ന്യൂഡൽഹി: ഇന്ത്യ–അമേരിക്ക വ്യാപാരകരാറിൽ ഇന്ത്യൻ കർഷകരുടെയും ഡയറി മേഖലയുടെയും താൽപ്പര്യങ്ങൾ പൂർണമായി സംരക്ഷിച്ചിട്ടുണ്ടെന്ന് വാണിജ്യ–വ്യവസായ മന്ത്രി പിയുഷ് ഗോയൽ ലോക്‌സഭയിൽ അറിയിച്ചു. കൃഷി, ഡയറി ഉൽപ്പന്നങ്ങൾ എന്നിവ കരാറിന്റെ പരിധിയിൽ ഉൾപ്പെടുത്തിയിട്ടില്ലെന്നും, അതുവഴി രാജ്യത്തിന്റെ ഏറ്റവും സെൻസിറ്റീവ് മേഖലകളെ സർക്കാർ സുരക്ഷിതമാക്കിയതായും അദ്ദേഹം വ്യക്തമാക്കി.

ഇന്ത്യ–യുഎസ് വ്യാപാരകരാർ കൃഷിയെയും ഭക്ഷ്യസുരക്ഷയെയും മുൻനിർത്തി തയ്യാറാക്കിയതാണെന്ന് ഗോയൽ പറഞ്ഞു. കൃഷിയും ഡയറിയും പോലുള്ള മേഖലകൾക്ക് ദോഷം സംഭവിക്കാതെ, എംഎസ്എംഇകൾക്കും നൈപുണ്യമുള്ള തൊഴിലാളികൾക്കും വ്യവസായ മേഖലയ്ക്കും പുതിയ അവസരങ്ങൾ സൃഷ്ടിക്കാനാണ് കരാർ ലക്ഷ്യമിടുന്നതെന്നും അദ്ദേഹം പറഞ്ഞു. ഇതോടൊപ്പം, ഇന്ത്യ–അമേരിക്ക ബന്ധം ശക്തിപ്പെടുത്താനും 140 കോടി ഇന്ത്യക്കാർക്കുള്ള ഊർജസുരക്ഷ ഉറപ്പാക്കാനും ഈ കരാർ സഹായകരമാകുമെന്നും ഗോയൽ കൂട്ടിച്ചേർത്തു.

ഈ വ്യാപാരകരാർ ഇന്ത്യയ്ക്ക് അഡ്വാൻസ്ഡ് ടെക്‌നോളജികളിലേക്കുള്ള പ്രവേശനം ലളിതമാക്കുമെന്നും ‘മേക്ക് ഇൻ ഇന്ത്യ ഫോർ ദി വേൾഡ്', ‘ഡിസൈൻ ഇൻ ഇന്ത്യ ഫോർ ദി വേൾഡ്’, ‘ഇന്നവേറ്റ് ഇൻ ഇന്ത്യ ഫോർ ദി വേൾഡ്' എന്നീ ദർശനങ്ങൾ യാഥാർഥ്യമാക്കുന്നതിൽ ഇത് നിർണായക പങ്ക് വഹിക്കുമെന്നും അദ്ദേഹം പ്രതീക്ഷ പ്രകടിപ്പിച്ചു.

ഗോയലിന്റെ പ്രസംഗത്തിനിടെ, പ്രതിപക്ഷ എംപിമാർ മുദ്രാവാക്യങ്ങൾ വിളിച്ച് സഭ തടസ്സപ്പെടുത്തിയതോടെ ലോക്‌സഭയിൽ വൻ ബഹളമുണ്ടായി. സാഹചര്യങ്ങൾ നിയന്ത്രണാതീതമായതിനെ തുടർന്ന് സ്പീക്കർ സഭ താൽക്കാലികമായി പിരിച്ചുവിട്ടു.

