ന്യൂഡൽഹി: വിദേശത്ത് നിന്ന് ഇന്ത്യയിലേക്ക് യാത്ര ചെയ്യുന്ന പ്രവാസികൾക്കും ഇന്ത്യൻ വംശജരായ ടൂറിസ്റ്റുകൾക്കും വലിയ ആശ്വാസമായി ബജറ്റ് 2026 പ്രഖ്യാപിച്ച പുതിയ ബാഗേജ് ചട്ടങ്ങൾ. 2026 ഫെബ്രുവരി 2 മുതൽ പ്രാബല്യത്തിൽ വന്ന പുതിയ ചട്ടങ്ങൾ പ്രകാരം, ആഭരണങ്ങൾ കൊണ്ടുവരുന്നതിൽ ഉണ്ടായിരുന്ന വിലപരിധി സർക്കാർ പൂർണമായും ഒഴിവാക്കി. ഇനി ആഭരണങ്ങൾക്ക് ഭാരപരിധി മാത്രം മാനദണ്ഡമായിരിക്കും.

2016-ലെ ബാഗേജ് ചട്ടങ്ങൾ പ്രകാരം, ഒരു വർഷത്തിലധികം വിദേശത്ത് താമസിച്ചിരുന്ന യാത്രക്കാർക്ക് ആഭരണങ്ങൾ ഡ്യൂട്ടി-ഫ്രീ ആയി കൊണ്ടുവരാൻ ഭാരവും വിലയും രണ്ടും പരിധിയുണ്ടായിരുന്നു. പുരുഷ യാത്രക്കാർക്ക് 20 ഗ്രാം വരെ ₹50,000 മൂല്യവും, സ്ത്രീ യാത്രക്കാർക്ക് 40 ഗ്രാം വരെ ₹1,00,000 മൂല്യവുമായിരുന്നു പരിധി. എന്നാൽ പുതിയ ചട്ടത്തിൽ വിലപരിധി പൂർണമായും ഒഴിവാക്കി, ഭാരം മാത്രം കണക്കാക്കും.

പുതിയ വ്യവസ്ഥ പ്രകാരം, ഒരു വർഷത്തിലധികം വിദേശത്ത് താമസിച്ച് ഇന്ത്യയിലേക്ക് മടങ്ങുന്ന അർഹരായ റെസിഡന്റുകൾക്കും ഇന്ത്യൻ വംശജരായ ടൂറിസ്റ്റുകൾക്കും ഡ്യൂട്ടി-ഫ്രീ ആയി ആഭരണങ്ങൾ കൊണ്ടുവരാൻ അനുവദിക്കുന്ന പരിധി ഇങ്ങനെ:
സ്ത്രീകൾക്ക് 40 ഗ്രാം വരെ,
സ്ത്രീകൾ ഒഴികെയുള്ളവർക്ക് 20 ഗ്രാം വരെ.

ധനമന്ത്രാലയത്തിന്റെ വിജ്ഞാപനത്തിൽ 'സ്വർണാഭരണങ്ങൾ' എന്നത് പ്രത്യേകമായി പരാമർശിച്ചിട്ടില്ലെങ്കിലും, പുതിയ ചട്ടം എല്ലാ തരത്തിലുള്ള ആഭരണങ്ങൾക്കും ബാധകമാണ്. എന്നാൽ വിലപരിധി ഒഴിവാക്കിയതിലൂടെ, സ്വർണാഭരണങ്ങൾ കൊണ്ടുവരുന്നവർക്ക് ഇതിന്റെ പ്രയോജനം ഏറ്റവും കൂടുതലായിരിക്കും.

