ്. വിദ്യാർത്ഥികൾക്കും ഗവേഷകർക്കും വിജ്ഞാനകുതുകികൾക്കും ആവശ്യമായ രേഖകളും വിവരങ്ങളും ലഭ്യമാക്കുന്ന രീതിയിലാണ് സജ്ജീകരണം. നദി-കേന്ദ്രിത സംസ്കാരങ്ങളുടെ പഠനത്തിനും പ്രദേശികചരിത്ര ഗവേഷണത്തിനും ഇത് ഒരു പ്രധാന വേദിയായിത്തീരും.
മ്യൂസിയത്തിലെ കാഴ്ചകൾ രൂപകൽപ്പന ചെയ്തിരിക്കുന്നത് ഊരാളുങ്കൽ ഡിസൈൻ സ്ട്രാറ്റജി ലാബാണ്.
ആധുനിക സാങ്കേതിക വിദ്യയുടെ സഹായത്തോടെ ദൃശ്യ-ശ്രാവ്യ അവതരണങ്ങൾ ഒരുക്കിയിരിക്കുന്നത് പുതുതലമുറയെ ആകർഷിക്കുന്ന തരത്തിലാണ്.

പൊന്നാനിയുടെ സഞ്ചാരപാതയിൽ പുതിയ അധ്യായം

പ്രവർത്തനസജ്ജമാകുന്നതോടെ, നിള സംഗ്രഹാലയം പൊന്നാനിയിലെ സഞ്ചാരപാതയിൽ ഒഴിവാക്കാനാവാത്ത ഒരിടമായി മാറും.
ഭാരതപ്പുഴയുടെ ശാന്തമായ തീരവും ചരിത്രസ്മരണകളും ചേർന്ന്, സന്ദർശകർക്കൊരു ആത്മീയവും ബൗദ്ധികവുമായ അനുഭവം സമ്മാനിക്കാനാണ് ഈ സാംസ്കാരിക കേന്ദ്രം ലക്ഷ്യമിടുന്നത്.

നദി വെറും ജലപ്രവാഹമല്ല; അത് ഒരു സംസ്കാരത്തിന്റെ ശിരാവഹിനിയാണ്. ആ സംസ്കാരത്തെ പുതുതലമുറയ്ക്ക് പകർന്ന് നൽകുന്ന ജീവിച്ചിരിക്കുന്ന ചരിത്രപുസ്തകമായാണ് നിള സംഗ്രഹാലയം ഇനി തുറന്നുകിടക്കുന്നത്.