നിലവിൽ തുടരുന്ന ബജറ്റ് സമ്മേളനത്തിനിടെ, രാഷ്ട്രപതിയുടെ പ്രസംഗത്തോടുള്ള നന്ദിപ്രമേയ ചർച്ചയ്ക്ക് പ്രധാനമന്ത്രി നരേന്ദ്ര മോഡി ഇന്ന് മറുപടി നൽകും. ജനുവരി 28-ന് ബജറ്റ് സമ്മേളനത്തിന്റെ തുടക്കത്തിൽ രാഷ്ട്രപതി ദ്രൗപദി മുർമു ഇരുസഭകളുടെയും സംയുക്തസമ്മേളനത്തിൽ നടത്തിയ പ്രസംഗത്തിന് പിന്നാലെയാണ് നന്ദിപ്രമേയം അവതരിപ്പിച്ചിരിക്കുന്നത്.

ഇതിനു മുൻപ്, ഇന്ത്യ–യുഎസ് വ്യാപാരകരാർ ദീർഘകാലമായി ഔദ്യോഗിക–മന്ത്രിതല ചർച്ചകളിൽ കുടുങ്ങിക്കിടന്നതാണെന്നും, പ്രധാനമന്ത്രി നരേന്ദ്ര മോഡി നേരിട്ട് ഇടപെട്ടാണ് കരാർ അന്തിമമാക്കിയതെന്നും ഗോയൽ പറഞ്ഞിരുന്നു. യുഎസ് ഭരണകൂടം ഏർപ്പെടുത്തിയ 50 ശതമാനം തീരുവ മൂലം കടൽമത്സ്യങ്ങൾ, ടെക്സ്റ്റൈൽസ് തുടങ്ങിയ തൊഴിൽആധാരിത ഉൽപ്പന്നങ്ങളുടെ കയറ്റുമതി ദോഷകരമായി ബാധിച്ചതിനാൽ, കരാർ അനിവാര്യമായിരുന്നുവെന്നും അദ്ദേഹം വിശദീകരിച്ചു.

ഈ കരാർ ഇന്ത്യയുടെ സാമ്പത്തിക വളർച്ചയ്ക്കും കർഷകർക്കും ദരിദ്രർക്കും മത്സ്യത്തൊഴിലാളികൾക്കും സ്ത്രീകൾക്കും യുവജനങ്ങൾക്കും പുതിയ അവസരങ്ങൾ സൃഷ്ടിക്കുമെന്നും അതിന് താൻ 140 കോടി ഇന്ത്യക്കാരുടെ പേരിൽ പ്രധാനമന്ത്രിക്ക് നന്ദി അറിയിക്കുന്നു എന്നും ഗോയൽ പറഞ്ഞു.

ഇതിനിടെ, കോൺഗ്രസ് നേതാവ് രാഹുൽ ഗാന്ധിക്കെതിരെ കടുത്ത വിമർശനവും ഗോയൽ ഉന്നയിച്ചു. രാജ്യത്തിന്റെ പുരോഗതിയെക്കുറിച്ച് ആശങ്കയില്ലാത്ത നേതാക്കളാണ് രാജ്യത്തെ തെറ്റിദ്ധരിപ്പിക്കുന്നതെന്ന് ആരോപിച്ച ഗോയൽ, കോൺഗ്രസ് ഭരണകാലത്ത് ഇന്ത്യ ‘ഫ്രജൈൽ ഫൈവ്’ സമ്പദ്‌വ്യവസ്ഥകളിലൊന്നായി മാറിയിരുന്നുവെന്നും, രാഹുൽ ഗാന്ധിക്ക് അവസരം ലഭിച്ചാൽ രാജ്യം വീണ്ടും ആ നിലയിലേക്ക് തിരിച്ചെത്തുമെന്നും പറഞ്ഞു.

ഇന്ത്യ–യുഎസ് വ്യാപാരകരാറിനെക്കുറിച്ചുള്ള ഭരണ–പ്രതിപക്ഷ വാദപ്രതിവാദങ്ങൾ ബജറ്റ് സമ്മേളനത്തിൽ ഇനിയും ശക്തമാകുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.