വാഷിംഗ്ടൺ: യുഎസ്–ഇന്ത്യ പുതിയ വ്യാപാര കരാറിലെ നിർദേശങ്ങൾ അമേരിക്കയിലെ ചെമ്മീൻ മത്സ്യത്തൊഴിലാളികൾക്ക് തിരിച്ചടിയാകാമെന്ന് ലൂസിയാനയിലെ റിപ്പബ്ലിക്കൻ കോൺഗ്രസ് അംഗം ക്ലേ ഹിഗ്ഗിൻസ് മുന്നറിയിപ്പ് നൽകി.

ഫെബ്രുവരി 3ന് പ്രസിഡന്റ് ട്രംപിന് അയച്ച കത്തിലാണ് അദ്ദേഹം ആശങ്ക രേഖപ്പെടുത്തിയത്. കത്ത് ചൊവ്വാഴ്ച മാധ്യമങ്ങൾക്കു നൽകി.

ഇന്ത്യൻ കടൽവിഭവങ്ങൾക്ക് തീരുവ കുറച്ചാൽ ആഭ്യന്തര ചെമ്മീൻ വ്യവസായത്തെ ബാധിക്കുമെന്ന് ഹിഗ്ഗിൻസ് പറഞ്ഞു. കുറഞ്ഞ നിലവാരത്തിലുള്ള, ഫാമിൽ വളർത്തിയ ഇന്ത്യൻ ചെമ്മീൻ കൂടുതൽ ഇറക്കുമതി ചെയ്യാൻ വഴിയൊരുക്കുമെന്ന്  അദ്ദേഹം മുന്നറിയിപ്പ് നൽകി.

ഏറെക്കാലമായി അമേരിക്കയിലേക്ക് ചെമ്മീനും കൊഞ്ചും കയറ്റുമതി ചെയ്യുന്ന പ്രധാന രാജ്യങ്ങളിൽ ഒന്നാണ് ഇന്ത്യ എന്നും അദ്ദേഹം ചൂണ്ടിക്കാട്ടി. മുൻപ് ഏർപ്പെടുത്തിയിരുന്ന തീരുവ നടപടി മൂലം ആഭ്യന്തര മത്സ്യത്തൊഴിലാളികൾക്ക് ആശ്വാസമുണ്ടായിരുന്നുവെന്നും ഹിഗ്ഗിൻസ് പറഞ്ഞു.

ഗൾഫ് പ്രദേശത്ത് പിടിക്കുന്ന വലിയ ചെമ്മീൻ ഉയർന്ന നിലവാരമുള്ളതാണെന്നും കർശനമായ പരിസ്ഥിതി, തൊഴിൽ മാനദണ്ഡങ്ങൾ പാലിച്ചാണ് ഉത്പാദനം നടക്കുന്നതെന്നും ഹിഗ്ഗിൻസ് വ്യക്തമാക്കി.

വിദേശ കടൽവിഭവ വ്യവസായങ്ങളിൽ പരിസ്ഥിതി മേൽനോട്ടവും പൊതുജനാരോഗ്യ മാനദണ്ഡങ്ങളും കുറവാണെന്നും അദ്ദേഹം ആരോപിച്ചു.

പുതിയ കരാറിൽ ഉയർന്ന തീരുവ ഏർപ്പെടുത്തുകയോ മറ്റു നടപടികൾ പരിഗണിക്കയോ ചെയ്യണമെന്നു അദ്ദേഹം ആവശ്യപ്പെട്ടു.

ലൂസിയാനയിലെ മത്സ്യത്തൊഴിലാളികൾക്ക് നീതിയുള്ള മത്സരം മാത്രമാണ് ആവശ്യമെന്ന്  ഹിഗ്ഗിൻസ് പറഞ്ഞു.

US Congressman objects to India deal provision