2016-ൽ ചട്ടങ്ങൾ രൂപീകരിച്ച സമയത്ത് സ്വർണവില ഏകദേശം 10 ഗ്രാമിന് ₹30,000 ആയിരുന്നുവെങ്കിൽ, 2026 ഫെബ്രുവരി 2ൽ  അത് ₹1,43,926 വരെ ഉയർന്നു. ഏകദേശം പത്ത് വർഷത്തിനിടെ 393 ശതമാനത്തിലധികം വർധനയാണ് സ്വർണവിലയിൽ ഉണ്ടായത്. ഇന്നത്തെ സാഹചര്യത്തിൽ ₹1 ലക്ഷം കൊണ്ട് 10 ഗ്രാം സ്വർണം പോലും വാങ്ങാനാകാത്ത അവസ്ഥയിലായതിനാൽ, പഴയ വിലപരിധികൾ പ്രായോഗികമല്ലായിരുന്നു എന്ന വിമർശനവും ശക്തമായിരുന്നു.

ആഭരണങ്ങൾക്ക് പുറമേ, പൊതുവായ ഡ്യൂട്ടി-ഫ്രീ അലവൻസുകളും സർക്കാർ പുതുക്കി. പുതിയ ചട്ടങ്ങൾ പ്രകാരം:
റെസിഡന്റുകൾക്ക് ഡ്യൂട്ടി-ഫ്രീ അലവൻസ് ₹50,000ൽ നിന്ന് ₹75,000 ആയി വർധിപ്പിച്ചു.
ഇന്ത്യൻ വംശജനായ ടൂറിസ്റ്റുകൾക്കും ₹75,000 വരെ അനുവദിക്കും.
ടൂറിസ്റ്റ് വിസ ഒഴികെയുള്ള സാധുവായ വിസയുള്ള വിദേശികൾക്കും ₹75,000.
വിദേശ വംശജരായ ടൂറിസ്റ്റുകൾക്ക് ₹25,000.
ക്രൂ അംഗങ്ങൾക്ക് ₹2,500.

എന്നാൽ കരമാർഗം വഴി ഇന്ത്യയിലെത്തുന്ന യാത്രക്കാർക്ക് പൊതുവായ ഡ്യൂട്ടി-ഫ്രീ അലവൻസ് ബാധകമല്ലെന്ന് സർക്കാർ വ്യക്തമാക്കി.

മുൻപ്, യാത്രക്കാരൻ എത്തുന്ന രാജ്യത്തെ ആശ്രയിച്ചായിരുന്നു ഡ്യൂട്ടി-ഫ്രീ പരിധി നിശ്ചയിച്ചിരുന്നത്. നേപ്പാൾ, ഭൂട്ടാൻ, മ്യാൻമാർ എന്നിവിടങ്ങളിൽ നിന്ന് വരുന്നവർക്ക് വെറും ₹15,000 മാത്രമായിരുന്നു പരിധി. പുതിയ ചട്ടങ്ങൾ ഇത് ഒഴിവാക്കി, യാത്രക്കാരുടെ വിഭാഗം അടിസ്ഥാനമാക്കിയുള്ള ഏകീകൃത പരിധികൾ കൊണ്ടുവന്നതായാണ് വിദഗ്ധർ വിലയിരുത്തുന്നത്.

കൂടാതെ, 18 വയസ്സിന് മുകളിലുള്ള യാത്രക്കാർക്ക് ഒരു ലാപ്ടോപ്പ് ഡ്യൂട്ടി-ഫ്രീ ആയി കൊണ്ടുവരാനുള്ള അനുമതിയും, വളർത്തുമൃഗങ്ങളെ  ഉൾപ്പെടുത്തുന്ന വ്യവസ്ഥയും പുതിയ ബാഗേജ് ചട്ടങ്ങളിൽ ഉൾപ്പെടുത്തിയിട്ടുണ്ട്.

മാറിയ യാത്രാസാഹചര്യങ്ങളും ഉയർന്ന വിലനിലവാരവും കണക്കിലെടുത്തുള്ള ഈ പരിഷ്കാരങ്ങൾ, അമേരിക്കയിലെയും മറ്റു രാജ്യങ്ങളിലെയും മലയാളി പ്രവാസികൾക്ക് ഏറെ പ്രായോഗികവും ആശ്വാസകരവുമായ തീരുമാനമായാണ് വിലയിരുത്തപ്പെടുന്നത്.